"ZABUL" AĞABALANIN
KEÇDİYİ YOL
Xanəndə Ağabala Abdullayevin 100 illiyinə
tövhə
Deyirlər ki, dünya gəlimli-gedimli,
ölümlü-itimlidi. Onu da deyirlər ki, dünya bir pəncərədi,
hər gələn baxıb gedər. Və onu da deyirlər
ki, dünya fani olsa da, onun əbədi yaşatdıqları
da var. Bax, elə bu əbədi yaşamaq, xatırlanmaq,
anılmaq xoşbəxtliyi nəsib olan insanlardan biri də hər
kəsin "Zabul" un ustadı kimi tanıdığı və
adı ilə qoşa çəkildiyi Ağabala Abdullayevdi. O
Ağabala Abdullayev ki, Azərbaycanın bir bölgəsində
doğuldu, başqa bir bölgəsində yaşadı və
bütövlükdə səsi ilə, nəfəsi ilə
bütün Azərbaycanın sakininə, vətəndaşına,
xanəndəsinə çevrildi. Xanəndə Ağabala
Abdullayev 100 il bundan öncə respublikamızın
işğal altında olan Qubadlı rayonunda dünyaya gəlib.
Amma yetkinlik yaşına çatar-çatmaz oradan bu gün həsrətini
çəkdiyimiz Füzuli rayonuna valideynləri ilə birlikdə
köçüb gəlib. Və bu gəlişi ilə
Qubadlı rayonunun Çərəli kəndinin
canında-qanında olan istisini, hərarətini,
saflığını Füzulidə içdiyi bulaq
sularına, mehrbançılığa, ünsiyyətə,
qayğıya, səmimiyyətə, bütövlükdə
yeni bir auraya qatmaqla musiqi dünyamıza, nəfəslər aləminə
bir təravət gətirdi.
Bu günlərdə
Sumqayıtdakı "28 May" mədəniyyət evində
böyük bir qaynaşma, qələbəlik var idi. Oraya
axışan insanların çöhrələrindən bir
rahatlıq, bir duyğusallıq tökülürdü. Hiss
olunurdu ki, onları mədəniyyət evinə daxili bir təlabat
çəkib gətirir. Təbii ki, bu belə də olmalı idi. çünki həmin gün mədəniyyət
evində Qubadlı və Füzuli rayonlarının icra hakimiyyətlərinin, eləcə
də Mədəniyyət
və Turizm Nazirliyinin xüsusi planı əsasında xanəndə Ağabala Abdullayevin 100 illik yubileyi keçirilirdi.
Tədbirin hazırlanması
üçün yaradılmış
komissiyanın üzvlərinin,
Qubadlı və Füzuli Mədəniyyət
və turizm idarələrinin, eləcə
də digər ictimai təşkilatların
səyi ilə xanəndənin adına layiq ədəbi-bədii gecə hazırlamışdılar.
Tədbirə qatılanlar mədəniyyət
evinin foyesində böyük xanəndə
ilə bağlı xüsusi sərginin qarşısında ayaq saxlayıb ötən keçmişi xatırladan
fotoşəkillərə, stendlərə baxır və hər kəs də öz xatirələrinin qoynunda Ağabala Abdullayevin səsinin izinə düşüb gedirdi. Tədbiri Mədəniyyət
və Turizm Nazirliyinin şöbə mudiri şair Vaqif Bəhmənli açaraq böyük xanəndə barəsində
ətraflı məlumat
vermiş, ürək
sözlərini söyləmişdi.
Onun fikirlərini davam etdirən Füzuli rayon İcra Hakimiyyətinin başçısı
Nəbi Muxtarov xanəndənin sənəti,
şəxsiyyəti barəsində
ətraflı danışmaqla
müəyyən xatirələri
də dilə gətirmişdi. ədəbi-bədii
gecədə çıxış
edən Qubadlı rayon icra hakimiyyətinin
başçısı Malik
İsakov, eləcə də xanəndə barəsində
təhqiqatlar aparmış,
sanballı kitab yazmış tanınmış
yazıçı Seyran
Səxavət tədbir
iştirakçılarının ürək sözləri ilə yanaşı Ağabala Abdullayevin Azərbaycan musiqi tarixindəki yeri barəsində də fikirlərini çatdırmışlar.
