YUXUSUZ GECƏLƏR...

Hər şey məktəbdən başlanır. Məktəbdə təlim-tərbiyə, tədrisin keyfiyyəti yüksək olanda, onda həmin yerdə savadlı, bacarıqlı və bilikli gənclər də yetişdirmək mümkündür. Ancaq bunun üçün gərək müəllimlər öz üzərinə düşən məsuliyyəti dərindən dərk eləsin. Bax, onda hər şey sonda daha uğurlu olur. Bu mənada İmişli rayonunda da təhsilin inkişafına, müasirliyinə və eyni zamanda gənclərin bilikli, savadlı yetişməsinə böyük önəm verilir.

Bu gün İmişlidə 63 ümumtəhsil məktəbi fəaliyyət göstərir. Bu məktəblərdə 17 minə qədər şagirdin təlim-tərbiyəsi ilə 1611 müəllim məşğul olur. Rayona təyinatla göndərilən 14 nəfər müəllim kənd məktəblərində vakant yerlərə göndərilib. Bir sözlə, İmişlidə orta ümumtəhsil məktəblərində şagirdlərin daha savadlı və dünyagörüşlü formalaşması üçün gözəl imkanlar yaradılıb. Bu imkanlar isə onu deməyə əsas verir ki, hər bir şagird məktəbdə dərin savad almaqla yanaşı, əsl vətəndaş və kamil insan kimi yetişir.

Yeni məktəblər istifadəyə verilib

Rayonda təhsil sisteminin daha da təkmilləşdirilməsi, müasirləşdirilməsi ilk növbədə yeni məktəblərin istifadəyə verilməsi böyük əhəmiyyət kəsb edir. Elə bunun nəticəsidir ki, son vaxtlar rayonda bir çox məktəblər əsaslı surətdə yenidən təmir edilib, bəziləri isə tikilərək istifadəyə verilib. Belə ki, büdcə vəsaiti hesabına Sarxanlı kənd 2 saylı orta məktəbi üçün 220 yerlik müasir tipli yeni məktəb dərs ilinin ilk günündə istifadəyə verilib. Habelə yerli büdcə hesabına Muradallı kənd orta və Allahmədətli əsas məktəbləri əsaslı surətdə tikilərək istifadəyə verilib. Eyni zamanda, Fövqəladə Hallar Nazirliyi tərəfindən Rəsullu kənd tam orta məktəbi və Əlyetməzli kənd orta məktəbləri inşa edilərək müəllimlərin və şagirdlərin istifadəsinə verilib. Bütün bunlar isə həmin məktəblərdə yaradılmış əlverişli şəraitdən xəbər verir. Üstəlik də, bir çox məktəblər müasir texnika və texnologiya ilə təchiz edilib. Əlbəttə, yeni texnologiyanın orta ümumtəhsil məktəblərinə gətirilməsi şagirdlərin daha müasir və sivill qaydada elmi biliklərə yiyələnməsinə əlverişli şərait yaradır.

Məzunlar üz ağardır

Hər bir rayon və hər bir məktəb yetişdirdiyi məzunları ilə fəxr edir. Yəni o məzunlar ali məktəbə qəbul olursa, ilk növbədə onlar müəllimlərinin etimadlarını doğruldurlar. İmişli məktəbliləri də demək olar ki, müəllimlərinin onların üzərində çəkdiyi zəhməti itirməyiblər. Yəni gecə-gündüz əziyyət çəkmələri, çalışmaları günlərin birində öz bəhrəsini verir. Belə ki, bu il 169 nəfər məzun müxtəlif ali məktəblərə qəbul olaraq tələbə adını qazanıblar. Ən çox tələbə adı qazanan şəhər 5 saylı lisey məktəbi, Muradxanlı, Gövhərli, Nurlu, Ölçələr, Məmmədli, Otuziki, Qaralar, Ağəmmədli, Göbəktala kənd orta məktəblərinin məzunlarıdı. Onu da qeyd edək ki, rayon üzrə 21 məzun 500-dən çox bal toplayıb. 7 nəfər isə 600-dən çox bal yığaraq arzuladıqları ali məktəbin tələbəsi adını qazanıblar. Ali məktəbə qəbul olunanlardan Həmiyyə Məhərrəmova 656 bal, Toğrul Həsənov 640 bal, Aysel Soltanlı 640 bal, Zülfü Zahidli 629 bal, Eyvaz Əzimov 606 bal, Xədicə Rüstəmli 600 bal, Selcan İsmayılova 620 bal toplayıblar. Bütün bunlar isə onu göstərir ki, həmin məzunlar yuxusuz gecələrin bəhrəsini görə biliblər. Bu uğurların qazanılmasında təbii ki, rayon təhsil şöbəsinin müdiri Ramiz Əmirovun, eləcə də məktəb direktorlarının və müəllimlərin böyük payı var.

