Qərbdən doğan günəş

15 iyun Milli Qurtuluş Gününün ölkəmizdə bayram edilməsi artıq ənənə halını almışdır.Hökumət və qeyri-hökumət təşkilatlarında, idarə və müəssisələrdə rayon və şəhərlərimizin hər yerində xalq öz milli liderinə, Azərbaycan xalqının ləyaqətli oğlu Heydər Əliyevə hörmət və ehtiramını, ümumxalq məhəbbətini göstərir, Ulu öndərimizin çərçivəyə sığmayan fəaliyyətindən danışır, onun Azərbaycan dövlətinə, Azərbaycan xalqına etdiyi xidmətin əzəmətindən söhbət açırlar. Bu qəbildən olan tədbirlərdən biri də "Sabitlik və İnkişaf Mərkəzi" qeyri-hökumət təşkilatının keçirdiyi toplantıdır. Bakı Əyləncə Mərkəzində keçirilən tədbir bir çox xüsusiyyətlərinə görə ibrətamiz və unudulmaz idi. Adlı-sanlı elm, mədəniyyət, səhiyyə işçiləri və digər ziyalıların bura dəvət olunması təşkilati baxımdan hərtərəfli düşünülmüş rəsmi və bədii hissədən ibarət olan tədbiri, bu gün Azərbaycan kinosunda və teatr səhnəsində parlaq istedadı ilə fərqlənən, cəmiyyətimizdə tutduğu mövqeyə görə xüsusi çəkiyə malik olan, xalq artisti Nurəddin Mehdixanlı idarə edirdi. Bildirməliyik ki, tədbirin keçirildiyi qonaq salonu və səhnəsi yüksək zövqlə, peşəkarlıqla hazırlanmış, ideoloji təbliğat vasitələrinin düzgün yerləşdirilməsi və nümayiş olunması məqsədəuyğun şəkildə xoş təsir bağışlayırdı. "Sabitlik və inkişaf dövlət siyasətimizin qayəsidir" Heydər Əliyevdən gətirilən bu sitatın səhnədə yazılması manitorinqdə nümayiş olunan Ulu öndərimizlə bağlı xatirə fotoları həmahənglik təşkil edirdi. Salonda isə Heydər Əliyevə həsr edilmiş kitablardan ibarət sərgi, "Şərəfli ömür yolu", "Xalqın tükənməz sevgisi" və "Əlçatmaz zirvə" adda üç fotolöhvə qonaqların diqətini cəlb edirdi. Qonaqları salamlayandan sonra giriş sözü deyən Mərkəzin icraçı direktoru, Mədəniyyət və İncəsənət Universitetinin baş müəllimi, sənətşünaslıq üzrə fəlsəfə doktoru Yasəmən Hacıyeva "Milli Qurtuluş günü"nün Azərbaycanın yeni tarixində ən böyük tarixi hadisə olduğunu göstərdi və Heydər Əliyevin Azərbaycan dövləti və Azərbaycan xalqı qarşısında xidmətlərinin əvəzsiz olduğunu faktlarla dedi. Sonra çıxış üçün söz "Sabitlik və inkişaf Mərkəzi"nin idarə heyətinin rəhbəri Rasim Məmmədova verildi. Rasim müəllim Mərkəzin həyata keçirdiyi işlərdən qısa arayış verib tədbirin həsr olunduğu "Milli Qurtuluş" gününün qeyd olunmasının sosial-siyasi əhəmiyyətindən danışdı. O, dedi: - "Milli Qurtuluş günü"nün qeyd olunması Heydər Əliyev siyasi kursuna olan böyük hörmət və ehtiramın nümunəsidir. Heydər Əliyev bir şəxsiyyət kimi tarixdə təkrarolunmaz və əvəzolunmazdır. Onun Azərbaycan tarixində rolu çox böyükdür. Azərbaycanın müstəqil dövlət kimi inkişafı və möhkəmlənməsi Heydər Əliyevin adıyla bağlıdır.

