Erməni mövqeləri "bombardman" edildi

Azərbaycan-Türkiyə birliyi qarşısında Sərkisyan diplomatiyası aciz qaldı

AŞPA-nın yaz plenar sessiyasında işğalçı Ermənistan tərəfinin mövqeləri sözün həqiqi mənasında darmadağın edildi. Son vaxtlar daxili gərginlik yaşayan və bunu cəbhə xəttindəki həyasızlıqla kompensasiya etməyə çalışan Sərkisyan hökuməti Azərbaycan-Türkiyə birliyi tərəfindən "bombardman" edildi.

Ermənilərin törətdiyi insanlıq faciəsi

Sessiyada ilkin olaraq 9 yaşlı Fariz Bədəlovun Ermənistan silahlı qüvvələri tərəfindən qətlə yetirilməsi ilə bağlı yazılı bəyanat qəbul olundu. Yazılı bəyanatı AŞPA-nın müxtəlif ölkələrdən olan 20-dən artıq üzvü imzaladı. Bəyanatda bu il martın 8-də Ağdam rayonunun Orta Qərvənd kəndinin 9 yaşlı sakini Fariz Bədəlovu öz evlərinin həyətində oynayan zaman erməni silahlı qüvvələri tərəfindən snayperlə hədəf alaraq qətlə yetirilməsinin beynəlxalq hüquq norma və prinsiplərinə zidd olmaqla yanaşı, bir insanlıq faciəsi olduğu göstərilir: "Ermənistan Silahlı Qüvvələrinin atəşkəs rejimini tez-tez pozaraq işğal etdiyi Azərbaycan bölgələrində qurduqları mövqelərdən dinc azərbaycanlıları snayperlə hədəfə almasının artması beynəlxalq hüquqa zidd olmaqla yanaşı, Ermənistanın AŞ qarşında üzərinə götürdüyü öhdəliklərə, AŞ PA-nın 1416 saylı Qətnaməsinə tamamilə ziddir və münaqişənin tənzimlənməsinə dair ATƏT-in Minsk qrupunun vasitəçiliyi ilə aparılan danışıqlar prosesinə zərbədir".

Faş olan aeroport xülyası

AŞ PA-nın yaz plenar sessiyası çərçivəsində Ermənistandan işğal etdiyi Azərbaycan ərazilərində aeroport tikintisini dayandırmağı tələb edən ayrıca yazılı bəyanat da qəbul olunub. Sənəddə Ermənistan tərəfindən işğal etdiyi Azərbaycan torpaqlarında, işğal altında olan Dağlıq Qarabağ bölgəsində aeroport tikintisinin həyata keçirilməsinin bütün beynəlxalq hüquq normalarına zidd olduğu vurğulanır və rəsmi Yerevandan onun tikintisini dayandırmaq tələb olunur: "Ermənistan işğal etdiyi Azərbaycan torpaqlarında, işğal altında olan Dağlıq Qarabağ bölgəsində bütün beynəlxalq hüquq normalarına zidd olaraq, aeroport tikintisini həyata keçirir. Rəsmi Yerevanın bu addımları beynəlxalq hüquq normaları ilə yanaşı, BMT Təhlükəsizlik Şurasının Azərbaycanın işğal olunmuş ərazilərinin azad edilməsinə dair 4 qətnaməsinə, Ermənistanın AŞ qarşısında üzərinə götürdüyü öhdəliyə və AŞ PA-nın qəbul etdiyi 1416 saylı qətnaməyə tamamilə ziddir. Azərbaycanın işğal olunmuş ərazilərində aeroport tikintisinin həyata keçirilməsi Dağlıq Qarabağ münaqişəsinin sülh yolu ilə tənzimlənməsinə dair ATƏT-in Minsk qrupunun vasitəçiliyi ilə aparılan danışıqlar prosesinə də böyük bir zərbədir. Bütün bunları nəzərə alaraq, AŞ PA Ermənistanın işğal etdiyi Azərbaycan torpaqlarında aeroport inşa etmək addımını qətiyyətlə pisləyir."

Türkiyə baş nazirindən sərt bəyanat

Sessiyada erməni mövqeyinə son sərt zərbə Türkiyə Respublikasının baş naziri Rəcəb Tayyib Ərdoğandan gəldi. Ərdoğan Avropa Şurası Parlament Assambleyasının yaz sessiyasında çıxışı zamanı səsləndirib. Ərdoğan erməni nümayəndələrinin türk-erməni protokolları, Dağlıq Qarabağın ön şərt kimi irəli sürülməsi, Qarsdakı abidənin sökülməsi qərarı ilə bağlı suallarını cavablandırıb. Onun sözlərinə görə, sərhədlərin açılması və ya bağlı qalması məsələsində Ermənistan xalqının hüquqlarının qorunması ilə bağlı Türkiyənin öz düşüncəsi və öhdəlikləri var.

Ərdoğan deyib ki, 2009-cu ilin oktyabrında Sürixdə Ermənistanla protokolların imzalanmasının əsas məqsədi məhz Dağlıq Qarabağ münaqişəsinin həllinə yardım etmək olub: "Öncə bu addımların atılması lazımdır. Belə olan halda biz sərhədləri açmağa hazırıq. Bu səbəbdən biz Minsk Qrupu həmsədrlərini davamlı olaraq öz vəzifələrini yerinə yetirməyə səsləyirik. Amerika, Fransa və Rusiya bu vəzifəni yerinə yetirdiyi vaxt çözümə nail ola bilərik. Lakin onlar bu addımları atmadığı halda təbii ki, çətinliklərlə qarşılaşacağıq". Ərdoğan bir daha bildirib ki, Türkiyədə 70 min erməni vətəndaşı var. Bundan əlavə, 40 min erməni isə Türkiyədə qanunsuz olaraq yaşayırlar: "Biz onları ölkəmizdən çıxarıb Ermənistana yollamırıq. İstəsək göndərə bilərik. Niyə? Çünki imkansız olduqları üçün Türkiyəyə üz tutublar. Onlar indi də Türkiyədədirlər. Bəlkə bunları da bilmirsiniz. Bunları bilmənizi istəyirəm. Protokolları imzalayarkən buradakı problemlərin həllini tapmaq üçün belə bir addım atdıq. Mən də görüşlərin bəlli nöqtəsində iştirak etdim. Lakin Ermənistan rəhbərliyinin bu nöqtədə erməni diasporuna münasibətdə bir qorxu keçirtdiyini görürəm. Bizim isə kimsədən heç bir qorxumuz yoxdur. Əgər Ermənistan hakimiyyəti diasporaya qarşı qorxunu ata bilsə, bu işi həll etmək daha da asanlaşacaq. Bu edildiyi anda həmən sərhədlər də açılar, problemlərin həlli də sürətlə irəliləyər. Bizim Ermənistana qarşı kin və nifrətimiz yoxdur. Bunu da xatırlatmaq istəyərdim". Baş nazir ortaya konkret mövqe qoyub": Açıq deyirəm, dost və qardaş Azərbaycanın haqqını, hüququnu Ermənistana yedirtmərik".

Bir sözlə AŞPA-nın son iclası bütün cəbhə boyu erməni diplomatiyasının məğlubiyyəti kimi yadda qaldı. Zaman artıq bu qələbənin hərbi müstəviyə keçirilərək Azərbaycan torpaqlarının azad olunmasına doğru gedir.

Çingiz

Ədalət.- 2011.- 19 aprel.- S. 3.