Aran rayonumuz - SAATLI

Çoxdan yolumu salmadığım Saatlı rayonu başqa bölgələrimiz kimi simasını son vaxtlar xeyli dəyişib. Geniş və rahat küçələr, meydançalar, istirahət yerləri səliqəlidir. İnşa edilən yeni inzibati və fərdi binalar rayon mərkəzində xoş ovqat yaradır. 93 minə yaxın əhalisi olan rayonda tikinti-abadlıq işləri indi də davam etdirilir. Ulu Öndərin muzeyi və heykəli yerləşdiyi, rayon İcra Hakimiyyəti binasının qarşısındakı park yenidən qurulur. Müxtəlif təşkilatları, müxtəlif insanları birləşdirən bu tikinti meydançasında indi işlərin qızğın vaxtıdır.

Ancaq hər il olduğu kimi ötən il də rayonda tikinti-abadlıq işlərinə xeyli önəm verilmişdir. "Şəhidlər Xiyabanı"nda, H.Əliyev prospektində, Nəsimi küçəsində daş-hasar işləri zövqlə görülmüş və müasir görkəmə salınmışdır. H.Əliyev prospektinə, M.P.Vaqif, M.Əzizbəyov, Cavanşir, Nəsimi və başqa küçələrə 18400 kvadrat metr çınqıl örtük salınmış, küçələrə 32874 min kvadrat metr asfalt döşənmişdir. Saatlı şəhərindən Sarıcalar kəndinə qədər uzanan və "Qazanbatan yolu" adlanan ərazidə 10 kilometr keyfiyyətli asfalt çəkilmişdir. Saatlı-Muğanlı-Məzrəli yolunun yenidən qurulması üçün 1317,0 min manatlıq iş görülmüşdür.

Milli Təhlükəsizlik Nazirliyinin rayon şöbəsinin yeni inşa edilmiş inzibati binası, Saatlı rayon İcra Hakimiyyətinin təmir edilmiş inzibati binası, Varxan kənd ərazisində tikilmiş Seysmik stansiya 2010-cu ilin alın təridir. Yol kənarında, küçə və meydançalarda əkilmiş 61900 müxtəlif növ ağaclar da saatlılıların daha sağlam yaşamalarına, dincəlmələrinə hesablanmışdır.

Ötən yayın problemləri

2010-cu ilin mayında Kür və Araz çaylarında, Sarısu gölündə baş vermiş daşqınlar nəticəsində Saatlı rayonu da kifayət qədər maddi və mənəvi ziyan çəkmişdir. Fəlakətin daha iri miqyas almaması üçün rayon rəhbərliyi, idarə və təşkilatların müxtəlif texnikaların köməyi ilə insanlarla bir yerdə olmasına baxmayaraq bir sıra yaşayış məntəqələri - Novruzlu, Nərimankənd, Musalı kəndləri, Nərimankənd köçkün qəsəbəsi daşqına məruz qalmışdır. Bir sözlə, 1028 evdə yaşayan 5479 nəfər Saatlı sakini sel daşqınlarının yaratdığı çox ciddi problemlə üzləşməli olmuşlar. 5951,8 hektar əkin sahəsi, on minlərlə ağac, kənd təsərrüfatı sahələri, məişət və ev avadanlıqları su altında qalmışdır. Fəlakətin nəticələrini aradan qaldırmaq üçün Saatlı şəhərində yerləşən Fövqəladə Hallar Nazirliyinin qərargahı Azərbaycan Respublikası Nazirlər Kabinetinin 09 iyul 2010-cu il tarixli Sərəncamına əsasən ciddi işə başlamışdır.

Sakinlərə ümumilikdə 1050720 manat məbləğində kompensasiya ödənilmişdir. Ötən ilin avqust ayından isə bərpası mümkün olmayan evlərin tikintisinə başlanılmışdır. Yeni Novruzlu kəndində 178 evdən ibarət yeni qəsəbə salınmışdır. Dəlilər, Nərimankənd, Musalı kəndlərində isə bu işlər hələ də davam etdirilir.

Yeni Novruzlu kəndindəki yeni qəsəbənin açılışında iştirak və çıxış etmiş Prezident İlham Əliyev hər cür şəraiti olan bu yaşayış massivindəki uğurlu işlərdən razı qaldığını bildirmişdir.

Saatlı həm də kənd təsərrüfatı rayonudur

Heç şübhəsiz ki, haqqında danışdığımız təbii fəlakətin Saatlı rayonuna ciddi problemlər verməsinə baxmayaraq, insanların əli işdən soyumamışdır. 2010-cu ildə saatlılılar 7694 ton pambıq tədarük etmişlər. 55453 ton taxıl da ötən ilin göstəricisidir. Heyvandarlıq məhsullarında da artıma nail olunmuş, 6809 ton ət, 35700 ton süd istehsal edilmişdir. İndi Saatlıda iribuynuzlu mal-qaranın sayı 65550, xırdabuynuzluların sayı isə 92862 başdan çoxdur. Əvvəlki illərlə müqayisədə heyvandarlıq sahəsində xeyli artımın olması sakinlərin bu sahəyə marağından xəbər verir. 9703 təsərrüfat subyektinə bu sahəni inkişaf etdirmək üçün 1911869,60 manat vəsait ödənilmişdir. Pambıq toxumu istehsalçılarına 32226 manat, taxıl toxumu istehsalçılarına isə 146430 manat dövlət büdcəsi hesabına vəsait verilmişdir.

