"HƏLƏ Kİ, YAZ ÜMİDİM VAR..."

Qarşımda nəfis şəkildə təltif edilmiş və ilk baxışdan diqqətiçəkən bir kitab var. Bu kitabın müəllifi Dəmir Çeşməlidi. Təbii ki, bu imza və imzanın arxasında dayanan sözün sahibi öz qələminə, öz ürəyinə güvənən, oxucu ilə danışmağa sözü olan bir şairdi. Həmin şair təkcə misralarında deyil, həm də dost-tanışla, əhatəsində olan adamlarla söhbətlərində birmənalı olaraq vurğulayır ki, o yalnız ürəyinin pıçıltılarını, onu narahat edən duyğuları kağıza köçürür. Bu onun üçün bir növ sözə, sözü onun qəlbinə salana xidmətdir.

Dəmir Çeşməliyə görə şairlik son dərəcə ağır və son dərəcə də məsuliyyətli bir işdi. Onun yükü altına hər kəs çiynini verə bilməz və hər yazı yazan, misra qaralayan şair sayıla bilməz. Sadəcə, ürəyi boşaltmaq, kağız-qələmlə həmsöhbət olmaq hərdən adamın ürəyindən gəlib keçir. Ürəkdən gəlib keçənlər də bəzən sənin xəbərin olmadan şeir misralarına çevrilir. Elə onun kitabında olduğu kimi:

Zirvə sənindi, arzu sənindi

A qartal balası, qartal balası

Çəmənlik yad deyil, öz çəmənindi.

A qartal balası, qartal balası

Və yaxud da:

Əhdə möhtac oldum, dəyişməz andım.

Özümə güvəndim, yada talandım

Zirvədə qar idi, oda qalandım

Külli-aləm od tutar közümdən mənim.

Dəmir Çeşməli oxuculara təqdim etdiyi kitabında demək olar ki, son dərəcə səmimi və isti duyğularını qələmə alıb və bu misraların arxasında şairlik iddiası yox, səmimi bir insanın, sözə tapınan bir adamın obrazını görmək olur. Mən bu kitabla tanış olanda həmin o səmimiyyətin, o daxili pıçıltıların bütün mənzərəsini özüm üçün kəşf edə bildim. Bütünlüklə anladım ki, böyük iddialarda olmadan ən səmimi fikirləri söyləmək mümkündür. Necə ki, Dəmir Çeşməli söyləyir:

Baxışın atəşdi, oddu canımda

Hey yandırıb-yaxar, qınama məni

Əl tutar dərdimə, dərddi qanımda

Dönüb asta baxar, qınama məni.

"Gənclik" nəşriyyatında işıq üzü görmüş bu kitab Dəmir Çeşməli sözünə, poeziyasına, səmimiyyətinə üz tutan hər kəs üçün çox maraqlı bir hədiyyədir və ən maraqlısı odur ki, müəllif bu kitabı özünün orta məktəb illərində dostluq etdiyi, bir sinifdə oxuduğu uşaqlara ithaf edibdi.

Əbülfət Mədətoğlu

Ədalət.- 2010.- 23 oktyabr.- S. 19.