Mərakeşdə Azərbaycan Mədəniyyəti günləri keçirilir

Dünən Mərakeşin paytaxtı Rabatda Azərbaycan Mədəniyyəti günlərinin rəsmi açılış mərasimi keçirilib. Mərakeşdə səfərdə olan əməkdaşının məlumatına görə, açılış mərasimi Rabatın mərkəzi mədəniyyət sarayında baş tutub. Mədəniyyət sarayının foyesində Azərbaycan rəssamı Fərid Xayrullinin ölkəmizin təbiətini, tarixi yerlərini, mədəniyyət abidələrini əks etdirən fotolardan ibarət sərgisi təşkil olunub.

Mərasimə gələnlər sərgini maraqla qarşılayıblar. Tədbirdə Mərakeş parlamentinin sədri, baş nazirin müavini, Azərbaycanın Rabatdakı səfiri və səfirliyinin əməkdaşları, Mərakeşin mədəniyyət xadimləri, ictimaiyyət nümayəndələri iştirak ediblər.

Mərakeş və Azərbaycanın mədəniyyət nazirlərinin müavinləri Məhəmməd Kavadir və Ədalət Vəliyev mərasımdə açılış nitqi ilə çıxış edib, bu cür tədbirlərin iki ölkə arasında münasibətlərin inkişafında mühüm rol oynadığını vurğulayıblar.

Daha sonra bədii hissə başlayıb. Tədbirə gələnlər dirijor Ağaverdi Paşayevin rəhbərliyi ilə Dövlət Xalq Çalğı Alətləri Orkestri, Azərbaycan Dövlət Mahnı və Rəqs Ansamblının rəqs qrupunun ifasında maraqlı konsert proqramı izləyiblər. Solistlərdən xanəndələr Qoçaq Əsgərov, Güllü Muradova, vokalçılar Ramil Qasımov, İnarə Babayeva, pianoçu Yeganə Axundova, skripkaçı Səlim Abbasovun ifası alqışlarla qarşılanıb.

Qeyd edək ki, mədəniyyət günləri oktyabrın 30-dək davam edəcək. Azərbaycan sənətçiləri Kasablanka, Fəs, Meknes şəhərlərində də konsert verəcəklər.

Ədalət.- 2010.- 29 oktyabr.- S. 8.