İLHAM ƏLİYEV: "HEÇ KİMİN KÖMƏYİNƏ EHTİYACIMIZ YOXDUR"

Azərbaycan prezidenti İlham Əliyev Masallı rayonu ictimaiyyətinin nümayəndələri ilə görüşüb. APA-nın AzərTAc agentliyinə istinadən verdiyi xəbərə görə, parkın yenidən qurulması münasibətilə təbriklərini çatdıran dövlət başçısı Masallının yeni inkişaf dövrünü yaşadığını deyib. Masallıda görülən işlər barədə danışan prezident gələn ilin sonunadək rayonun bütün məntəqələrinin qazlaşacağını bildirib və bunun tarixi nailiyyət olacağını vurğulayıb. Azərbaycanda elektrik enerjisi ilə təchizatında heç bir problemin olmadığını, içməli su və kanalizasiya məsələlərinin həllini tapdığını qeyd edən dövlət başçısı ölkədə sosial infrastrukturun yaradılmasına böyük diqqət göstərildiyini deyib.

Prezident İlham Əliyev ölkənin sürətli inkişafı, beynəlxalq aləmdə artan mövqeləri barədə də danışıb. Dövlət başçısı rayon ictimaiyyətinin nümayəndələrinə yeni uğurlar arzulayıb. Rayon ictimaiyyəti adından çıxış edən müəllim Əhməd Məmmədov və Milli Məclisin deputatı Elmira Axundova Masallıya və bütövlükdə ölkənin sürətli inkişafına göstərdiyi yüksək diqqət və qayğıya görə rayon sakinlərinin minnətdarlığını dövlət başçısına çatdırıblar. "Bu gün biz dünyanın müxtəlif yerlərində münaqişələri, qarşıdurmaları, o cümlədən dini zəmində baş verən toqquşmaları görürük. Bütün bunlar onu göstərir ki, hər bir ölkə ancaq düzgün siyasət nəticəsində inkişaf edə bilər. Ölkəmizin inkişafı müxtəlif istiqamətlərdə gedə bilər. Bizim seçdiyimiz yol, ən düzgün yoldur". Dövlət başçısı həm sabitliyin qorunduğunu, həm insanların təhlükəsizliyinin təmin edildiyini, həm də sosial və iqtisadi məsələlərin həll olunduğunu bildirib: "Dünyada mövqeyimiz güclənir. Biz ölkəmiz üçün, dünya üçün çox vacib nəhəng enerji layihələri icra edirik. Bu gün Azərbaycan dövləti müstəqil dövlət kimi tam formalaşıb. Dövlətçiliyimizin əsasları tam şəkildə qurulub və biz bu gün daxili imkanlar hesabına yaşayırıq".

Prezident qeyd edib ki, ölkədə güclü iqtisadi əsaslar olmasaydı, neft siyasəti düzgün aparılmasaydı, bu gün Azərbaycan ciddi problemlərlə üz-üzə qalardı: "Kim bizə kömək edəcəkdi? Biz indi bölgədə gedən proseslərə müəyyən mənada ikili standartlarla yanaşmanı görürük. Bu barədə mən öz fikirlərimi bildirmişəm. Biz uzun illərdir ki, ikili standartlarla üzləşirik. Bizə əgər kimsə kömək etsəydi belə, yəqin ki, bu köməyi təmənnasız göstərməzdi. Amma bu gün bizim ehtiyacımız yoxdur. Çünki biz özümüz özümüzü təmin edirik. Biz artıq böyük maliyyə resursları yığmışıq, iqtisadi inkişaf gedir. Böhranlı illərdə manatın məzənnəsini sabit saxlamışıq, imkan verməmişik ki, sosial cəhətdən aztəminatlı insanlar əziyyət çəksinlər. Böhranlı 2009-2010-cu və 2011-ci illərdə sosial proqramlar icra edilib. Bir neçə aydan sonra maaşlar və pensiyalar artırılacaq. Suya olan borclar silinir. Budur, bizim siyasətimiz. Bizim siyasətimiz sosialyönümlüdür. Eyni zamanda, biz müstəqilliyin gücləndirilməsi üçün bütün imkanlardan istifadə edirik və edəcəyik. Biz müstəqil yolumuzdan dönməyəcəyik və Azərbaycan xalqının xoşbəxt gələcəyini təmin edəcəyik. Bunu etmək üçün, əlbəttə, hər bir rayonda və hər bir kənddə bütün problemlər həll olunmalıdır. Buna görə mənim bölgələrə səfərlərim, bilirsiniz, mütəmadi xarakter daşıyır. Çalışıram, hətta hər bir kəndə gedim, soruşum ki, əlavə nə etməliyik, harada çatışmayan nəsə varsa, biz onu da düzəldək".

