Sənətkarın səssiz ölümü

 

Məhəbbətin qüdrətini mən belə bilməmişdim, Ana...

 

Bəli, məhəbbətin qüdrətini belə bilməyən Aşıq Xanış.... O məhəbbət səni yaratdı, yaşatdı, ilham verdi, yandın, eşq oduna pərvanə tək dolandın və aramızdan getdin.

Şamaxıdan gələndə eşitdim ki, Aşıq Xanış dünyasını dəyişib, Allah rəhmətinə qovuşub. Həmişə onun ilk dəfə Alim Qasımov tərəfindən ifa olunmuş "Məhəbbətin qüdrəti" mahnısını dinləyərkən əhvalım qalxır, ruhum təzələnir, qəlbimdə isə ilk məhəbbətə düşəndə keçirdiyim döyüntülər sanki təkrarlanır. Balaban ustası və ən əziz dostum olan Şirzadla birlikdə Bakıya çatana yaxın bu xəbəri eşitdim. Ürəyimə od kimi düşdü, başa düşən üçün Aşıq Xanış yaradıcılığının nə demək olduğunu uzun uzadı danışıb təhlil etməyə ehtiyac yoxdur.

Maşında Alim Qasımovu dinləyirdik, onun ardınca isə diskdə növbədə Zabit Nəbizadənin ifasında Aşıq Xanışın az qala şlyaqerə çevirilmiş, bir çox sənətkarlarımız və sənətə iddialı müğənnilər tərəfindən oxunmuş həmin- "Məhəbbətin qüdrəti" mahnısı gəlirdi. Mahnı başladı və biz səssiz-səmirsiz o mahnıya qulaq asaraq şəhərə çatırdıq. Bu dinləməyimiz həmişəki dinləməyimiz kimi deyildi. Bu dəfə o mahnını eşidəndə qəmlənirdik, təəsüf hissi ilə "Allah sənə rəhmət eləsin, Ustad Xanış" deyirdik.

Şəhərə çatdıqdan sonra iş stolumun arxasında əyləşdikdən sonra qulağıma Aşıq Xanışın həmin mahnısı elə bil hardansa səslənmiş kimi gəlirdi. Həmin mahnının qoşub adətim üzrə internetdən xəbər portallarını bir-bir vərəqləməyə başladım. Bir yerdə də olsun Aşıq Xanış gözümə dəymədi, çox təəsüf. Axtarış saytı olan "google" vasitəsi ilə "Aşıq Xanış Məhəbbətin qüdrəti" yazıb "enter" düyməsini vurdum. Fikirləşirdim ki, indi qarşıma "Aşıq Xanış vəfat etdi", "Azərbaycan aşıq sənətinə ağır itki üz verdi", "Aşıq Xanış aramızdan getdi" kimi xəbərlər görəcəm. Amma yalnız "zəngimsel" xidmətlərinin kommersiya reklamlarından başqa bir şey dəymədi.

Çox ağır dərddir, elin ozanı, elin aşığı rəhmətə getsin, onun haqqında bir cümlə belə tapmayasan. Bu boyda xalqın internet məkanında bir dənə də olsun bu itki haqqında xəbər olmasın. Hansı ki, Aygün Kazımovanın dodaqlarının silikonlarının çıxarılması, Zamiqin YPX tərəfindən cərimə olunmasını, Zaurun avtomobil qəzasına düşməsini TV-də və bütün KİV-lərdə manşet eləyib gözümüzə soxanlar bu gün Aşıq Xanışın rəhmətə getməsi haqqında yazmırdılar. Heç elə bil Aşıq Xanış bu dünyaya gəlməyibmiş. Yəqin ki, bu biganəliyi Aşıq Xanış bilsəydi, nə yazardı, nə yaradardı. Ümumiyyətlə, bu dünyaya gəlməzdi.

Aşıq Xanış, yerin behişt olsun, Allah sənə qəni-qəni rəhmət eləsin. Yəqin ki, sən bizi görürsən və bu biganəliyə, sağ olsaydın, öz sözünü deyərdin.

Amma məni eşidib, duyursansa, sənə bir şey demək istərdim. Mən Laçın bir də bu dünyaya gəlmərəm.

 

Söz qanana güllədən də çətindir

Qanmayana güllə nədir, söz nədir ?

Gözəllərə hər cür paltar yaraşar

Çirkinlərə xara nədir, bez nədir?

 

İnsan ömrü keşməkeşli dərindir,

Ana torpaq onu sevənlərindir.

Məhəbbətin hər məramı şirindir.

Eşq əhlinə dərə nədir, düz nədir?

 

İlham mənə tərəddüdü at deyir,

Qazan bu dünyada yaxşı ad deyir.

Xanış, həyat "durma, yaz yarat" deyir.

Yaradana güllə nədir, söz nədir?

 

 

Laçın Məmişov

 

Ədalət.- 2010.- 25 avqust.- S. 4.