Bakıda elmi-praktik konfrans keçirilir

Dünən Bakıda Azərbaycan İqtisadi İnkişaf Nazirliyinin təşkilatçılığı ilə "Azərbaycan regionlarının investisiya potensialı: nailiyyətlər və perspektivlər" mövzusunda elmi-praktik konfrans keçirilib.

"APA-Economics"in məlumatına görə, tədbirdə çıxış edən iqtisadi inkişaf nazirinin müavini Niyazi Səfərov qeyd edib ki, son illər ərzində Azərbaycanda regionların inkişafı ilə bağlı bir sıra işlər görülür, bilavasitə regionların inkişafına dair dövlət proqramları icra olunur: "Davamlı inkişafın təmin edilməsi, rəqabət qabiliyyətinin yaradılması, ixrac yönümlü iqtisadiyyatın regionlarda təmin olunması prioritet istiqamətlərdəndir".

Regionlarda davamlı inkişafa dair aparılan işlərdən danışan N.Səfərov onu da bildirib ki, hazırda sahibkarlıq subyektlərinin investisiya layihələri dövlət tərəfindən dəstəklənir və lazımi yardım göstərilir: "Bir sıra mənbələr tərəfindən maliyyələşdirilən bu layihələr həmçinin dövlət büdcəsindən maliyyələşir".

Tədbirdə çıxış edən Azərbaycan Milli Elmlər Akademiyasının birinci vitse-prezidenti Arif Həşimov ölkə regionlarında texnoparkların yaradılmasının əhəmiyyəti və vacibliyindən danışıb.

Öz növbəsində rabitə və informasiya texnologiyaları nazirinin müavini İltimas Məmmədov hazırda ölkə regionlarında optik xətlə təchiz olduğunu bildirib və qeyd edib ki, bu il ərzində Azərbaycan bölgələrində 200 km optik kabel çəkilib, ölkənin ucqar kəndləri ilə rayon və şəhər mərkəzləri arasında əlaqə yaradılıb: "Eyni zamanda uzun illər blokada şəraitində olan Naxçıvan Muxtar Respublikasında İran vasitəsilə, həmçinin Gürcüstan-Türkiyə ərazisi ilə rabitə xidmətləri təmin olunub".

"Azərpoçt" MMC-nin ölkə rayonlarında fəaliyyətindən danışan İ.Məmmədov onu da qeyd edib ki, artıq müəssisə regionlarda da bank-maliyyə xidmətləri göstərir.

Tədbirdə çıxış edən kənd təsərrüfatı nazirinin müavini Bəhram Əliyev Azərbaycanın iqtisadi inkişafından danışıb və qeyd edib ki, bu ilin ilk doqquz ayı ərzində ölkədə istehsal olunan ÜDM 4,1% artıb: "Hazırda ölkənin valyuta ehtiyatları 28 mlrd. ABŞ dolları təşkil edir. Azərbaycan iqtisadiyyatına indiyədək yatırılan investisiyanın həcmi 60 mlrd. dollar təşkil edir ki, bunun da 50%-dən çoxu xarici investisiyalardır".

Nazir müavini onu da bildirib ki, 2010-cu ilin yanvar-sentyabr ayları ərzində Azərbaycanda 56 min yeni daimi iş yeri açılıb, 2003-cü ildən indiyədək isə yeni açılmış iş yerlərinin sayı 900 min təşkil edir.

Sahibkarlığa Kömək Milli Fondunun fəaliyyətindən danışan B.Əliyev həmçinin qeyd edib ki, cari ilin əvvəlindən Fond tərəfindən 1 016 sahibkarlıq subyektinə 81 mln. manat məbləğində güzəştli kreditlər verilib.

Tədbirdə çıxış edən sənaye və energetika nazirinin müavini Natiq Abbasov hazırda regionların investisiya potensialının artdığını, sahibkarlığın inkişafına kompleks dövlət dəstəyi tədbirlərinin həyata keçirildiyini, dövlət proqramlarının uğurla icra olunduğunu, regionlarda infrastruktur, sosial-mədəni, istehsal və emal obyektlərinin yaradıldığını, regionların inkişafında sahibkarlığın rolunun artığını bildirib.

Ədalət.- 2010.- 23 oktyabr.- S. 22.