Valideynlər uşaqlar haqqında nəyi bilməlidir

21 dekabr- 20 yanvar arasında doğulan uşaqların xarakteri

Astroloji dildə belə uşaqlar OĞLAQ adlanır. Bu bürc altında doğulan uşağı həmişə uğur gözləyir.

Kiçik yaşlardan onda ciddiyyət, işgüzarlıq və əməksevərlik, inadkarlıq, əzm və dəyanət müşahidə olunur. Bu, ona uğur qazanmaqda kömək edir, sosial pillələri inamla qalxır. Onun devizi belədir: "Tabeçilikdən müstəqilliyə doğru".

Onun aydın və iti ağlı, realist görüşləri və praktikliyi, həmçinin materialist meyli erkən yaşlardan özünü göstərir. Hərəkəti və düşüncə tərzi etibarı ilə olduqca sakit, tədbirli, diqqətli, və ehtiyatlıdır. Heç vaxt hiss və duyğuların əsiri olmur. Olduqca praktik və realist düşüncəyə malikdir. Səhv, yanlış hərəkət, yaxud ümidsizlik onu ruhdan sala bilməz. Fleqmatik temperamentində pessimizm əlamətləri olsa da, inadkarlıq, əzm, düzgün mühakimə və ağıl onun köməyinə gəlir.

Xarakterik əlamətlərindən biri odur ki, hər şeyə soyuq ağılla yanaşır, hər şeyi yoxlayır, faydalı və əhəmiyyətli olanı seçir, götürür, öyrənir. Bəzən görürsən ki, oğul, atasının kiçik emalatxanasını böyük bir zavoda döndərdi, ya da kiçik daxmalarının yerində böyük bir imarət tikdi.

Son dərəcə ehtiyatlı, tədbirli və sayıqdır. Ağıllı adamlar belədir: əvvəlcədən hər şeyi ölçüb-biçmədən, öyrənmədən heç bir işə başlamırlar.

Elm və texnika, ticarət və sənaye, xalq təsərrüfatı və siyasi iqtisad, tikinti və arxitektura, siyasət və diplomatik fəaliyyət, kimya, dağ-mədən və kənd təsərrüfatı, fəlsəfə və teologiya sahəsində daha çox uğur qazanırlar.

Onunla dost və yoldaş ola bilsəniz, onun rəğbətini və inamını qazansanız, işgüzar əlaqələriniz də beləcə möhkəm və daimi olar. Hətta zahirən bildirməsələr də, onlar öz əlaqələrində sadiq və möhkəm olurlar.

20 yanvar - 18 fevral arasında doğulan uşaqların xarakteri

Bu uşaqlar SUTÖKƏN adlanır. Bu tipdə olan uşağın qəribə xasiyyəti var. Özü başqalarına qarşı sayğısız olsa da, onlardan həmişə diqqət və sevgi gözləyir. Belə uşaqlar özünü suda balıq kimi hiss edir. Valideynlər nə qədər fikirləşsələr də, onların nəsl-nəcabətində bu cür uşağın olduğunu yada sala bilməzlər.

Əgər valideynlər meşşan ənənələri olan bir mühitin adamları deyilsə, yaxud hansısa şablon düşüncənin əsiri deyillərsə, belə uşaq onlar üçün Allah vergisi olmalıdır. Bu halda onları infarkt gözləyir, çünki bu cür uşaqda hansı xasiyyət desən tapılar, yalnız valideynlərin arzuladığı xasiyyətdən başqa. Hər halda SUTÖKƏNin istək və arzuları, onun uşaq əməlləri və yeniyetmə niyyətləri, yaxud gələcək planları və məqsədi heç cür köhnə meşan həyat tərzi və ya dünyagörüşü ilə bağlı deyil.

Valideynlər tez-tez belə uşaqların ultramüasir fikirləri ilə qarşılaşırlar, onların ailədə yox, dostlar və yoldaşlar arasında yaranan yeni əxlaq söhbətlərini eşidib təəccüblənirlər.

