Bakıda Avro-Atlantik Tərəfdaşlıq Şurasının seminarı keçirilir

Bakıda BMT Təhlükəsizlik Şurasının 1540 saylı qətnaməsinin icrası üzrə Avro-Atlantik Tərəfdaşlıq Şurasının seminarı işə başlayıb. "APA-ECONOMICS"in xəbərinə görə, iki gün davam edəcək seminar "Kütləvi qırğın silahlarının yayılması ilə mübarizədə, kütləvi qırğın silahlarının, ikili təyinatlı malların və texnologiyaların qaçaqmalçılığının qarşısının alınmasında əməkdaşlıq" mövzusuna həsr edilib. Tədbirin açılış mərasimində Azərbaycan Dövlət Gömrük Komitəsi sədrinin müavini, gömrük xidməti general-leytenantı Əsgər Abdullayev və Kütləvi Qırğın Silahlarının Yayılmaması Mərkəzinin (NATO) rəhbəri Yaçek Bılıça iştirak edib.

Seminarın ilk iş günündə tədbir iştirakçılarına ikili təyinatlı mallar və texnologiyalar üzrə ixraca nəzarət rejiminin fəaliyyəti, aşkarlama və risklərin idarə olunması, kimyəvi, bioloji, radioloji və nüvə (CBRN) silahlarının yayılması və terrorizminə qarşı İcra Proqramı (İPACT), eləcə də BMT Təhlükəsizlik Şurasının 1540 saylı qətnaməsinin icrasına dəstəklə əlaqədar BMT-nin Tərksilah Məsələləri üzrə İdarəsinin fəaliyyət dairələri, ikili təyinatlı mallar üzrə ixraca nəzarət sahəsində Avropa İttifaqının Yardım və Təbliğat Proqramı, BMT Təhlükəsizlik Şurasının 1540 saylı qətnaməsinin milli səviyyədə icrasının əlaqələndirilməsi məqsədilə hökumət qurumlarının yaradılması - regional strategiyaların və mövcud təcrübələrin nəzərdən keçirilməsi, Azərbaycanın ixraca nəzarət sistemi və müvafiq qanunvericilik bazası mövzularında məruzələr təqdim ediləcək.

Seminarın ikinci günündə isə BMT Təhlükəsizlik Şurasının 1540 saylı qətnaməsinin icrası sahəsində praktiki əməkdaşlıq: təcrübə mübadiləsi və yardım, AATŞ ölkələrində kütləvi qırğın silahlarının yayılmasının qarşısının alınması təşəbbüsü üzrə fəaliyyətlər, kütləvi qırğın silahları və əlaqədar materialların qadağan edilməsi ilə bağlı beynəlxalq təşəbbüslər fonunda BMT Təhlükəsizlik Şurasının 1540 saylı qətnaməsinin icrası, dənizdə ələkeçirmə əməliyyatlarına NATO-nun praktiki töhfəsi, həmçinin BMT Təhlükəsizlik Şurasının 1540 saylı qətnaməsinin icrası ilə əlaqədar NATO-nun töhfəsi barədə çıxışlar dinləniləcək.

Ədalət.- 2011.- 13 aprel.- S. 3.