Türkiyədə azərbaycanlı iş adamlarının birliyi təsis edildi

Ankaranın "Sheraton Hotel" mehmanxanasında Türkiyədə Fəaliyyət Göstərən Azərbaycanlı İş Adamları Birliyinin təsis yığıncağı keçirilib. Bu barədə APA-ya Azərbaycanın Türkiyədəki səfirliyinin mətbuat xidmətinin rəhbəri Elsevər Salmanov məlumat verib. Toplantıda Azərbaycanın iqtisadi inkişaf naziri Şahin Mustafayev, Azərbaycanın Ankaradakı Fövqəladə və Səlahiyyətli səfiri Faiq Bağırov və Türkiyədə fəaliyyət göstərən azərbaycanlı iş adamları iştirak ediblər.

Toplantını giriş sözü ilə açan səfir Faiq Bağırov, Türkiyədə Fəaliyyət Göstərən Azərbaycanlı İş Adamları Birliyi kimi mühüm bir təşkilatın yaradılmasının önəmindən, dövlətimizin iş adamlarının fəaliyyətlərinə olan dəstəyindən, Ümummilli Lider Heydər Əliyevin Türkiyə və Azərbaycan əlaqələrinin inkişafında olan müstəsna rolundan, Türkiyənin Azərbaycan üçün sahib olduğu xüsusi mövqedən və bu kimi fəaliyyətlərin iki ölkə arasında olan əlaqələrin inkişafına verəcəyi mühüm töhfədən bəhs edib.

Daha sonra Türkiyədə Fəaliyyət Göstərən Azərbaycanlı İş Adamları Birliyinin yaradılmasının məqsədləri, onun vəzifə və funksiyaları barədə tədbir iştirakçılarına təqdimat nümayiş etdirilib. Qeyd edilib ki, birliyin məqsədi Türkiyədə fəaliyyət göstərən azərbaycanlı iş adamlarını bir yerə toplayaraq onların fəaliyyətlərinin əlaqələndirilməsi, yeni investisiyaların təşviq edilməsi, üzvlərin üzləşdiyi çətinliklərin həll edilməsi, dövlət qurumları ilə münasibətlərdə azərbaycanlı sahibkarların vahid orqan olaraq təmsil edilməsidir.

Daha sonra Birliyin nizamnaməsi barədə ətraflı müzakirələr aparıldı və sözügedən sənəd yekdilliklə qəbul edildi. Bununla yanaşı, yığıncaqda Birliyin İdarə Heyəti və Təftiş Komissiyasının tərkibi təsdiq edildi. ARDNŞ-ın Türkiyədəki nümayəndəliyinin rəhbəri Seymur Ağayev İdarə heyətinin sədri seçilib. Tədbirdə çıxış edən Azərbaycanın iqtisadi inkişaf naziri Şahin Mustafayev Azərbaycan ilə Türkiyə arasında əlaqələrin yüksələn xətt ilə inkişaf etdiyini və yaradılan Birliyin bu əlaqələrin inkişafına öz töhfəsini verəcəyinə əmin olduğunu bildirib. İqtisadi inkişaf naziri əsası Heydər Əliyev tərəfindən qoyulmuş iqtisadi inkişaf strategiyasının uğurla həyata keçirilməsi nəticəsində Azərbaycanın əldə etdiyi nailiyyətlər barədə ətraflı məlumat verib.

Qeyd edilib ki, Azərbaycan prezidenti İlham Əliyev tərəfindən müvəffəqiyyətlə davam etdirilən iqtisadi siyasət nəticəsində ölkəmizin iqtisadi qüdrəti artmış və Azərbaycan regionda aparıcı qüvvələrdən birinə çevrilmişdir. Hazırda, ölkə rəhbərliyinin müəyyən etdiyi strategiyaya uyğun olaraq azərbaycanlı iş adamları xarici ölkələrə sərmayələr yatıraraq Azərbaycan biznesinin genişlənməsinə, ölkənin iqtisadi gücünün daha da artmasına xidmət edirlər.

Bu baxımdan, Türkiyədə Fəaliyyət Göstərən Azərbaycanlı İş Adamları Birliyinin yaradılmasının da indiki dövrdə baş verməsi təsadüfi deyil. Ş.Mustafayev bildirib ki, hazırda Türkiyədə minlərlə azərbaycanlı sahibkarın fəaliyyət göstərməsi, burada xarici sərmayəli müəssisələrə yatırılmış investisiyalara görə Azərbaycanın aparıcı yer tutması məhz dövlətimizin artan iqtisadi qüdrətinin əyani nümunəsidir.

Ədalət.- 2011.- 16 aprel.- S. 6.