"Dəyirmi masa" keçirildi

Azərbaycan Sosial Münasibətlər Akademiyasında Azərbaycan Həmkarlar İttifaqları Konfederasiyasının (AHİK) təşkilatçılığı ilə "Çernobıl AES-də qəza nəticəsində zərərçəkmiş vətəndaşların sosial hüquqlarının həyata keçirilməsi" mövzusunda dəyirmi masa keçirilib.

APA-nın məlumatına görə, AHİK-in sədr müavini Cavanşir Alxasov bildirib ki, bu il Çernobıl Atom Elektrik Stansiyasındakı qəzanın 25 ili tamam olur: "Təhlükə radiusuna və ətrafa sızan radioaktiv maddələrin miqdarına görə Çernobıl qəzası "Xirosimo bombaları"nın 20 dəfəlik gücünə ekvivalent olub. Qəza nəticəsində milyonlarla insan zərər çəkib, yüz minlərlə adam evsiz-eşiksiz qalıb, ətraf mühitə ciddi zərbə vurulub. Ən çox ziyan qəza obyektinə yaxın ərazidə yaşayan Rusiya, Ukrayna, Belarus əhalisinə dəyib. Rusiyanın tanınmış radioloqları etiraf edirlər ki, fəlakətin nəticələrinin belə ağır olacağı gözlənilmirmiş. Şüalanmadan 10-20 il keçdikdən sonra belə onkoloji (şiş) xəstəliklər əmələ gəlməyə başlayır. Faciə qurbanlarına hörmət və ehtiram əlaməti olaraq Birləşmiş Millətlər Təşkilatı 26 apreli Beynəlxalq Xatirə Günü elan edib".

C.Alxasov deyib ki, Çernobıl AES-də qəzanın nəticələrinin aradan qaldırılmasında digər ölkələrlə yanaşı, Azərbaycanın 7 mindən çox vətəndaşı iştirak edib. Onlardan bir qismi Slavutiç şəhərinin tikintisində iştirak edib. Həmin şəxslərin 5200 nəfəri sonralar sağlamlıqlarını itirərək əlil olub: "Bu gün də respublikamızda sağlam "çernobılçı" yoxdur, ya tam müayinə olunmamışlar, ya da tam müalicə olunmayanlar var". Tədbirdə iştirak edən Səhiyyə Nazirliyinin böyük məsləhətçisi Yusif Babayev isə bildirib ki, Çernobıl əlillərinə yüksək səviyyədə səhiyyə xidməti göstərilir.

"Çernobıl Əlilləri İttifaqı"nın prezidenti Mir Həsən Həsənov da əlavə edib ki, əvvəllər Çernobıl əlillik dərəcələrinin müəyyənləşdirilməsi zamanı çətinliklərlə üzləşir, imtiyazlarından istifadə edə bilmirdilər: "Artıq Çernobıl əlillərinə əlillik dərəcələri ömürlük müəyyənləşdirilir. Bununla da onların sosial imkanları genişləndirilir".

Ədalət.- 2011.- 15 aprel.- S. 7.