SƏNƏTKAR

Yanıqlı - yanıqlı vurub zəngulə,

Verdi təravəti, Sona bülbülə.

Atdı qarmaqdakı balığı gölə,

Vətənin nisgilli sənətkar oğlu.

Sellər aparanda nakam Saranı,

Gəzdi Xançobanı, bəxti qaranı.

Üşütdü səsinin qarı, boranı,

Hamını, xalqımın fədakar oğlu.

"Neçin gəlməz" deyib haray qopardı,

Bizi həsrət dolu ilə apardı.

Vətənin torpağın, daşın öpərdi,

Ağdamsız, Ağdamın yadigar oğlu.

YADIMA SALDI

Eləki dinlədim "ana" laylası,

Başıma qaldırdım qəm piyaləsin.

Əzablı günlərin ahın, naləsin,

Yanıqlı-yanıqlı yadıma saldı.

Nədənsə kədərlə verdi baş-başa,

Köklədi simləri dərdlə savaşa.

Elə xallar vurdu o baş-bu başa,

Simi də özünü oduna saldı.

Gəzdi barmaqları pərdələr üstdə,

Can verdi "Segah"a, "Zabul"a, "Rast"a...

Ömrünün mənası yeganə dostu,

Qərib gitaranı toruna saldı.

Məmməd Mərzili

Ədalət.- 2010.- 24 noyabr.- S. 7.