Çıxışların hamısında xüsusi olaraq vurğulanmışdı ki, bu gün əsasən
yaşlı nəslin
nümayəndələri milli
müsiqimizin, muğamlarımızın
mahir bilicisi, ustad xanəndə Ağabala Abdullayev özünün ifaçılıq
məktəbini yarada bilmişdi. Məhz onun ifasında
"Zabul" və
"Rast" kimi muğamlarımız böyük
dinləyici auditoriyası
qazanmışdı. Ustad
xanəndənin oxuduğu
"Boz at" mahnısı isə demək olar ki, bütün musiqi aləminin, toyların, şadlıqların
ən populyar ifasına çevrilmişdi.
Hər kəs Ağabala Abdullayevdən daha çox "Zabul" və "Boz at" ifalarını
istəyirdi.
Böyük maraqla
keçən əbədi-bədii gecədə
respublikamızın tanınmış ziyalıları, musiqi
təmsilçiləri, o cümlədən də xalq artistləri
Qəndab Quliyeva, Teymur Mustafayev, respublika muğam müsabiqəsinin
laureatı Qoçaq Əsgərov öz
çıxışları və ifaları ilə məclisi
daha rəngarəng etmişdilər. Bu tədbirdə Dədə
Süleyman, yəni xanəndə Süleyman Abdullayevin söhbətləri
və ifası isə xüsusi bir şövq bəxş
etmişdi. Ümumiyyətlə, tədbirdə
çıxış edən müğənnilər, Eldar
Novruzov, Təşkilat Nəsirov Ağabala Abdullayevin xatirəsinə
həsr olunmuş mərasimi daha yadda qalan etmişdilər.
Bu möhtəşəm
mərasimə görə, təşiklatçılara və
iştirakçılara təşəkkürünü bildirən
Ağabala Abdullayevin oğlu xanəndə Nizami Abdullayev
atasının xatirəsinə göstərilən bu
qayğını, bu diqqəti Azərbaycanda muğama, musiqiyə
olan sayğının və sevginin nümunəsi kimi diqqətə
çatdırmışdı.
Xanındə Ağabala
Abdullayevin 100 illik yubileyi ilə bağlı
hazırlanmış bu yubileyin keçirilməsində təşkilat
komitəsinin üzvü kimi yaxından iştirak edən
Füzuli rayon Mədəniyyət və Turizm idarəsinin rəhbəri
Elman Məmmədov bizimlə söhbətdə bildirdi ki,
"Ağabala Abdullayev təkcə Qubadlının,
Füzulinin deyil, bütövlükdə Azərbaycanın fəxridir.
Onun ifası hər birimizin duyğularımızın, istəklərimizin
tərənnümüdür. Biz çox şadıq ki, Heydər
Əliyev Fondununprezidenti, YUNESKO və İSESKO-nun xoşməramlı
səfiri, millət vəkili Mehriban xanım Əliyevanın
qayğısı ilə Azərbaycan muğamları, o
cümlədən də Ağabala Abdullayevin ifası indi
geniş təbliğ edilir, öyrənilir. Bu tədbirin
keçirilməsi muğama olan sevginin, diqqətin nəticəsidir.
Tədbirin möhtəşəm alınmasında rayon icra
hakimiyyətinin, Mədəniyyət və Turizm Nazirliyinin dəstəyi
xüsusi rol oynamışdı. Hər kəsə bu
sayğıya görə təşəkkür edirik".
Bəli,
Sumqayıtdakı "28 May" mədəniyyət evində
həmin gün hər kəs Ağabala Abdullayevdən
danışırdı, onu xatırlayırdı və onun
ifası üzərində köklənirdi...
Əbülfət MƏDƏTOĞLU
Ədalət.- 2010.- 5 iyun.- S. 21.