BAŞ DAŞINA YAZILAN ŞEİR

Qızımın xatirəsinə

Sən bahar fəslində saralan gülüm,

Tökülər gözümdən yaş parça-parça,

Dərdimi Aytənim, daşa söylədim,

Ovuldu töküldü daş parça-parça.

Sən getdin dünyalar başıma endi,

Göylər haray çəkdi, mələklər dindi,

Ana laylasından doymayan gülüm,

Ata laylasına qulaq as indi.

Lay-lay-lay Aytənim, lay-lay-lay balam,

Dur səndə atana bir layla denən,

Yumulmur gözlərim, susmur harayım

Eşitmir qulağım harayla denən

İstəyə, arzuya çatmayan qızım,

Atanın bükülməz dizini yumdun,

Atasız göz yumub yatmayan qızım,

Bəs niyə əbədi gözünü yumdun.

Dur sarıl anana, vəfasız olma,

Atan da, anan da quru can qalıb

Darıxma, ay qızım, darıxma balam,

Yanına gəlməyə bircə an qalıb.

Fariz İŞIQLI

Ədalət.- 2010.- 3 iyun.- S. 7.