AKADEMİYA AzTV-nin UĞURUDUR

Bu yaxınlarda Azərbaycanda yeni təhsil ocağı - Televiziya Akademiyası yaradılması barədə geniş xəbər yayıldı. Azərbaycan Televiziya və Radio Verilişləri Qapalı Səhmdar Cəmiyyətinin bazasında yaradılan yeni tədris müəssisəsinə "Space" televiziyasının sabiq prezidenti, Bakı Slavyan Universitetinin jurnalistika kafedrasının müdiri Etibar Babayevin rektor təyin edilməsi ictimaiyyət tərəfindən rəğbətlə qarşılandı. Yüksək təşkilatçılıq qabiliyyəti, geniş yaradıcılıq imkanları, pedaqoji təcrübəsi, fəal vətəndaşlıq mövqeyi fərqlənən ziyalımız, eyni zamanda "Ədalət" qəzetinin köşə yazarı kimi tanınır. Artıq neçə ildir ki, oxucularımız qəzetin hər şənbə nömrəsində Etibar Babayevin imzasıyla təqdim olunan publisistik yazıları maraqla izləyirlər. Jurnalistin tarixi araşdırmaları, aktual sosial problemlərə həsr olunan publisistik yazıları, dərin müşahidələr və ibrətamiz fikirlərlə zəngin yol qeydləri, görkəmli şəxsiyyətlərlə bağlı xatirələr silsiləsi dil və islubu, mövzuya yanaşma tərzi, işlənmə texnikası, təqdimat forması ilə xüsusi fərqləndiyindən oxucu auditoriyasının rəğbətini qazanmışdır.

"Ədalət" qəzetinin kollektivi olaraq, Etibar Babayevi yeni təyinat münasibəti ilə səmimi qəlbdən tərbik edir, ona daha böyük uğurlar arzulayırıq. İnanırıq ki, Televiziya Akademiyası onun rəhbərliyi ilə yaxın gələcəkdə respublikanın ən nüfuzlu təhsil və elm ocaqlarından birinə çevriləcəkdir.

-Yeni nəsə yaradılanda, kənardan müxtəlif fikirlərin səslənməsi, fərqli proqnozların verilməsi təbiidir. Televiziya Akademiyasının yaradılmasına münasibət müsbət olsa da, onun AzTV-nin tərkibində açılması birmənalı qarşılanmadı. Digər telekanallarsa nədənsə bu barədə susmağa üstünlük verdilər. Akademiyanın müstəqil qurum kimi, fəaliyyət göstərməsinin daha faydalı və effektiv olacağını söyləyənlər də oldu. Akademiyanın açılış mərasimindən düz bir ay ötür. Bir aylıq fəaliyyətinizdən sonra məsələyə içdən nəzər salanda, AzTV-nin tərkibində olmaq sizi sıxışdırmır ki?

- Xeyr, məni əsla sıxışdırmır, amma ola bilsin bu məsələ kimlərisə bərk darıxdırır. Xoş niyyətlə, xeyirxah məqsədlə yaradılan və əslində təməlatma dövrünü yaşayan Akademiya haqda müxtəlif pessimist proqnozlar verib, fikirləri bulandırmaq kimə lazım? Məsələnin mahiyyətinə nəzər salmaq lazımdır. Azərbaycan müstəqillik qazanandan sonra respublikada teleradioların sayının ilbəil çoxalması faktdır. Amma bəzi kanalların səviyyəsiz verilişlərindən, sistemsiz, məzmunsuz efir siyasətindən, proqramların zövqsüz tərtibatı və təqdimatından, bu sahədə çalışanların əksəriyyətinin qeyripeşəkarlığından narazılıq cəmiyyətdə getdikcə artır. Təsadüfi deyil ki, efir məkanında ciddi narahatlıq doğuran hallara hörmətli akademik Ramiz Mehdiyevin prinsipial mövqeyi, obyektiv qiyməti cəmiyyətdə böyük rəğbətlə qarşılandı, geniş müzakirələrə səbəb oldu. Bu bir daha göstərdi ki, mühüm ideoloji silah həvəskar əllərə düşəndə xoşagəlməz nəticələrə gətirib çıxara bilər. Mülkiyyətindən asılı olmayaraq kütləvi informasiya vasitələrində sağlam düşüncəli, əqidəli peşəkarlar işləməlidir.

Ən müasir avadanlığı qısa müddətə xaricdən gətirib quraşdırmaq mümkündür. Məsələ sadəcə maddi imkana bağlıdır. Amma, teleradio aparıcılarını, jurnalistləri idman aləmində olduğu kimi, digər ölkələrdən transfer etmək ağlasığan iş deyil. Efirdə ana dilimizdə danışan millimənəvi dəyərlərimiz, adətənənələrimiz və əxlaq normalarımızdan qaynaqlanaraq fəaliyyət göstərən peşəkarları ancaq öz məmləkətimizdə hazırlamalıyıq. Yalnız bundan sonra əgər ehtiyac olarsa, ixtisasartırmağa, təcrübə toplamağa xarici ölkələrə göndərməliyik. Respublikada teleradionun bütün sahələri üçün kadrlar hazırlayacaq yeni ali təhsil ocağının açılması bu səbəbdən əhəmiyyəti hadisədir. Əgər ilk milli teleradiomuz olan AzTV bu sahədə ilk ciddi addım atıbsa, buna daralmaq yox, ürəkdən sevinmək, mühüm ictimai əhəmiyyət kəsb edən təşəbbüsü alqışlamaq, dəstəkləmək lazımdır.

