OZAN ƏFƏNDİM

Dad sənin əlindən, a qanlı fələk,

Qardaşı qardaşa düşmən elədin.

(Bu sözləri bilməm Səbri Şimşəkoğlununmu, Murat Çobanoğlununmu səsindən, oxumasından eşitdim. Oxuyanı unutdum, amma sözləri unuda bilmədim).

Qardaş da qardaşa düşmən olurmu

Əfəndi ozanım, ozan əfəndim.

Bir zaman gəlir də peşman olurmu

Bu qara yazıya yazan, əfəndim.

Sirrimi verməyə sirdaş aradım,

Qardaşım yanınmda qardaş aradım,

Bulmadım başıma bir daş aradım,

Nə yapsın yolunu azan, əfəndim.

Alovlar içində ömür sürüşəm,

Yerdən kipriyimlə od götürmüşəm.

İçimi göynədən bir duş görmüşəm

Bulunmaz duşumu yozan, əfəndim.

Yolları qapalı bir baca dünya,

Sorğusu cavabsız bulmaca dünya,

Çarxı pozulası bu qoca dünya

Əzəldən qaynayan qazan, əfəndim.

Həsrətim canımı üzəcək bir gün,

Elm Abbas deyib gəzəcək bir gün.

İnşallah yenidən düzəcək bir gün

Bizim səfimizi pozan, əfəndim.

BAYBURTA XİTAB

Yollar keçib uzun-uzun gəldim sana,

Vətən məhzun, mən də məhzun gəldim sana,

Mənə həmdəm oğlun, qızın gəldim sana,

Çal qopuzu, qəhrəmanlıq marşı oxut,

Uyuyanı, oyandırsın səsin, Bayburt.

Qarabağda bülbüllərim ötməz olub,

Millətimin çilələri bitməz olub,

Türk əsgəri, Türk yurduna getməz olub,

Vətən olsa dosta məzar, düşmənə yurt,

De sən nəsin, de sən nəsin, nəsən, Bayburt.

Türk ulusu əsir olmaz demiş Öndər,

Əsir Türkü qurtarmağa Türkü göndər,

İnam göndər, iman göndər, ülkü göndər,

Soydaşıyın, qardaşıyın əlindən tut,

Görənlər də bərəkallah desin, Bayburt.

Bir qardaşın bir qardaşa elçisi mən,

Bir torpağın yaralanmış bəkçisi mən,

Millətimin susdurulmuş haqq səsi mən,

Nədən susur bu dağlarda nədən Bozqurt?

Bu soruya bir cavab ver kəsin, Bayburt.

Hacaloğlu ozan Abbas Abdullahım,

Zəfər günü açılacaq hür sabahım,

Göstər bizə o günləri, ey Allahım,

Boy boylasın, soy soylasın Dədəm Qorqud

Qarabağın şöləninə getsin Bayburt.

İSTANBULDAN VAQİF SƏMƏDOĞLUNA MƏKTUBLAR

Bir gün İstanbulda Vaqif Səmədoğlunun "Mən burdayam, ilahi" kitabını gətirdilər mənə. Kitabda səmimi bir avtoqraf vardı. Avtoqrafda deyilir: "Dostum, qardaşım, şairim, eloğlum Abbas Abdullaya dərin hörmət və sönməz, tükənməz məhəbbətlə Vaqif Səmədoğlu 7. XI.1996 Bakı"

Bu anda,

İstanbulda

Gecə saat ikidi,

Bakıda sabah saat dörd,

Uyqum ərşə çəkilib,

Dərd əskidi,

Əskidi dərd –

Bakıda səni uyutmaz

İstanbulda məni.

Tanrı yenməz deyiblər –

Dərd yenməyəni.

Dərdə yenilməmək üçün

Həmdərd aradım,

"Mən burdayam" dedin.

Şeirlərini dinlədim,

Dərd üstünə dərd gəldi,

Gözlərim önünə

Gələni övən,

Gedəni söyən

Neçə-neçə namərd gəldi.