Saatlı rayonunda pambıqçılıq, taxılçılıq, heyvandarlıq sahələrindəki istehsalı genişləndirmək üçün meliorasiya işləri, sahibkarlığın inkişafı həmişə diqqət mərkəzində saxlanılır.

"Uğurlarımız bütün sahələrdə var"

Saatlı rayon Təhsil Şöbəsinin müdiri Şamil Nurəliyevin iş otağında görüşümüz isə zərurətdən doğdu. Çünki məktəblərdən birinə baş çəkmək üçün onun razılığı olmalı idi.

- Rayonda olmağını bilirdim. Bilirdim ki, həm də məktəblərlə maraqlanacaqsan.

Rayon təhsili haqqında qısa məlumatı mən verim, sonra istədiyin məktəbi özün seç! Təkcə ötən il dövlət vəsaiti hesabına Kamallı kəndində 180 nəfər şagird üçün, yeni salınan qəsəbədə - Novruzlu kənd məktəbində 132 nəfər şagird üçün günün tələblərinə cavab verən məktəb binaları inşa etmişik. 18 təhsil müəssisəsində təmir-tikinti işləri aparmışıq. 50 yerlik uşaq bağçası və körpələr evini də ötən il tikmişik. 93 nəfər məzunumuzun da tələbə adına layiq görülməsi 2010-cu ilin payına düşür. Vaxtın olsa, Mərkəzi Rayon Xəstəxanasına da baş çək! Məlumat üçün deyim ki, Prezidentimiz İlham Əliyev cənabları bu müəssisənin əsaslı təmiri üçün 30 mart 2010-cu ildə Sərəncamla 1,5 milyon manat vəsait ayırmışdır. Xəstəxananın dam örtüyü dəyişdirildi, kommunikasiya xətləri, istilik sistemi yenidən quruldu. Poliklinika da çox gözəl və əsaslı təmir edildi. Varxan, Dədə Qorqud, Novruzlu kəndlərində yeni tibb müəssisələri tikildi. Saatlıdakı 330 abonent də telefon xəttinə ötən il qoşulmuşdur. Elektrik təsərrüfatına yeni texnologiyaya əsaslanan 1698,74 min manatlıq işin görülməsi də 2009-cu ilin uğurudur. Uğurlarımız bütün sahələrdə var. Tikinti-abadlıq işlərini də özün gəzib görmüsən. Saatlı rayon İcra Hakimiyyətinin başçısı Siraqəddin Cabbarovun bu uğurlarda payı isə hamıdan çoxdur. Çünki hər tikintiyə hər gün özünün nəzarət etməsi vacibdir, mütləqdir. Qaldı kəndə getməyinə, elə ötən il tikilib istifadəyə verilmiş Bəylər kənd ümumi orta məktəbi lap yerinə düşər, orada çox şey görəcəksən.

Bu da kənd məktəbi

Rayondan o qədər də uzaq olmayan İ.Ağamirzəyev adına 127 şagird üçün inşa edilmiş Bəylər kənd ümumi orta məktəbi 2010-cu ilin isti yay günlərində tikilib başa çatdırılmışdır. 17 nəfər müəllim kollektivi olan bu 2 mərtəbəli bina Saatlı təhsilinin ən müasir tikililərindən, ən qabaqcıl məktəblərindəndir. Çox xoşdur ki, məktəbdəki şagirdlərdən bir-ikisi istisna olmaqla, bütün uşaqlar məktəbli formasındadır. Divardan asılmış portretlər, müdrik kəlamlar, müxtəlif cədvəllər, divar qəzetləri, metodiki tövsiyyələr, guşələr, sinif rəhbərlərinin nəzarət jurnalları, kabinələr, idman zalı - bir sözlə, hər şey gözəl və yerindədir. Yeni məktəbin bağçasındakı müxtəlif ağacların çoxu da yeni əkilib:

- Bax bu gördüyün bağça meşə idi, az vaxtda salmışdıq. Ağaclardan bir neçəsi də əvvəldən var idi. Daşqınlar vaxtı burda kəndlərdən gələn xeyli qonağımız oldu. Ona görə də bir az səliqə-səhmanı saxlaya bilmədik. Məktəbimizdəki nizam-intizam, tədris isə kollektivin öz uğurudur. Kənd olanda nə olar, gərək işlədiyin yerdə bir iz də qoyasan. Nəzərə alsaq ki, təhsilin inkişafına respublikada, eləcə də rayonda diqqət xüsusilə artıb, onda mən elə də böyük iş görməmişəm...

Məktəbin direktoru Zakir Əmişov Saatlıda mənim son müsahibim oldu.

Səxavət Məmmədli

Ədalət.- 2011.- 8 aprel.- S. 7.