Qarabağım!

Qarabağım!

Qara baxtlım,

Qan ağlayar

Qara bağrım!

Ey Türk oğlu,

Gərək ki, sən,

Türklüyünlə öyünəsən!

Qalxan olub, qılınc olub,

Qarabağda döyünəsən!

Azərbaycan! Söylə mənə,

Qarabağsız, axı, nəsən?!

Düşməninin al canını,

Al canını düşmənindən!

Qarabağsız nə mən, nə sən

Yaşamağa haqqımız yox,

Var olmağa haqqımız yox!

Qarabağım!

Qara baxtlım,

Dəfələrlə qana batdın.

Qarabağım!

Bu səhər mən

Kadrlarda qara baxdım

Xocalıda yağan qara.

Üzərində qan qoxulu güllər açmış,

Yazıq-yazıq baxan qara.

Bu səhər mən

Tariximi vərəqlədim,

Nə padşahlar, nə xanlıqlar

Görmüşük biz.

Qayçılayıb, bu torpağı,

Dəfələrlə bölmüşük biz.

Unudaraq günümüzü,

Düşməni dost görmüşük biz.

İndi Təbriz küsüb bizdən,

Zəngəzurun səsi gəlmir.

Əllərini üzüb bizdən,

Bu qismətlə barışıblar.

Azərbaycan!

Heç olmasa,

Qarabağı unutma sən!

Bəhruz NİFTƏLİYEV

Ədalət.- 2010.- 26 noyabr.- S. 6.