APARIR

Su üzündə üzən yarpaq,

Səni bir güman aparır.

Uça-uça düşən yarpaq,

Hər şeyi zaman aparır!

Nə var o getdiyin yerdə,

Yarpaq olarasanmı bir də!

Doğrayır qolumu gürzə,

Əllərimi qan aparır!

Nə var zamandan o yana,

Nə var məkandan o yana,

Qalın dumandan o yana,

Məni o yaman aparır!

Hər şey nisbi, hər şey kölgə,

Var olanlar yoxdur bəlkə?!

Bir taleyi neçə döngə,

Sularda saman aparır!

AYRILAQ

Payız alıb dağı-düzü,

Saralıb astarı-üzü,

Könlümün bu sevən gözü,

Kül edib ocaqda közü,

Bu söhbətdən biz ayrılaq!

Ulduzları görəmmədik,

İşığına bələnmədik,

Sevildik, ya sevəmmədik,

Qiymətini biləmmədik,

Səadətdən biz ayrılaq!

Dolu döymüş ağac kimi,

Qurumuş qarağac kimi,

Təndirindən qaxac kimi,

Həm doymuş, həm də ac kimi,

Məhəbbətdən biz ayrılaq!

Nisgili az xiffət elə,

Nə dərd, nə də möhnət elə,

Ürəyini göynət elə,

Sevdiyinə nifrət elə,

Bu nifrətdən biz ayrılaq!

HƏR GÜN BİR QARIŞ

Hər gün bir qarış böyüdüm,

Özüm içimdə-içimdə

Özüm elə yerdə idim,

Gözüm içimdə-içimdə!..

Nə əvvəli, nə də sonu,

Damar qaçır, damar hanı,

Qaldırammır damcı qanı,

Dözüm içimdə-içimdə!..

Əyilən kölgəni yıxır,

Qaranlıq qəlbimi sıxır,

Gecə düşür, yoxa çıxır,

İzim içimdə-içimdə!..

Gözümdən yuxular enir,

Gümüşü sularda sönür,

Susduqca qızıla dönür,

Sözüm içimdə-içimdə!..

Xəqani AYXAN

Ədalət.- 2010.- 30 dekabr.- S. 7.