Lənkəranlılar dövlət başçısını hərarətlə qarşılayaraq xoş arzularını bildiriblər. Respublikanın cənub bölgəsinə səfər edən Azərbaycan prezidenti İlham Əliyev Astara rayonunda da olub. Dövlətimizin başçısı Heydər Əliyevin Astara şəhərindəki Heydər parkında abidəsini ziyarət edərək önünə gül dəstəsi qoyub. Prezident Astara rayonunda və abidənin yerləşdiyi parkda aparılmış abadlıq-quruculuq işləri barədə məlumat verilib.

Prezidenti İlham Əliyev Azərbaycanın cənub bölgəsinə səfəri çərçivəsində Astara rayonuna gəlib. Dövlət başçısı ilk öncə Heydər Əliyevin Astara şəhərinin mərkəzindəki Heydər parkında ucaldılmış abidəsini ziyarət edib. Prezidentə Astara rayonunda və abidənin yerləşdiyi parkda aparılmış abadlıq-quruculuq işləri barədə məlumat verilib. Daha sonra prezident İlham Əliyev yenidən qurulmuş Astara-Bala Şahağac kəndi avtomobil yolunun açılışında iştirak edib. Dövlət başçısı yolun əvvəlki və indiki vəziyyətini əks etdirən stendə baxıb. Astara rayon icra hakimiyyətinin başçısı Mahir Quliyev bildirib ki, dövlət başçısının tapşırıqlarına əsasən regionlarda yol-nəqliyyat infrastrukturunun yaxşılaşdırılması istiqamətində mühüm tədbirlər həyata keçirilir. Rayonun əsas yollarından olan Astara-Bala Şahağac avtomobil yolunun tikintisi də bu qəbildəndir.

Qeyd olunub ki, Astara-Lənkəran magistral avtomobil yolunda hərəkətin intensivliyinin artması nəticəsində yaranmış gərginliyin aradan qaldırılması ilə bağlı 50 min nəfərdən çox əhalisi olan qəsəbə və kəndlərin sakinlərinin müraciətlərini nəzərə alaraq, onların daimi istifadə etdikləri Astara-Bala Şahağac avtomobil yolunun yenidən qurulması üçün prezident İlham Əliyev 2010-cu il aprelin 21-də "Astara rayonunun sosial-iqtisadi inkişafının sürətləndirilməsinə dair əlavə tədbirlər haqqında" sərəncam imzalayıb. Sərəncama əsasən, Prezidentin Ehtiyat Fondundan Astara-Bala Şahağac avtomobil yolunun yenidən qurulması məqsədilə Astara Rayon İcra Hakimiyyətinə 3,5 milyon manat vəsait ayrılıb.

Dövlət başçısına məlumat verilib ki, əvvəllər Ələt-Astara magistralı ilə paralel olaraq dövlət əhəmiyyətli yol kimi istifadə edilən, Xəzər dənizinin sahili boyunca çəkilmiş 19 kilometrlik Astara-Bala Şahağac avtomobil yolu uzun müddət baxımsızlıq ucbatından və dənizin səviyyəsinin qalxması ilə əlaqədar yararsız vəziyyətə düşüb. Rayonun yeddi iri yaşayış məntəqəsini əhatə edən yolun ətrafında Astara dəmir yolu stansiyası, tikilməkdə olan Astara Olimpiya İdman Kompleksi, neft və yük terminalları, həmçinin digər dövlət əhəmiyyətli obyektlər yerləşir. İndi bu avtomobil yolu müasir tələblərə uyğun yenidən qurulub, yol boyu abadlıq və yaşıllaşdırma işləri aparılıb. Asfalt örtüyünün eni 6 metr, qalınlığı 7 santimetr olan yolun hər iki tərəfində eni 2,6 metr olan piyada yolu salınıb. Yolun müəyyən hissəsi Xəzər dənizinin yaxınlığından keçdiyindən 500 metr ərazidə sahil-bərkitmə işləri görülüb. Bundan əlavə, yol boyu 3 körpü və 6 suötürücü əsaslı təmir edilmiş, 5 avtobus dayanacağı tikilib.