-Akademiyanın gələcək fəaliyyətini siz necə təsəvvür edirsiniz?

- Akademiya yeni yaranan qurumdur. İndi təşkilatlanma, formalaşma prosesi gedir. Adətən belə hallarda əsas çətinlik madditexniki bazanın yaradılması və peşəkar kadrların tədris prosesinə cəlb edilməsi ilə bağlı olur. Azərbaycan Televiziya və Radio verilişləri Qapalı Səhimdar Cəmiyyəti rəhbərliyinin yaxından köməyi ilə birinci məsələ ən yüksək səviyyədə öz həllini tapıb. İnamla deyə bilərəm ki, respublikada heç bir təhsil ocağında teleradio sahəsində kadr hazırlığı üçün belə şərait yoxdur. Xüsusi avadanlıqla təmin olunmuş auditoriyalar müəllimlərə tədris prosesində ən müasir texniki vasitələrdən geniş istifadə etməyə imkan verəcək. Pedaqoji kollektivin formalaşması prosesinə də çox ciddi yanaşılacaq. Bu sahədə kifayət qədər təcrübəsi, yüksək səriştəsi olan mütəxəssislərlə yaxından əməkdaşlıq edəcəyik. Amma üzümüzə gələn yeni dərs ilində, əsasən AzTV-nin əməkdaşları üçün ixtisasartırma və ixtisasdəyişmə kursları nəzərdə tutulur. Akademiyada təhsil prosesi bir qədər fərqli olacaq. Əsas diqqət nəzəri biliklərlə yanası, dinləyicilərin,yaxın gələcəkdə isə həm də tələbələrin, praktik iş qabiliyyətinin inkişafına yönələcək. Onlara yeni texniki avadanlıqlardan tam gücüylə, yaradıcı şəkildə istifadə qaydaları öyrədiləcək. Diplom və kurs işləri konkret verilişlər, proqramlar hazırlamaq, sənədli filmlər çəkmək olacaq. Ən yaxşıları televiziya ilə göstəriləcək, radioda səslənəcək. İşimizi mərhələli şəkildə və bir neçə istiqamətdə qurmaq niyyətindəyik. Gələn ildən magistratura pilləsində əsas ixtisaslar üzə tələbə qabulu nəzərdə tutulur. Akademiyaya müxtəlif ixtisaslar üzrə bakalavr diplomu almış və öz gələcəyini efir məkanı ilə bağlamaq istəyən istedadlı gənclər daxil ola biləcək. Burada onların yaradıcılıq qabiliyyətlərinin tam şəkildə açılmasına hər cür şərait yaradılacaq. Dünyanın aparıcı telekanallarında təcrübə keçmək, birgə çəkilişlərdə iştirak etmək, müştərək proqramlar hazırlamaq isə təhsil prosesini daha səmərəli edəcək.

Akademiya tədris prosesi ilə yanaşı, bu sahənin elmi araşdırmaları ilə məşğul olmağı da qarşısına məqsəd qoyub. Peşəkar televiziya tənqidçilərinin, nəzəriyyəçilərinin hazırlığı xüsusi diqqət mərkəzində saxlanılacaq.

-Tədris prosesinə konkret olaraq kimləri cəlb edəcəyiniz haqda bir qədər müfəssəl məlumat verməyinizi rica edərdim.

- Mən bu sahədə Amerikanın, İngiltərənin, Rusiyanın, Türkiyənin, eləcə də digər ölkələrin təcrübəsini müəyyən qədər öyrənmişəm. Bəzi ölkələrdə kadr hazırlığı prosesini yaxından müşahidə etmişəm. Çox istərdim ki, bizim Akademiya təkcə texniki təhcizatı ilə deyil, tədris prosesinin təşkili və səviyyəsi ilə də ən müasir tələblərə cavab versin. Təbii ki, bunun üçün yüksək ixtisaslı kadrlar lazımdır. Etiraf edək ki, bu sahədə öyünəcək halımız yoxdur. Hər dünya çempionundan yaxşı məşqçi alınmadığı kimi, hər yaxşı jurnalist, yaxud rejissor, tərtibatçı rəssam peşəsini mükəmməl təlim edən pedaqoq ola bilmir. Odur ki, tədris prosesinə xarici ölkələrdən mütəxəssislər cəlb ediləcək. Amma əsas yük yenə də öz kadrlarımızın üzərinə düşəcək. Hələlik konkret ad çəkmək istəməzdim. Bircə onu deyə bilərəm ki, seçim yüksək elmipedaqoji səviyyəsi, praktik iş təcrübəsi ilə fərqlənən və bu kollektivin üzvlüyünə mənəvi haqqı olan insanlar arasında aparılacaq. Çünki, sağlam mənəvi iqlim şəraiti, işə yaradıcı münasibət, hər kəsin əməyinə obyektiv qiymət, yüksək tələbkarlıqla yanaşı, hər fərdə fərdi münasibət, qayğı, diqqət olmasa, istənilən nəticə alınmayacaq. Odur ki, ilk gündən Akademiyanı sağlam təməllər üzərində qurmağa çalışırıq.

Ceyhun Musaoğlu

Ədalət.- 2010.- 17 iyul.- S. 4.