Vahid Qazinin "Ruhlar şəhəri" kitabı nəşr olundu

Publisist Vahid Qazinin "Ruhlar şəhəri" kitabı 17 ildir işğal altında qalan Ağdama həsr olunub. Kitaba müəllifin 15 essesi, Ramiz Rövşənin "Mümkünsüz qayıdışın əzabı" adlı ön sözü və ABŞ-ın Corciya Dövlət universitetinin professoru Rafiq Əliyevin "Qiyamətə qalmış 4 dəqiqə" adlı son sözü daxildir.

Ağdam xatirələrindən ibarət "Ruhlar şəhəri" silsiləsi bu il "Lent.az", "Media forum" saytlarında, "525-ci qəzet"də dərc olunub. Müəllif kitabı oxucuya bu sözlərlə təqdim edir: "WebUrbanist.com internet nəşri Ağdamı turistlər arasında maraq doğuran "24 ruhlar şəhəri" siyahısına salıb. Səni ora aparacam, xatirələrimin yurdundan, yurdumun xatirələrindən danışacam. Sən bu şəhəri bəzən 5 yaşlı körpənin heyrəti, bəzən 10 yaşlı uşağın marağı, bəzən də 15 yaşlı yeniyetmənin hissləriylə duyacaqsan. Onu bir uşağın hələ kirlənməyən dünyasından keçib görəcəksən. İndi sakini sərgərdan ruhlar olan bir şəhərə - mənim şəhərimə səyahətə gedirsənsə, yanıma gəl, qolundan tutum, birlikdə gedək..."

1968-ci ildə Ağdamda doğulmuş Vahid Qazi Bakı Dövlət Universitetinin jurnalistika fakültəsini bitirib. "Ədalət", "Azərbaycan" qəzetlərində, Prezident Administrasiyasında çalışıb. "III Sektor", "Svobodnaya volya" jurnallarının naşiri olub. "Ruhlar şəhəri" aparıcı nəşrlərdə publisistik yazılarla çıxış edən Vahid Qazinin ilk kitabıdır.

"Ruhlar şəhəri" kitabını Bakının kitab mağazalarından və metropolitenin satış köşklərindən əldə etmək olar. Əlaqə telefonları: (99412) 492 03 56, (99455) 518 43 00.

Ədalət.- 2010.- 12 oktyabr.- S. 6.