ZEMFİRA VERDİYEVA HAQQA QOVUŞDU

Azərbaycan filologiya elminə ağır itki üz verdi. Görkəmli alim filologiya elmləri doktoru, professor, EA-nın müxbir üzvü Zemfira Nadir qızı Verdiyeva vəfat etmişdi.

1935-ci il noyabr ayının 19-da dünyaya gələn Zemfira xanım german dilləri üzrə ilk elmlər doktoru olmuş, elmi uğurlara imza atmışdır. Məhz qazandığı elmi nailiyyətlər dövlətimiz tərəfindən xüsusi mükafatlandırılmış və onu 1973-cü ildə Xarici Dillər İnstitutuna rektor təyin edilmişdir. 1995-ci ilə qədər bu böyük elmi müəssisəyə rəhbərlik edən Zemfira xanım 200-dən artıq elmi işin müəllifi olmuş, həmçinin onun rəhbərliyi altında 8 elmlər doktoru, 15 elmlər namizədi yetişmişdir.

Dünyanın bir çox ölkələrində, o cümlədən İngiltərə, Fransa, ABŞ, İspaniya, Hindistan, Çin, Meksika və digər məmləkətlərində çoxlu sayda məruzələrlə çıxışlar edən Zemfira xanım elmi konfranslarda böyük uğurlar qazanmışdı. Ömrünün son illərinə kimi o, 70 min nəfərdən çox üzvü olan Azərbaycan Qadınlar Cəmiyyətinin sədri kimi fəaliyyət göstərirdi.

Mənalı ömür yaşamış Zemfira xanım Verdiyevanın xatirəsi xalqımızın və bütövlükdə onu tanıyan hər kəsin qəlbində əbədi yaşayacaq.

Allah rəhmət eləsin!

Ədalət.- 2010.- 9 noyabr.- S. 8.