"Bizim camaat "paqon"dan qorxur"

Aqil Abbas: "Heydər Əliyev olmasaydı, indiyə qədər Azərbaycanda 18 dəfə inqilab olmuşdu"

- Aqil müəllim, son dövrlər müxalifət liderlərinin ərəb dünyasında baş qaldıran inqilabların Azərbaycana da gəlib çatacağı ilə bağlı iddialarının reallıqla hər hansı əlaqəsi varmı?

- Azərbaycanda inqilabın olacağı ilə bağlı səslənən iddiaları qətiyyən bölüşmürəm. Artıq Azərbaycanda inqilablar dönəmi bitib. Ölkəmizdə yalnız bir dəfə inqilab olub ki, onun da ağrı-acısını hələ də yaşayırıq. Məhz bu inqilabın nəticəsində torpaqlarımız işğal olundu, ölkə iqdisadiyyatı tamamilə süquta uğradı. İndi-indi özümüzə gəlmişik ki, yenidən inqilabların olmasını istəmək yalnız dövləti sevməyən insanların işidir. Heç bir inqilab hər hansı ölkəyə uğur gətirməyib. Rəhmətlik Heydər Əliyev sübut elədi ki, hakimiyyətə gəlməyin bir yolu var, bu da sivil yoldur. Əgər bu gün iqtidar sahibi olmaq istəyirsənsə gərək ki, seçkilərə qatılıb qalib gələsən. İndiki halda isə İlham Əliyevə rəqib görmürəm. Müxalifətin təşkil etdiyi son aksiyalardan da heç bir nəticə gözləmirəm. 500-600 adamla inqilab etmək tamamilə gülüncdür və bununla bağlı səslənən fikirlər yalnız ikrah hissi doğurur. Əgər Heydər Əliyev olmasaydı, yəqin ki, ölkəmizdə indiyə qədər 18 inqilab olmuşdu. Bir daha demək istəyirəm ki, Azərbaycanın iqtisadi inkişafı, güclənməsi, regionda artan əhəmiyyəti fonunda inqilablardan danışmağın özü belə absurddur. Azərbaycan xalqı İlham Əliyevi dəstəkləyir və heç bir qüvvənin ölkədə qarışıqlıq yaratmaq meyllərinə uymayacaq.

- Korrupsiyaya qarşı mübarizə tədbirləri necə, sizcə effekt doğurdumu?

- Azərbaycanda korrupsiyaya qarşı mübarizə tədbirləri həmişə olub, bu gün də davam edir. Bəzi qüvvələr elə fon yaratmağa çalışırlar ki, guya indiyə qədər ölkəmizdə rüşvətə qarşı hər hansı cəza tədbiri olmayıb, bu son vaxtlar başlayıb. Qətiyyən belə deyil, korrupsiyaya qarşı mübarizə tədbirləri olub, var və bundan sonra da olacaq. Sadəcə İlham Əliyev belə halların yolverilməz olduğunu növbəti dəfə bəyan edib və bir daha bununla bağlı prinsipial mövqeyini ortaya qoyub. Biz həmişə korrupsiyaya qarşı mübarizə tədbirlərinin ən yüksək səviyyədə nəticələrini görmüşük. 2005-ci ilin parlament seçkiləri öncəsi bir neçə nazirin, yüksək səviyyəli məmurların məhz korrupsiyaya qarşı mübarizə tədbirləri nəticəsində həbs olunmasının şahidi olmuşuq. Bütün bunlar göstərir ki, rüşvətə qarşı mübarizə həmişə olub və son aylar Prezidentin həyata keçirdiyi daha bir mübarizə tədbirlərindən şou düzəltmək lazım deyil.

- Son günlər mətbuat orqanlarında Nəqliyyat Nazirliyinin fəaliyyəti diqqət mərkəzinə gəlib, xüsusən sürücülərə qarşı nəqliyyat müfəttişlərinin zorakı davranışları pislənilir...

- Biz demokratik ölkədə yaşayırıq. Kimisə döymək, hədələmək olmaz. Bu yolverilməzdir və qanunlarımız belə halları birmənalı şəkildə yasaq edir. Amma gəlin etiraf edək ki, nəqliyyat müfəttişləri ilə sürücülər arasında baş verən qarşıdurmalarda hər ikisi eyni dərəcədə günahkardırlar. Sürücülər bir çox hallarda nəqliyyat müfəttişlərinin çağırışlarına məhəl qoymur, onlarla qarşıdurmaya getməkdə maraqlı olurlar. Qısa bir araşdırma aparsaq görərik ki, əksər yük maşınları onlar üçün nəzərdə tutulan normadan artıq yük vururlar. Bu da yolların dağılmasına gətirib çıxarır. Təklif edirəm ki, nəqliyyat müfəttişləri ilə polislər birgə hərəkət etsinlər. Çünki bizim camaat "paqon"dan qorxur. Nəqliyyat müfəttişlərini isə bir o qədər də ciddiyə almırlar və nəticə etibarilə belə qarşıdurmaların, arzuolunmaz söz-söhbətlərin yaranmasına səbəb olur.

- Artıq iki çağırışdır ki, Milli Məclisin üzvüsünüz. Məmur-deputat münasibətlərinə dair fikirlərinizi bilmək maraqlı olardı. Başqa sözlə icraedici hakimiyyətlə qanunverici hakimiyyət münasibətlərini normal tənzimləyə bilirmi?

- Şəxsən mən öz adımdan danışa bilərəm, hər hansı deputatın adından yox. Millət vəkili olduğum 6 ilə yaxın müddətdə hər hansı dövlət qurumunun və ya məmurunun müraciətimə laqeyd yanaşması hallarına bircə dəfə də olsun rast gəlməmişəm. İndiyə qədər mənim və köməkçimin vasitəsilə 100-dən artıq seçici şikayətilə bağlı müvafiq qurumlar qarşısında məsələ qaldırılıb. Hamısına da cavab verilib və problemlərin əskəriyyəti öz həllini tapıb. Bununla bağlı müraciətlərimizə istər Milli Təhlükəsizlik Nazirliyi olsun, istər Fövqəladə Hallar Nazirliyi, bütün qurumlar canla-başla yanaşıblar. Amma elə də olur seçici bizə şikayət edir, bunun əsasında etdiyimiz müraciət araşdırılır və cavab verilir ki, vətəndaşın qaldırdığı iddia əsassızdır. Bundan sonra biz də araşdırıb seçicinin haqsız olduğunu görüb, müvafiq qurumlarla razılaşmaq məcburiyyətində qalırıq.

Ədalət.- 2011.- 15 aprel.- S. 3.