Müəllimlər öz üzərlərində işləyirlər

Yaxşı şagird yetişdirmək üçün ilk növbədə həmin pedaqoji kollektivdə savadlı müəllim olmalıdır. Əgər müəllim öz üzərində işləməsə, müasir texnika və texnologiyadan istifadə etməsə və təhsildəki yeniliklərdən bəhrələnməsə, şagirdlərdən əvvəl onun özü "axsayacaq". Amma İmişlidə ilk növbədə müəllimlər öz üzərinə düşən məsuliyyəti dərindən dərk edir və həmişə elmi yenilikləri öyrənib şagirdlərinə ötürməyə çalışırlar. Daha doğrusu, müəllim savadlı olanda onun yetişdirdiyi şagirdlər də bilikli və elmli olur. Elə ona görə də İmişlidəki bir neçə müəllim Respublika Prezidenti İlham Əliyevin sərəncamı ilə yüksək ada layiq görülüb. Belə ki, Qızılkənd orta məktəbinin direktoru, rəhmətlik Qurbanəli Məmmədov "Əməkdar müəllim", RTŞ-nin aparıcı məsləhətçisi Səttar Atakişiyev "Tərəqqi medalı" ilə təltif olunublar. Eyni zamanda, təhsil nazirinin əmri ilə RTŞ-nin müdir müavini Vahid Tağıyev və şəhər 5 saylı məktəb-liseyin direktoru Validə Zülfüqarova "Qabaqcıl təhsil işçisi" adına layiq görülüb.

Olimpiadalar sınaq mərkəzidir

Ölkənin hər yerində olduğu kimi, İmişlidə də fənn Olimpiadalarının keçirilməsinə böyük diqqət yetirilir. Belə ki, rayonun iki şagirdi Respublika Olimpiadasında iştirak edib. Onlardan biri 5 nömrəli məktəb-liseyin XI sinif şagirdi Xədicə Rüstəmova, digəri isə şəhər 8 nömrəli orta məktəbin IX sinif şagirdi Arzu Feyziyevadır. Xədicə kimya fənnindən, Arzu isə biologiya fənnindən qaliblər sırasında yer alıb. Bununla yanaşı, rayonun bir neçə şagirdi ümummilli lider Heydər Əliyevin anadan olmasının 87-ci ildönümü münasibəti ilə məktəblər arasında inşa, rəsm və şahmat üzrə keçirilən müsabiqədə iştirak ediblər. Yalavac kənd orta məktəbinin IX sinif şagirdi Türkan Bahadurlu Bakı şəhərində keçirilən inşa müsabiqəsində respublika üzrə 3-cü yeri tutub. Onun adı fəxri kitaba qeyd olunub. O, pul mükafatı, kompüter dəsti və Heydər Əliyev Fondu hesabına Fransa, Almaniya, Belçika, Hollandiya ölkələrinə göndərilib. Digər bir məktəbli - Elnur Mehdiyev respublika şahmat turnirində 1-ci yeri tutub.

Şagird müəllimə güvənəndə...

Rayon təhsil şöbəsinin müdiri Ramiz Əmirov təhsil sistemindəki islahatlar, yeniliklər və uğurlarla bağlı bizə xeyli məlumat verdi. Onu da bildirdi ki, İmişlidə həmişə təhsilə böyük önəm və diqqət yetirilib. Ən azından ona görə ki, bu gün ölkəmizdə təhsilə yüksək səviyyədə qayğı göstərilir. Ölkə prezidenti İlham Əliyevin və eləcə də təhsil naziri Misir Mərdanovun bu sahədəki dəstəyi pedaqoji kollektivlərdə xoş ovqat yaradıb. Üstəlik də ziyalı və savadlı bir insan olan rayon icra hakimiyyətinin başçısı Əbülfəz Ağayevin təhsilə çox isti bir münasibəti var. Bütün bunlar bütövlükdə rayonda təhsilin sistemli inkişafına böyük təkan verir. Artıq təhsilin bütün sahələrində uğurlar əldə edilir.

Düzdür, müəllimlik peşəsi məsuliyyətli işdir, ancaq müəllim savadlı olanda, məsuliyyət hiss edəndə, bax, onda istənilən nəticəni əldə etmək mümkündür. Rayonun bütün pedaqoji kollektivlərində tam məsuliyyətlə deyə bilərəm ki, sağlam atmosfer yaradılıb. Elə bunun nəticəsidir ki, müəllim, şagird və valideyn münasibətləri yüksək səviyyədə qurulub. Bizim əsas məqsədimiz təhsil müəssisələrində savadlı, vətənpərvər gəncləri cəmiyyətə hazırlamaqdır. İnamla deyə bilərəm ki, bu işin öhdəsindən bütün pedaqoji kollektivlərdə bacarıqla gəlinir və bizim hər bir şagirdimiz gələcəkdə həyata müstəqil addım atarkən məktəbdə aldığı biliklər ona hər an böyük kömək edəcək.

Faiq QİSMƏTOĞLU

Ədalət.- 2010.- 28 dekabr.- S. 6.