Qışdan sonra yaz gəlməsin

Qışdan sonra yaz gəlməsin

Qışdan sonra yaz gəlməsin,

sular axıb durulmasın,

fələyin üzü gülməsin,

məni ümidimdən asın.

Ay batsın gecə yarı,

boz qurdlar ulamasın,

ərisin dağların qarı,

məni bu sevdamdan asın.

Torpağa qara daş əkin,

üstünə adımı yazın,

sonra bir salavat çəkin,

məni ruhumdan asın...

EŞQ DUALARI

Allahım, bir eşq göndər

diz çökübən and içim.

Sən bir eşq göndər mənə

uğrunda candan keçim.

Allahım, tək-tənhayam

fələyi geri göndər.

Mən qullardan bir qulam,

bir ilahi eşq göndər.

Söylə, nə var dünyada?

Allahım, səndən uca.

Bir eşq göndər bəndənə,

bəndən göylərə uça.

Allahım, bir buta ver,

buta ver bir röyada.

Sənin eşqindən uca,

söylə nə var dünyada?..

***

Ana, laylan ovutmaz,

ovutmaz qərib könlümü.

Fələk göydən boylanıb,

baxıb, görüb könlümü.

Ana, burda qürbətdəyəm,

dərdlərimi oyatma.

Durnalarla göndərdiyim

məktubu cırıb atma.

Ana, qara sevdalıyam,

qara misralar yazdım.

Qara yuxular gördüm-

Qara yuxular yozdum...

Ana, bir dua elə,

haqdan küləklər əsir.

Fələk göylərdən enib

mənim yolumu kəsir...

BƏDİRLƏNMİŞ AY EŞQİNƏ

Kölgəsi özündən

gözəl şah tutlar,

köpük-köpük,

pəmbə-pəmbə buludlar...

Durnalarla geri dönmür

umudlar-

sən dünya dediyin burası

deyil...

Rüzgar alnımızdan

bir misra silməz,

sevdalı könüllər

bir daha gülməz,

ölüm bir namərddi,

dost-düşmən bilməz,

sən dünya dediyin

burası deyil...

Bədirlənmiş Ay eşqinə

dua eylədim,

bəlkə heç olmamış şeylər

dilədim,

bu dünyanın

hər üzünə bələdəm-

sən dünya dediyin

burası deyil...

PAYIZ AYRILIĞI

Göy üzü qəfildən tutulur, dolur,

yarpaqlar tökülür, yarpaqlar solur,

ötən bir məhəbbət xatirə olur.

unut məni, unut məni, əlvida.

Sən yağışlı gündə çıxma qarşıma,

taleyə qarışma, bəxtə qarışma,

daha bir kimsədən məni soruşma,

unut məni, unut məni, əlvida.

Taleyə inandım, baxta inandım,

inandım, aldandım, yenə inandım,

haqqın qapısında gəlib dayandım,

unut məni, unut məni, əlvida.

BİR ÖMÜR YAŞADIM

Daha bu əzablar, ağrılar yetər,

bir ömür yaşadım, o da ki,

hədər...

Yenə də ayrılıq, yenə də kədər,

taleyim tuş etdi daşa ömrümü.

Yaxşı günlərimi yaman eylədim,

mən belə yaxşıdır,

güman eylədim.

Kimsədə günah yox,

qurban eylədim,

özüm öz əlimlə qışa ömrümü.

Özüm öz gücümlə qalxıb

ucaldım,

təklikdən, həsrətdən,

vallah qocaldım...

... Elgizim, Nərgizim

çox balacadı-

ay Allah,

vuraydım başa ömrümü.

Adiləm, qəm-qüssə

yaşar gözümdə...

Qalaram dünyada şeirim,

sözümlə.

Bacara bilsəydim özüm-özümlə,

Qoymazdım yolundan çaşa

ömrümü.

BÖYÜK SEVGİLƏRƏ ÜMİD BAĞLADIM

Kiçik qayğılardan, kiçik hisslərdən,

çörəyi dizində olan kəslərdən,

əl çəkib üzümə gülən kəslərdən