Rəşid Behbudovun yaradıcılığına həsr edilmiş ilk elmi araşdırma

Füsunkar səsin sahibi Rəşid Behbudov Caz Mərkəzində anıldı. Musiqişünaslar, mədəniyyət və ictimaiyyət xadimlərinin bura toplanmasının səbəbi Azərbaycanın musiqi mədəniyyəti tarixində parlaq səhifə açan Rəşid Behbudovun yaradıcılığına həsr edilmiş elmi araşdırmanı müzakirə etməkdir. "Rəşid Behbudovun ifaçılıq üslubu milli və klassik vokal ənənənələrinin sintezi konteksində" adlı dissertasiyada məşhur sənətkarın vokal imkanlarından söhbət açılır.

Musiqişünas Məryəm Babayeva bu dissertasiyanın 2006-cı ildən təsdiq olunduğunu bildirib: "Elmi işim 4 ilə başa gəlib. Dissertasiya Rəşid Behbudovun ifaçılıq üslubuna həsr edilib. Ümumiyyətlə, Rəşid Behbudovun yaradıcılığı o qədər zəngindir ki, ona 1 yox, bir necə dissertasiya yarada bilərik. Elmi işimdə onun ifaçılıq üslubundan, konkret olaraq akademik vokal, estrada və əlbəttə xanəndəlik ifaçılığından bəhs etmişəm".

Öz işini elmi yenilik kimi qiymətləndirən müəllif deyir ki, bu, Rəşid Behbudov yaradıcılığının və orijinal ifaçılıq üslubünun öyrənilməsində ilk xüsusi tədqiqatdır. Burada ilk dəfə Rəşid Behbudovun ifası milli və klassik ənənələr konteksində tədqiq edilir. Konfrans iştirakçıları elmi araşdırmanın vokal sənətinin tədrisi sahəsində də təcrübi əhəmiyyət kəsb etdiyini vurğuladı.

Rəşid Behbudovun həyat yoldaşı Ceyran Behbudova bu yolda atılan ilk addımların çox parlaq olacağını deyir: "Böyük fenomen Rəşid Behbudov haqqında yazılan bu dissertasiya elmi tərəfdən bizim üçün çox böyük sirlər açacaq".

Xalq artisti Fərhad Bədəlbəyli bu günə qədər niyə belə bir namizədlik, doktorluq müdafiə olunmadığına təəccübləndiyini qeyd edib: "Rəşid Behbudov bir dəryadır. Onun haqqında nəinki bir, 10-15 müdafiə olmalıdır. Onun teatr, estrada, opera teatrının xüsusi ilə kino sahəsində hər sahədə izi var. O həqiqətən böyük bir insan idi. Xoşbəxtəm ki, uşaqlıqdan onu tanımışam".

Xatırladaq ki, bu il görkəmli sənətkar Rəşid Behbudovun anadan olmasının 95 illiyidir. Sənətkarın yubileyi dekabr ayında müxtəlif tədbirlərlə qeyd olunacaq.

Ədalət.- 2010.- 13 noyabr.- S. 24.