Prezident İlham Əliyev Astara rayon ictimaiyyətinin nümayəndələri ilə görüşdən sonra yolun açılışını bildirən lenti kəsib. Dövlət başçısı Astara-Bala Şahağac avtomobil yolunda görülən işləri yüksək qiymətləndirib. Azərbaycan prezidenti İlham Əliyev aprelin 15-də Astarada Heydər Əliyev Mərkəzinin açılışında iştirak edib. Dövlət başçısı Mərkəzin açılışını bildirən lenti kəsdikdən sonra yaradılmış şəraitlə tanış olub. Prezidentə məlumat verilib ki, Mərkəzdə Heydər Əliyevin həyat və fəaliyyətinə həsr olunan bölmələrdə onun uşaqlıq və gənclik dövrlərini əks etdirən fotoşəkillər, 1969-1982-ci illərdə respublikanın sosial-iqtisadi inkişafı ilə bağlı gördüyü işlər, 1993-cü ildə xalqın təkidli tələbi ilə yenidən hakimiyyətə qayıdışından sonra ölkəmizin ictimai-siyasi, sosial və mədəni həyatındakı quruculuq işlərindən bəhs edən materiallar toplanıb.

Sonra dövlət başçısı Mərkəzin ikinci mərtəbəsində yaradılmış şahmat, təsviri sənət, dekorativ tətbiqi sənət studiyaları və elektron kitabxana ilə tanış olub. Prezident İ.Əliyev Mərkəzin xatirə kitabına ürək sözlərini yazıb.

Azərbaycan prezidenti İlham Əliyev Ələt-Astara-İran İslam Respublikası dövlət sərhədi avtomobil yolunun Masallı-Astara hissəsinin Sərçuvar kəndi ərazisində aparılan tikinti işləri ilə də tanış olub. Dövlət başçısı Ələt-Astara avtomobil yolunun sxemini əks etdirən fotostendlərə baxıb. Nəqliyyat naziri Ziya Məmmədov prezident İlham Əliyevə məlumat verib ki, Masallı və Astara rayonlarının ərazisindən keçəcək birinci dərəcəli yolun bu hissəsinin ümumi uzunluğu 22 kilometr, eni 27,5 metrdir. Yolun dördtərəfli aparıcı zolağının eni 5 metr olacaq. Yolun bu hissəsində 6 körpünün, 4 yolötürücünün və 133 suötürücünün inşası nəzərdə tutulub. Beynəlxalq standartlara tam cavab verəcək yolda müasir işıqlandırma sistemi, nəqliyyatın və piyadaların maneəsiz hərəkəti üçün lazımi şərait yaradılacaq.

Dövlət başçısının diqqətinə çatdırıb ki, yeni yolun istifadəyə verilməsindən sonra Masallı və Astara rayonlarını birləşdirən köhnə yolun istismarı da davam etdiriləcək. Köhnə və yeni yolun qovşağında isə ötürücü yol keçidi inşa olunacaq. Bu yolun istifadəyə verilməsi Masallı və Astara ilə yanaşı, Yardımlı, Lənkəran, Biləsuvar və digər rayonların əhalisi üçün rahatlıq yaradacaq. Bildirildi ki, magistral avtomobil yolu rayon mərkəzlərinin kənarından keçəcək. Bu isə avtomobillərin sərbəst və maneəsiz hərəkətinə imkan verəcək. Sonra prezident İlham Əliyev Ələt-Astara avtomobil yolunun Kür çayı üzərindən keçən hissəsində inşası davam etdirilən yeni körpü kompleksini əks etdirən fotostendlərə baxıb. Məlumat verilib ki, körpünün ümumi uzunluğu 370 metr, eni isə 30 metr olacaq. Körpüdə yanaşma yolunun ümumi uzunluğu isə 1 kilometrdən çoxdur. Dövlət başçısı yolun tikintisində istifadə olunan texnikaya baxıb. Prezident İlham Əliyev görülmüş işlərdən razılığını bildirdi, tövsiyə və tapşırıqlarını verib.

Ədalət.- 2011.- 16 parel.- S. 2.