MƏTBUAT FƏDAİSİ

1991-ci il oktyabr ayının adi günlərindən biri idi. Tanınmış yazıçı, Əməkdar İncəsənət Xadimi Məmmədhüseyn Əliyevin iş otağında "Şəfəq" jurnalının növbəti sayının materiallarını hazırlayırdıq. Məmmədhüseyn müəllim şair Vahid Əzizlə qısa telefon danışığından sonra masanın üstündəki nəsr əsərlərindən birini götürüb mənə təqdim etdi.

- Satirik hekayədir - dedi. - Bax, gör necədir, jurnalın tələblərinə cavab verir, ya yox. Məncə zəif olmamalıdır. Müəlliflə uzun illər yerli radio verilişləri redaksiyasında çalışmışam, qələminə bələdəm.

Tanış imza idi: Azad Zülaloğlu. Yazılarını yerli və respublika mətbuatında oxumuşdum. Şəxsi tanışlığımızdan sonra onun jurnalistikaya olan möhkəm bağlılığını, həmçinin yaxşı dost, gözəl bir insan olduğunu yəqin etdim.

A.Zülaloğlu 1945-ci ildə Lənkəran rayonunun Boladi kəndidə anadan olmuşdur. Onda jurnalistikaya olan maraq orta məktəb illərindən yaranmışdır. Təsadüfi deyildir ki, həmin illərdə təhsil aldığı sinif divar qəzetinin redaktorluğu məhz ona tapşırılmışdır. Sonradan A.Zülaloğlu qələmini Lənkərandan çıxan "Leninçi" qəzetində sınadı. Müxtəlif sahələrdən yazdığı məqalələri ilə tez bir zaman kəsiyində redaksiya əməkdaşlarının diqqətini cəlb etdi, redaktor tərəfindən tez-tez tapşırıqlar aldı.

Azad Zülaloğlu 1977-ci ildə Azərbaycan Jurnalist Sənətkarlığı İnstitutunu bitirmişdir. 1980-ci ildə Lənkəran radio verilişləri redaksiyasına müxbir kimi təyinat almış, sonralar redaktor vəzifəsinə irəli çəkilmişdir. Sovetlər dönəmində SSRİ Jurnalistlər İttifaqının üzvü seçilmişdir. Hazırda Azərbaycan Jurnalistlər Birliyinin üzvüdür. Maraqlıdır ki, indiyə kimi onun 78-adda qəzet və jurnallarda 2 mindən çox zarisovka, oçerk, məqalə, reportajları dərc olunmuşdur.

Lənkəranda fəaliyyət göstərən jurnalistlər A.Zülaloğlunu həm də "canlı arxiv" adlandırırlar. Bu zarafatyana söylənsə də əslində həqiqətdir. Sovet dönəmində respublikamızda nəşr olunan qəzet-jurnalların bütün saylarını onun arxivində tapmaq mumkündür. Elə mən özüm bu arxivə müraciət etməklə ötən əsrin 80-cı illərində çap olunan bir neçə hekayəmi əldə edə bilmişəm.

A.Zülaloğlu bədii yaradıcılıqla da məşğul olur. Onun hekayə, miniatür və lətifələri "Ədəbiyyat", "Lənkəran", "Prizma", "Aşkarlıq", "Tək səbir", "Mozlan" qəzetlərində, "Kirpi", "Molla Nəsrəddin XXI əsrdə", "Söz", "Şəfəq", "Məşəl" jurnallarında çap edilmişdir. 2007-ci ildə "Kirpi" jurnalının elan etdiyi "Ən yaxşı yumor" müsabiqəsinin qalibi olmuşdur. Yumoristik hekayələri bir neçə dəfə dövlət radio və televiziyasında səsləndirilmişdir. O, 2005-ci ildə anadan olmasnın 60 illiyi münasibəti ilə Həsən Bəy Zərdabi mükafatına, eləcə də Azərbaycan Dövlət Televizya və Radio Verlişləri şirkətinin rəhbərliyi tərəfindən diplom və pul mükafatına layiq görülmüşdür.

Yaxın günlərdə A.Zülaloğlunun 65 yaşı tamam oldu. O həmişəki kimi yorlumadan, əsl gənclik həvəsi ilə jurnalistik fəaliyyətini davam etdirir. Biz də həmkarımızı yubiley münasibəti ilə təbrik edir, ona yeni-yeni yaradıcılıq uğurları arzulayırıq.

Qardaşxan Fərzi

Ədalət.- 2010.- 6 oktyabr.- S. 6.