"BİR ÖMÜR BAYATISI"

"Nurlan" nəşriyyatında işıq üzü görmüş bu şeirlər və poemalar kitabının müəllifi Mübariz Məsimoğludur. Yəqin ki, dəyərli oxucular bu imzanı yaxşı tanıyırlar. Özünəməxsus yaradıcılıq üslubu olan Mübariz yaşıdları arasında öz dəsti xətti ilə seçilməklə yanaşı, həm də mövzu rəngarəngliyinə görə də fərqlənir.

Bir neçə kitab müəllifi olan Mübarizin bu kitabının redaktoru dəyərli professorumuz, doktor Nizami Cəfərovdur. Nəfis şəkildə tərtib edilmiş kitabdakı şeir və poemalar ilk baxışdan bir-birini tamamlamaq və bir-birini davam etdirmək anlamı yaradır. Oxucuya elə gəlir ki, 195 səhifəlik bu kitab bir şeirin, bir pomenanın bütünlüyüdür. Təbii ki, bu da şairin müxtəlif mövzulara eyni sevgi və diqqətlə yanaşmasının nəticəsidir. Mübariz yazır:

Dərgahına varıb yandım

Dandığımı qanıb dandım

Nə taxta, taca inandım

Nə lələ, gülə aldandım.

... Şəhərlər sığdı kəndimə

Toy tutdu suyum bəndimə

Şübhə qalmadı zəndimə

Mən ayrı cür aldandım

Və yaxud:

Yarın cəfaları getmədi hədər

Eşqimə daha da can verdi kədər

Bu şair qəlbimi ölənə qədər

Hifs elə, ilahi, özün sinəmdə.

... Bağrına basacaq obam elini

Düzlər uyudacaq dağın selini

Bəndəndən üzməyib Tanrı əlini,

Tanrını dərk edə

bilməyir bəndə.

Mübarizin şeirlərində fikir yükü həm anlaşıqlı, həm də düşündürücüdür. Elə onun poemalarında da həmin reallığın şahidi olmaq mümkündür. Oxuduqca, şeirdən-şeirə üz tutduqca özün üçün nəsə öyrənib, nəsə tapırsan. Deməli, vaxtını sərf etdiyin üçün sevinə bilərsən. Çünki bu şeirlər, bu misralar səndə sabaha, söz dünyasına bir yeni ovqat yaradır, bir işıq ucu olur.

Mübarizin şeirlərindən biri "Dəli" kimi adlanır. Mən bu şeiri oxuyanda düşündüm ki, onun şeirlərinin və duyğularının yəqin ki, özünə bəlli dəlilləri var və bu şeir çələngi də onlara yeni bir hədiyyədir. Həmin şeirdə deyilir:

Gündüzlər səninləyəm,

gecələr xəyalınla

Sənsən daha həyatım,

sənsən daha taleyim.

Həm ahəngdir, həm rəngdir,

hər an halım halınla

Halın sənə əyandır,

ayrı sənə nə deyim.

Bəli, mənə elə gəlir ki, Mübarizin bu kitabını oxuyanlara ayrı heç nə deməyə ehtiyac yoxdur. Özləri oxuyub qiymətini verəcəklər.

Əbülfət MƏDƏTOĞLU

Ədalət.- 2010.- 6 noyabr.- S. 18.