İÇİMİ SƏRDİM KÜLƏYƏ

Bu qış mənə sitəm olub,

İçimi sərdim küləyə.

Gözüm islanıb, nəm olub.

İçimi sərdim küləyə.

Çıxarıb asdım bezini,

Günəş qızdırsın üzünü,

Toparladım mən özümü

İçimi sərdim küləyə.

Başqa cür yoxdur yozumu,

Çəkdim içimin nazını.

Külək aparsın tozunu,

İçimi sərdim küləyə.

Qoy gözümün qəmi getsin,

Qoy dərdimin dəmi getsin,

Qoy içimin nəmi getsin,

İçimi sərdim küləyə.

SƏNİ MƏNƏ QOŞDULAR

Nə sən

məni görmüşdün,

Nə mən

səni sevmişdim.

Nə sənə elçi gəldilər,

nə də mən

elçi göndərmişdim.

Səni mənə vermədilər

əslində,

səni mənə almadılar

əslində,

səni mənə qoşdular,

müqavilə ilə

şərt ilə.

müqavilənin

başlanması

nişan üzüyü.

İcrası

toy günü.

Evlilik

ömürlük həbs.

Ayırılıq

bəraət almaq.

SƏNƏ

SAXLAYACAM ƏKSİNİ

Sən yoxsan,

heç olmayacaqsan,

sənin əksin qalıb

gözlərimdə.

Başqa heç nəyin,

Səni görmək üçün

Hər gün gözlərimi

Güzgüyə dikirəm

Səndən bir işartı

tapmaq üçün.

Üstünü toz basmış

şəkil kimi,

hər gün gözlərimi

silirəm,

gözlərimdən əksini

sənə saxlayacam,

sən yoxsan deyə.

Qalib Şəfahət

Ədalət.- 2010.- 14 may.- S. 7.