ANALAR ŞAİR DOĞAR

Elə bilirdim ki, sevmədiyindən

Məni şair kimi doğubdu anam.

Sən demə analar şair doğurlar

Dünyanın dərdləri çoxalan zaman.

ƏN GÖZƏL SEVGİDİ ÖLÜM

İlahi, ən gözəl sevgidi ölüm,

Sevdiyim sevmədi, sevdi ki, ölüm.

Deyəsən hamının sevdiyi ölüm

Çata bilmədiyi arzu kimidi.

Məni görən kimi xoş günlər sindi,

Dərdlər oğlum kimi boynuma mindi.

Qırışlar alnımda at çapır indi,

Bəxtim süddən yanmış quzu kimidi.

Sevgi ürəklərin tacı olsa da,

Qovrulan dəırdlərin sacı olsa da.

Ayrılıq nə qədər acı olsa da,

Həsrətin şeirimin duzu kimidi.

RUH ADAMI

Hüseyn Bağıroğlu üçün

Sən ruh adamısan-ruhun adamdı,

Fikirlər söz kimi ruhuna damdı.

Mən də bir az ruham-ruhunam indi,

Əgər yazdıqlarım ruh versə sənə.

Canını alarsan sözə can verib,

Sözə can verənə söz də can verib.

Sözü Tanrı sənə ərmağan verib,

Cananın gözəldi... ah versə sən.

Bəxtinə bəxt verməz bu bəxt verən də,

Söz adlı dərddəsən bu bəxt verəndən.

Şair, neyləyərsən bu bəxt verənnən,

Gah əlindən alsa, gah versə sənə.

ELXAN YURDOĞLU

Ədalət.- 2010.- 3 aprel.- S. 22.