II

Səninlə savaşaraq

Keçirəcəm bu gecəni.

Allahı sevirsən

Unut olub-keçəni:

Lenin meydanını

Azadlıq meydanına

Çevirdiyimiz günləri unut,

"Ya azadlıq, ya ölüm"

Hayqıran könülləri unut,

20 yanvarda

Tankların üstünə

Daşla-kəsəklə gedənləri unut,

Bakının zülmət gecələrində

Özlərini məşəl edənləri unut,

Ağdamı,

Şuşanı,

Xankəndini,

Kəlbəcəri, Laçını, Zəngilanı,

Əskiparanı unut.

Bənzə çevrəndəki

Dosta-yoldaşa,

Onlar kimi yaşa.

Unut, unuda bilsən,

Yaşa, yaşaya bilsən.

III

Təpədən dırnağa

Dərd olan dostum,

Ürəyi pambıqdan yumşaq

Poladdan sərt olan dostum.

Bir zamanlar bir şeirimdə

- Yer üzündə məzarıma

Yer bulunmayacaq, - demişdim,

Göy üzündə -

Tanrının ovcu içində

Kömülmək istəmişdim.

Tanrı da üz çevirdi bizdən.

İndi Azərbaycanda mənə

Bir məzarlıq torpaq qoru,

Bir kəfənlik bayraq.

IV

Bir zamanlar

Gəzməyi çox sevərdin.

Dərbənddən Qazağa,

Bakıdan Şəkiyə,

Şəkidən Kələkiyə

Dolaşardın, gəzərdin.

İndi gəzməyə vaxt nerdə.

Ömür keçir növbələrdə.

Əppək növbəsi, su növbəsi,

Bir ömür alır hərəsi.

Sənin növbən əppək növbəsi deyil.

Sənin qovğan əppək qovğası deyil.

Qovğan başqa bir qovğa,

Növbən başqa bir növbə.

Boş vaxtın olsa belə

Nə Şəkiyə get,

Nə Kələkiyə,

Otur Bakıda

Növbəni bəkləyə-bəkləyə.

Növbəyə "quyruq" deyir

Anadolu Türkləri.

Bizlər də deyirik

Düşəndə yeri:

"Dünyanın quyruğu uzun".

Bu uzun quyruqda

Bitməsini bəkləyirik

Ömür yolumuzun.

Bu uzun quyruğun

Harasındasan, qardaşım, bilməm.

Növbən nə vaxt çatacaq.

Bu uzun quyruqda,

Özündən öndə

Mənə də bir yer bul ancaq.

V

Dəli olmaq istədi

Onsuz da dəli qardaş.

Dəli olmaq zor işdi,

Bunu bilməli qardaş.

Ömür atlı, o yaya,

Günləri saya-saya,

Baxır-baxır dünyaya

Ağlar, gülməli qardaş.

Gülmək istər güləməz,

Haqdan heç nə diləməz,

Ölmək istər öləməz,

Bir gün ölməli qardaş.

VI

Soyuducunun içində

Donanı gördünüz,

Yananı gördünüzmü heç.

Susuzluqdan

Cadar-cadar torpaq üstündə

Yürüyür

Qatar-qatar balıq adamlar.

Susuzluqdan

Cadar-cadar olmuş bu torpaq

Vətən torpağı –

Buz kimi soyuq.

İçi oyuq-oyuq buz dolabı - soyuducu,

Bu soyuducuda balıq adamlar.

Bu balıq adamlar arasında,

Bu soyuducuda.

Bir şair qəlbinin yarasında,

Gözlərinin qarasında

Alov-alov atəş.

Kəndi oduna yanar kəndi.

İsitmək üçün

Neçə-neçə köyü,

Neçə-neçə kəndi.

ABBAS ABDULLA

Ədalət.- 2010.- 9 yanvar.- S. 20.