Fəlsəfə elmləri doktoru, professor, millət vəkili Jalə Əliyeva, xalq şairi Söhrab Tahir, Milli Təhlükəsizlik Nazirinin keçmiş müavini, təqaüdə olan general-mayor Bahadur Hüseynov, Milli məclisin iqtisadiyyat daimi komitənin sədri akademik Ziyad Səmədzadə, Nizami RPİ-nin rəisi, polis polkovniki İsmail Əsədov, "Neftçilər" xəstəxanasının cərrahiyyə şöbəsinin müdiri, tibb elmləri doktoru, professor Rəşad Mahmudov, Qeyri-hökumət təşkilatları forumunun sədri Rauf Zeni, professor Nizaməddin Şəmsizadə və başqaları öz çıxışlarında ümummilli liderimiz Heydər Əliyevin 17 il bundan əvvəl xalqın tələbi ilə ikinci dəfə hakimiyyətə gəlməsini və Azərbaycanı düşdüyü böyük bəladan, yəni müstəqilliyimizin, dövlətçiliyimizin itirilməsi təhlükəsi ilə üzləşdiyimiz bir bəladan xilas etdiyini söylədilər. Qeyd edək ki, "Sabitlik və inkişaf Mərkəzinin"təsis etdiyi qızıldan "Əbədi lider" Heydər Əliyevin şəkli həkk olunan döş nişanı ilə təltif olunan millət vəkili Jalə Əliyeva, polis polkovniki Ismail Əsədov və doktor Rəşad Mahmudov dövlət və xalq qarşısında, elm, səhiyyə və hüquq mühafizə sahəsində hər biri fərdi xidmətlərinə görə fərqləndikləri üçün Mərkəzin ödülünə layiq görüldülər və əbədi olaraq "Əbədi lider" qızıldan olan döş nişanının layiqli sahibi oldular. Doktor Rəşad Mahmudov öz çıxışında qeyd etdi: - Azərbaycan tarixinin ən şanlı səhifələrindən birini əks etdirən "Milli Qurtuluş" günü münasibəti ilə təşkil olunan bu mötəbər tədbirdə qızıldan "Əbədi lider" döş nişanının mənə təqdim olunması Heydər Əliyev ideyalarının həyata keçirilməsində, yəni, xalqımızın sağlamlığı sahəsində gördüyüm və görəcəyim işləri daha səmərəli yerinə yetirmək üçün inamım, qüvvəm və ümidim daha da davamlı, dayanıqlı olması üçün böyük ruh yüksəkliyi ilə çalışacağam. Heydər Əliyevlə bağlı nə varsa, mənim üçün bir vətəndaş kimi əziz və doğmadır. Heydər Əliyev Azərbaycana günəş kimi doğmuşdur. Sönməz əbədi bir günəş kimi. Günəş Azərbaycana həmişə şərqdən doğub. Ancaq 1993-cü ildə Günəş Azərbaycana Qərbdən, yəni Naxçıvandan doğdu. Zülmətdə, bataqlıqda olan Vətənimizə bir nur saçdı. Vətəndaş müharibəsinin qarşısını aldı. Xaos və özbaşınalığa son qoydu. Milli dövlətçiliyə olan təhlükəni sovuşdurdu və bu gün Azərbaycan dünya ölkələri arasında xüsusi çəkisi olan bir dövlət kimi yeni inkişaf mərhələsindədir.

Sonda Mədəniyyət və İncəsənət ustalarından Niyaməddin Musayev, Yaqub Zurufçu, Məleykə Əsədova, Ağadadaş Ağayev, Azər Zeynalov, bədii qiraət ustası Xəzər Emin və başqalarının iştirakı ilə gözəl, musiqi sədaları və poeziya nümunələrinin təsiri altında, Azərbaycan mətbəxinin dadlı, ləziz təamları ilə təchiz olunmuş süfrə ərtafında oturmuş qonaqları yüksək əhval-ruhiyyədə gördükdə, bütün bunları ölkə prezidenti cənab İlham Əliyevin respublika daxilində sabitliyi və inkişafın qarantı kimi gördüyü xidmətin bəhrəsi kimi qəbul etmək daha ədalətli haşiyyə olardı.

Bəli, "Sabitlik və Inkişaf Mərkəzi"nin keçirdiyi tədbirlər yüksək, intellektual səviyyəsinə, siyasi, mənəvi və sosial əhəmiyyətinə görə həmişə fərqlənmişdir. Çünki Mərkəzin Idarə heyətinin başında dayananlar bir ənənə olaraq insanları başına, əqidəsinə görə qiymətləndirir, qəbul edir, yola salırlar. Məhz özləri yüksək əqidəli insanlar olduqlarına görə, yüksək əqidəli insanları da "Milli Qurtuluş günü"nə dəvət etmişdilər.

Emin Sabit

Ədalət.- 2010.- 19 iyun.- S. 7.