XANIMIN BƏYİNİ TƏRİFLƏMƏKDƏN GÖZƏL DÜNYADA NƏ VAR...

Adətən biz öz doğmalarımız haqqında xüsusi ilə qadın söz adamları öz həyat yoldaşları, ailə üzvləri ilə bağlı hər hansı bir yazını qələmə alanda müəyyən mentalları nəzərə alır. Amma şükürlər olsun ki, son vaxtlar həmin o mental sıxıntılar nisbətən aradan qalxır.

Necə deyərlər daha xatirələr yox, həm də düşüncələr, duyğular, hisslər, yaşanan anlar, ünvan sahibinin sağlığında həyatda olduğu anlarda yazıya köçürülüb kitab halında oxuculara təqdim edilir. Bu mənada Azərbaycan xalqının dəyərli ziyalısı, tanınan və sevilən şairi, dramaturqu, ictimai xadimi Vaqif Səmədoğlu barəsində "Şair və zaman" kitabı nəfis şəkildə oxuculara təqdim edilib.

Kitabın tərtibçisi, redaktoru və ön sözünün müəllifi Vaqif Səmədoğlunun həyat yoldaşı Nüşabə Babayevə-Vəkilovadır. Nüşabə xanım kitabın ön sözünü bu cümlələrlə başlayır. "İlk dəfə Vaqif Vəkilov imzası mənim yaddaşıma 60-cı illərin sonlarında yazıldı. "Molodyoj Azerbacana" qəzetində bir neçə gənc yazarla birgə Vaqifin də 3 şeiri dərc edilmişdi. O şeirləri oxuyub, hansı hissləri keçirdiyim yadımda deyil". Bu səmimi fikirlərin ardınca Nüşabə xanım onu da xatırladır ki, "Vaqifin 70 illik yubileyi ərəfəsində özü və yaradıcılığı haqqında olan yaradıcılığı, özünün yazdığı məqalələri toplayıb kitab hazırlamaq qərarına gəldim. Onun arxivini saf-çürük etdim".

Bəli, indi həmin o kitab bizim stolumuzun üstündədir. Vaqif Səmədoğlu barəsində yazılmış səmimi fikirlər, eləcə də onun özünün yazıları. Atası barəsində, ailə üzvləri ilə bağlı, həmçinin ölkə və xarici mətbuat səhifələrində çap olunmuş fikirləri, müsahiblərindən parçalar, bir sözlə Vaqif Səmədoğlunu təqdim edən, tanıdan bu orijinal kitab həqiqətən də dəyərli bir bədii nümunədir. Çünki toplum halında burda Azərbaycanın çox dəyərli ictimai xadimləri, siyasi liderləri, şair və publisistləri, yazıçıları, eləcə də digər sənəd sahəsinin nümunələri xüsusi ilə ölkə hüdudlarından kənarda Vaqif Səmədoğlu yaradıcılığına böyük sevgilərini dilə gətirən insanların fikirləri oxucunu özünə çəkir, onda bir qürur hissi yaradır.

Kitabdakı fotolar, həmçinin Vaqif Səmədoğluna ithaf olunmuş şeirlər bu kitabın mahiyyətini bir az da artırır, onun dəyərli olmasını bir az da diqqətə çatdırır. Mənə elə gəlir ki, bu kitab həm də Vaqif Səmədoğlu yaradıcılığını öyrənmək üçün dəyərli bir mənbədi.

Sonda onu da xatırladım ki, Nüşabə Babayeva-Vəkilovanın "Şair və zaman" adı altında tərtib etdiyi bu kitab şairin bütün zamanlarda yaşayacağına dair bir xanım inamı, bir oxucu etirafı, bir ziyalı güvəncidir. Biz də bu inama, bu etirafa, bu güvəncə şərikik.

Əbülfət MƏDƏTOĞLU

Ədalət.- 2010.- 13 noyabr.- S. 18.