"Arşın mal alan"ın yeni dünya turu

 

Bir vaxtlar Rəşid Behbudovun ifasında dünyanı gəzən bu ölməz əsər yenidən səfər üstündədir. Azərbaycan Akademik Opera Balet Teatrının rejissoru Hafiz Quliyev səfərdən qayıdıb. Rejissor Üzeyir bəy Hacıbəylinin "Arşın mal alan" əsərini əvvəlcə Belorusda səhnəyə qoyub, sonra isə Çində.

   "Belorus Azərbaycan dövlətləri, Mədəniyyət Turizm nazirlikləri arasında qarşılıqlı razılaşma ilə Üzeyir bəyin 125 illiyi ilə əlaqədar onların Akademik Musiqili Teatrında "Arşın mal alan"ı hazırladıq. Əsər sırf klassik üslubda Azərbaycan kalariti ilə səhnələşdirildi. Onların da istəkləri belə idi, çünki o səhnədə Azərbaycan, şərq əsəri ilk dəfə səhnəyə qoyulurdu. Ona görə maraq çox oldu. Teatrın rəssamı internetdə Üzeyir bəyə, Azərbaycan musiqisinə aid olan bütün materialları çıxardıb, aktyorlara da bu barədə söhbətlər edirdi" - deyə, Hafiz Quliyev Lent.az-a bildirib.  

   Hafiz Quliyevin dediyinə görə çinlilər özləri "Arşın mal alan"ı hələ 1959-cu ildə səhnələşdiriblər. "Şəkilləri gördüm Əsgəri eynilə Rəşid Behbudova oxşadıb qrimləmişdilər. Həmin aktyorlar indi sağ idilər, gəlib görüşdülər, məşqlərə baxdılar. Tamaşanın rəssamı Tahir Tahirov tam yeni, təbii Azərbaycan koloritli tərtibat verdi." Tamaşa Pekində Belarusda olduğu kimi uğurla oynanılıb, özü Çin dilində. Deyəsən "Arşın mal alan" Rəşid Behbudovun ifasında bir dəfə olduğu kimi yeni dünya turnesini başlayıb. Hafiz Quliyev artıq Ankara, Samsun, Belarus, Moskva, Çin səhnəsində "Arşın mal alan"ı səhnələşdirib. Ümumilikdə bu əsər 90 ölkənin səhnəsində oynanılıb.

  

   Ədalət.- 2010.- 23 dekabr.- S.8.