SALAM OLSUN HÜNƏRİNƏ

...Salam olsun hünərinə,

Əziz, mübarəkdi adın...

Qəlbimizdə yurd uğrunda

Savaş tonqalı qaladın...

Şah İsmayıl agah oldu,

Gördü vuran qol o qoldu...

Ruhuyla qəlbinə doldu

Koroğlu adlı ustadın!

Şəhidlik ilahi əta,

Verildi sənə xoş büta...

İldırımdı əkən ata,

Oddu səni doğan qadın...

II

Çək qılıncı, vur bu başı,

Oyansın Babək ağrısı.

Babaların ruh sirdaşı,

Bəxtin mübarək ağrısı.

Doğra canı kəsim-kəsim,

Kəsən əlin titrəməsin,

Dili gödək eləməsin

Bir tikə çörək ağrısı.

Dərd içində karıxsan da,

Dörd yandan yağı sıxsa da,

Adamın canı çıxsa da

Vuruşa gərək ağrısı...

III

Qarabağ mövzusu çörək ağacı,

Hamının əlində qələm görürəm.

Bu qəmi etiraf eləmək acı,

Baş yox, çiyinlərdə kələm

görürəm.

Bu kəndir quyuda

haçan doğranıb?

Bu sirri ağardan,

açan doğranıb.

Erməni döşündən qaçan oğlanı

Bakının üstünə gələn görürəm.

IV

Bu xəcillik bizi yaman bizləyirdi,

Çeviribən dizim-dizim dizləyirdi.

Hərb meydanı ərən yolu

gözləyirdi –

Hünərinlə bu meydana

"Salam!" dedin.

Şahə qalxdı inam atın,

möhkəm durdun,

Yağıları od qarsıdı,

şimşək vurdu.

Salamladı hünərini Oğuz yurdu,

Türk dünyası bir ağızdan

"Balam!" dedi.

Hərəkətə gəldi o gün

damarda qan,

Həmin gündən bu milləti

bir yumruq san!

Türk ruhuna sahib çıxan

hər bir insane

Gərək sənin qisasını alam, - dedi.

V

Mən bilirəm qəlbin

nədən qübarlıydı,

Mən bilirəm içindəki

hikkə nəydi...

Arxasının dil verəni olmasaydı

Ermənilər dil açmağa

nə karəydi?!

Dovşan kimi qaçasıydı

"kiş" deməmiş,

Nə karəydi Qarabağa

mənim desin.

Sən bilirdin sipər olmaq

gərəkdi ki,

Ayaq tutan bu yalanlar

yeriməsin.

Əzəl gündən haqq olubdu

yolu türkün,

Haqq uğrunda bükülməyib

qolu türkün,

Sənin kimi oğullarla ulu Türkün

Qisasını uca Tanrım görk eləsin!

Sərvaz Hüseynoğlu

Ədalət.- 2010.- 23 oktyabr.- S. 21.