SUTÖKƏNlər idealist və utopistdir, filosof və ictimai fikir xadimidir, bunlar mənəvi səviyyəsindən asılı olaraq inqilabçı, üsyançı və qiyamçıdır. Daxili inam və əqidəni onlar əzmlə, bacarıqla, məntiq və dəlil-sübutla müdafiə edirlər, onlar dostlarını, yaxın yoldaş və həmfikirlərini, yaxud hər hansı sözü, işi də beləcə məntiqlə müdafiə edirlər.

Ətraf aləmlə münasibətləri onların rəğbət və ya nifrətindən asılıdır.

Eyni adamlarla uzunmüddətli ünsiyyət onları da eyni düşüncə tərzinə gətirib çıxarır, amma mübahisə və diskussiyalarda SUTÖKƏNlər həmişə öz fikrinin üstündə durur, öz sözünü deyir, bəzən onun inadkarlığı şıltaqlıq kimi görünür.

Heç bir müxalif fikirlə razılaşmayaraq, o öz ideya və planlarını inam və ciddiyyətlə həyata keçirəcək. Temperamenti sanqvinikdir, fiziki və mənəvi cəhətdən həmişə hərəkətdədir. Xaraktercə sakit və səbirli, yumşaq və nəzakətli, az işgüzar, amma əməksevərdilər. Həmişə onların başında nəsə bir ideya olur, amma beyinlərini həddən artıq yükləmək istəmirlər. Həddindən artıq işləməklə araları yoxdur.

SUTÖKƏNlərin əksəriyyəti açıq təbiətli, bir qismi isə qapalı olur, amma hamısı cazibədar və gözəgəlimlidir. Onların xasiyyətini heç nə dəyişə bilməz. Onlar tez-tez taleyin dönüklüyü ilə üzləşir, çətinlik çəkirlər. İşıqlı məramları tez-tez gündəlik həyatın qayğı daşlarına dəyib çiliklənir. Ruhi və cismani tələbatlarını həyatın qayğı və ehtiyacları ilə uzlaşdıra bilməmək bəzən onların mövcudluğunu belə təhlükə altına alır.

SUTÖKƏNlərin bir gözəl cəhəti onları həmişə vəziyyətdən çıxarır: onlar öz mührumiyyətləri ilə döyüşməkdən yorulmurlar. Onlarda iradə çox inkişaf etmişdir. Cismə yox, ruha arxalanırlar, bu günlə yox, gələcəklə yaşayırlar.

SUTÖKƏN çətin anlaşılan tipdir. Onlarda ƏKİZLƏRin zahiri təbiəti ilə TƏRƏZİnin induktiv keyfiyyəti birləşmişdir. Onlarıniç dünyası heyrət doğurur, amma onu açmaq, onu hərəkətə gətirmək üçün xaricdən güclü bir təsir, kənar bir qüvvə lazımdır.

Mənəvi güclərini dərk etmədən SUTÖKƏNlər zəifdir, elə ki bu gücü aşkar etdilər, böyük işlər görə bilərlər, sanki bundan sonra onların ruhu daha da güclənir, qanadlanır.

Yadda saxlamaq lazımdır ki, bu uşaqlar fərdi, olduqca orijinal düşüncəyə malikdirlər. Tez-tez bizə elə gəlir ki, onlar müəyyən bir məsələdə bizimlə razıdırlar, amma söhbətin axırında birdən-birə tamamilə başqa bir qərara gəlirlər.

Belə uşaqlarla ünsiyyətə girmək üçün xüsusi qaydalar yoxdur, amma hər halda əvvəlcədən onların xarakterinin zəif və güclü tərəflərini bilmək faydalıdır.

SUTÖKƏNlərdə orqanizmin zəif nahiyələri: ayaq baldırları, topuq və topuq oynaqları, ayaq barmaqları, habelə ürək, ürək-damar, əsəb sistemi.

Xəstəlikləri: soyuqdəymə, allergiya, nevrasteniya, spazma, iflic.

Ədalət.- 2011.- 9 aprel.- S. 14.