ŞƏRƏFLİ ÖMÜR YOLU

ƏJDƏR QİYASLI- 75

Əsgərov Əjdər Xanlar oğlu (Əjdər Qiyaslı) 1935-ci il dekabrın 13-də Qarabağın axar-baxarlı, dilbər güşələrindən birində - Ağdam rayonunun Qiyaslı kəndində anadan olub. Orta məktəbi bitirdikdən sonra Azərbaycan Dövlət Xalq Təsərrüfatı İnstitutunda təhsil alıb.

Orada təhsilini uğurla-yüksək qiymətlərlə başa çatdırıb. 1960-cı ildə Azərbaycan Elmi-Tədqiqat Kənd Təsərrüfatının İqtisadiyyatı və Təşkili İnstitutunda elmi işçi vəzifəsində işləməyə başlayıb. Həmin institutda aspiranturaya daxil olub, dissertasiya müdafiə edərək iqtisad elmləri namizədi, alimlik dərəcəsi alıb. 1967-ci ilin sentyabrından indiki Azərbaycan Dövlət İqtisad Universitetində müəllim, baş müəllim, dosent vəzifələrində işləmiş və işləyir. İndi orada 44 ilə yaxındır ki, "İqtisadi nəzəriyyə" fənnindən dərs deyir.

Əjdər Qiyaslı 50 ildən çoxdur ki elmi-pedaqoji və ədəbi sahədə çalışır. Onun iqtisadiyyatın aktual problemlərinə dair 8 kitabı, 85-dən çox elmi əsəri, 150-dən artıq elmi-publisist məqalələri çap olunmuşdur. Hələ müdafiə etməmişdən əvvəl "Azərbaycan gəncləri"qəzetində "İqtisadi bilik bolluğun açarıdır" başlığı altında çap olunan çoxsaylı seriya məqalələri iqtisadçılarda və cəmiyyətdə dərin maraq doğurmuşdur.

Əjdər Qiyaslı 50 çap vərəqi həcmində "İqtisadi nəzəriyyə" və 26 çap vərəqi həcmində "İqtisadi təlimlər tarixi"dərsliklərinin müəlliflərindən biridir. O, "Nizami Gəncəvinin iqtisadi görüşləri" mövzusunda doktorluq dissertasiyası üzərində işləyir. Onun M.F.Axundovun, C.Cabbarlının və S.Vurğunun iqtisadi fikir dünyasına dair yazdığı və "İqtisadiyyat" qəzetində çap etdirdiyi elmi məqalələri iqtisadi irsimizi tədqiq etmək baxımından çox dəyərlidir.

Əjdər Qiyaslının yaradıcılığı qoşa qanadlıdır. O, yalnız kamıl iqtisadçı alim-pedaqoq deyil, həm də istedadlı şair kimi tanınır. Onun hələ 1954-cü ildə orta məktəbdə oxuyanda "Vətənimdir" adlı ilk şeiri mətbuatda işıq üzü görmüşdür. İndi iqtisadçı alim-şairin "Doğma torpaq", "İnsanlara inanıram", "Günəşli nəğmələr", "Yaxşı adam görəndə", "Ömür karvanı", "Ömrün qoşa qanadı", "Mənim dünyam", "Yaşanan günlər", "Səmalardan gələn səda", "Yaradan yaşayır, yaranan qalır", "Dünyanı yaşadan Günəş" və "İqtisad elminin kəhkəşanında" adlı 12 şeirlər kitabı, qəzet və jurnallarda 350-dən çox şeiri çap olunmuşdur. Şairin şeirlərinə S.Ələsgərov, R.Mirişli, M.Əhmədova, C.Musayev, C.Quliyev kimi görkəmli bəstəkarlar çoxsaylı populyar mahnılar bəstələmişlər. Onun şeirləri Türkiyədə, Təbrizdə, Moskvada, Daşkənddə... çap olunmuşdur.

Əjdər Qiyaslı ilk dəfə olaraq "Dünyanın himni"ni yazmış, onu 3 dildə - Azərbaycan, rus və ingilis dillərində çap etdirmişdir; himnin sözlərinə tanınmış bəstəkar C.Quliyev mahnı bəstələmişdir.

Əjdər Qiyaslı yüksək ixtisaslı iqtisadçı kadrların hazırlanmasına uzun müddət səmərəli elmi-pedaqoji fəaliyyətinə görə və Universitetin 75 illik yubileyi münasibətilə Azərbaycan Respublikası Təhsil Nazirliyi Kollegiyasının Fəxri Fərmanı ilə təltif edilmişdir. O, həm də "Araz" Ali Ədəbi mükafatı və "Qızıl Qələm" mükafatı laureatıdır. Şair Azərbaycan Yazıçılar Birliyinin fəal üzvüdür. O, 2002-ci və 2004-cü illərdə Məşhəd ziyarətində olmuşdur.

Belə şərəfli ömür yolu keçən tanınmış iqtisadçı alim-şair Əjdər Qiyaslı bu gün də gənclik eşqilə yazıb-yaradır.

Ədalət .- 2010.- 14 dekabr.- S .6.