VAQİF SULTANLININ "HEÇLİK VADİSİ" KİTABI NƏŞR OLUNUB

Bu günlərdə yazıçı-ədəbiyyatşünas Vaqif Sultanlının "Heçlik vadisi" adlı kitabı nəşr olunmuşdur. Azərbaycan Dövlət Nəşriyyatının nəfis şəkildə çap etdiyi kitaba müəllifin eyniadlı essesi, müxtəlif dövrlərdə qələmə aldığı povest və hekayələri daxil edilmişdir.

Qeyd edək ki, kitaba daxil edilən yazıların bir qismi əvvəllər nəşr edilmiş, digər qismi isə ilk dəfədir ki, oxuculara təqdim olunur.

Azərbaycanın görkəmli yazıçısı Çingiz Hüseynov kitaba yazdığı "Məktub şəklində müqəddimə" adlı ön sözdə qənaətlərini belə ifadə edir: "Yadımdadır, o vaxt yazdığın hekayələrini oxumuşdum, bəyənmişdim - görürəm ki, təriflərimdə yanılmamışam, onların lirik üslubu, romantik ruhu, fəlsəfi düşüncələrə vadar edən və ümidlər dolu məzmunu, ab-havası, sadə, lakin gizli məna daşıyan adları belə - göstərir ki, seçdiyin nəsr yolu sənin yolundur".

Kitab müəllifin bir qədər həzin, kədərli ruhda qələmə aldığı "Heçlik vadisi" adlı essesi ilə başlayır: "Yaşanmış illərin arxasından dönüb geriyə baxanda dumanlı bir heçlik vadisindən savayı nəyinsə xatıra gəlmədiyi o uzaq keçmişdən görünməz, bilinməz xəyalların, gerçəkləşməsi mümkün olmayan, sərgərdan arzuların arxasınca qaçmaqda, mənasız qovğalarda, çəkişmələrdə xərclənərək tükənən bir ömrün əzabları, ağrıları boylanır".

Təxminən eyni ovqata köklənmiş "Ölüm yuxusu" povestində qəbiristanlığın köçürülməsi cəmiyyət həyatında baş verən ciddi xaos, çaxnaşma kimi canlandırılır. Bu xaos təsvir olunan obrazların daxili-mənəvi dünyasını aşkarlamağa imkan verir. Qəbiristanlığı uçuran buldozerçinin intihar etməsi ilə tamamlanan povestdə yazıçı mənəvi-əxlaqi dəyərlərə qarşı çıxmağı ölümlə eyniləşdirmək məramı izləmişdir.

Kitaba daxil edilmiş "Dərviş", "Mağara", "Nəvai-Qumru", "Qütb gecəsi", "Vətən", "Ada", "İlğım" və digər hekayələr özünəməxsus dil və üslub xüsusiyyətləri ilə seçilməkdədir. Hekayələri birləşdirən ümumi cəhət onların daxili-mənəvi ovqata köklənməsi, cəmiyyətə hakim olan insanın özgələşmə probleminə etiraz motivləri ilə seçilməsidir.

ƏBÜLFƏT MƏDƏTOĞLU

Ədalət.- 2011.- 14 aprel.- S. 6.