BİR AXŞAMIN SEVİNCİ...

"Qafqaz media" İctimai Birliyi mətbuat günü ərəfəsində 60 jurnalisti mükafatlandırdı

Milli mətbuatımızın yaradılmasının 135 illiyi ərəfəsində müxtəlif ictimai təşkilatlar kütləvi informasiya vasitələrində çalışan jurnalistlərin əməklərini qiymətləndirərək onları mükafatlandırırdılar. Son bir neçə gün ərzində ayrı-ayrı təşkilatlar tərəfindən onlarla jurnalist müxtəlif mükafatlara layiq görülüb.

Belə mükafatların birini də "Qafqaz media" İctimai Birliyi təsis edib. Öncə onu qeyd edək ki, "Qafqaz media" hər il mətbuat günü münasibəti ilə onlarla jurnalisti sevindirir və onları mükafatlandırır. Bu İctimai Birlik təkcə jurnalistlərin əməyinə qiymət verməklə və onları sevindirməklə öz işini bitmiş hesab etmir. Həm də İctimai Birlik kimsəsizlərə, qocalar evində yaşayan insanlara hayan olur, onlara arxa durur. Bu yaxınlarda Bilgəh qocalar evində keçirilən xeyriyyəçilik aksiyasını yada salmaq kifayətdir. İyulun 19-da isə "Qafqaz media" İctimai Birliyi "Ulu Borçalı" restoranında mətbuat günü münasibəti ilə möhtəşəm bir tədbir həyata keçirdi. Öncə onu qeyd edək ki, "Ulu Borçalı" restoranında təşkil olunmuş bu tədbirdə jurnalistlərin şərəfinə şam süfrəsi açılmış və respublikamızın tanınmış müğənniləri maraqlı konsert proqramı ilə çıxış etmişlər. "Qafqaz medya" İctimai Birliyinin sədri Hacı Azadə Hüseynova görüş iştirakçılarını salamlayaraq, bu axşam onların darıxmayacaqlarını və maraqlı gün yaşayacağını qeyd etdi. "Qafqaz media" İctimai Birliyinin üzvü, BDU-nun müəllimi, fəlsəfə doktoru Kinyaz Aslan bir daha mətbuat günü münasibəti ilə jurnalistləri təbrik etdi, onlara cansağlığı və yaradıcılıq uğurları arzuladı.

Həmin tədbirdə "Qafqaz media" İctimai Birliyi 4 nominasiya üzrə - "Ustad sənətkar", "Peşəkar jurnalist", "Cəsarətli qələm", "Müqəddəs qələm" mükafatlarının qaliblərini müəyyənləşdirmişdi. Qaliblərə diplom və qiymətli hədiyyələr təqdim edildi. Bu hədiyyələr təqdim ediləndə bir daha "Qafqaz media" İctimai Birliyinin sədri Hacı Azadə Hüseynova bir fikri xüsusi ilə vurğuladı ki, hədiyyəmiz kiçik olsa da, biz çalışmışıq ki, 60-a yaxın jurnalisti mükafatlandıraq. Əgər bu əziz gündə kimisə sevindirə bilmişiksə, kiminsə ürəyində bir ümid göyərtmişiksə, buna görə özümüzü xoşbəxt sayırıq. Ən başlıcası isə mətbuat günündə jurnalistlərimiz heç olmasa, bir neçə saat qayğıdan, stressdən və həyəcandan uzaq olub maraqlı anlar yaşasınlar.

Mükafata təqdim olunanlar arasında ölkənin tanınmış jurnalistləri, şairləri və publisiləri var idi. İctimai Televizyanın böyük redaktoru, şair Yusif Günaydın, şair Nürəngiz Gün, BDU-nun professoru Nəsir Əhmədov, Azərbaycan Jurnalistlər Birliyinin sədri Elçin Şıxlı və birliyin əməkdaşı Şahin Babayev, "Qarabağ" qəzetinin redaktoru Sarvan Ağayev, qocaman jurnalist Əlabbas Əliyev və başqaları vardı. Təbii ki, mükafatlar təqdim olunandan sonra bu ada layiq görülən yazarlar onları yada saldığına görə, "Qafqaz media" İctimai Birliyinin rəhbərliyinə, şəxsən Hacı Azadə xanıma öz təşəkkürlərini bildirirdilər. Çıxış edənlər bir fikri xüsusi ilə vurğuladılar ki, əziz gündə bu qədər jurnalisti sevindirmək hər adamın işi deyil. Əgər bir xanım bu qədər insanı və yazarı mətbuat günündə yada salırsa, Allah da heç vaxt onu yaddan çıxarmasın.

Tədbirdə iştirak edən müğənnilər- Ruhəngiz Allahverdiyeva, Rəhilə Bəndəliyeva, Nazənin, Aslan mahnı ifa etməmişdən öncə qeyd etdilər ki, biz jurnalistləri özümüzə dost sayırıq. Bu əziz gündə bir daha qələm sahiblərini bağrımıza basıb opür və onlara yaradıcılıq uğurları arzulayırıq. Sonra müğənnilərin çox şirin və oynaq ifaları səsləndi. Bir çox həmkarlarımız ayağa qalxıb, onların ifa etdikləri mahnıların sədaları altında rəqs elədilər. Bir sözlə, müğənnilər bu məclisə elə bir şirin ovqat gətirdi ki, bir anlıq çoxlarımız qayğımızı unutduq və xoş anların aurasına düşdük.

Tədbirdə ən maraqlı və həyəcanlı anlardan biri dünya işığına həsrət qalan şair Mansur Qadirin kövrək bir mahnını özünəməxsus bir tərzdə ifa eləməsi oldu. Onun ifası məclis iştirakçılarının əksəriyyətini kövrəltdi və ağlatdı. Bu insanda yaşamaq eşqi o qədər güclüdür ki, dünyanı görən insanlardan Mansur həyatı daha yaxşı görür və dərk edir. O, iki şeir kitabının müəllifidir. Bu kitabınsa işıq üzü görməyində "Qafqaz media" İctimai Birliyinin böyük əməyi olub.

İsti yay günündə 60 jurnalisti sevindirən "Qafqaz media" İctimai Birliyi bu addımı ilə bir daha təsdiq etdi ki, həmin təşkilat heç vaxt istedadlı jurnalistləri unutmur və onların zəhmətinə, əməyinə, alın tərinə yüksək qiymət verir. Həmin axşamın sevincini yaşamaq doğurdan da çox gözəl idi. Bir anlıq da olsa qayğılar, problemlər unuduldu və insan özünü gözəl bir aləmdə hiss elədi.

Faiq QİSMƏTOĞLU

Ədalət.- 2010.- 21 iyul.- S. 4.