"Dəyirmi masa" keçirildi

Azərbaycan Jurnalist Qadınlar Assosiasiyası aprel ayının 18-də Beynəlxalq Mətbuat Mərkəzində 9 yaşlı Fariz Bədəlovun qətlə yetirilməsinin qırxıncı günündə günahsız qətlə yetirilmiş şəhidimizin timsalında ermənilər tərəfindən 20 il müddətində sərhəd bölgələrində, Qarabağda vəhşicəsinə öldürülmüş azyaşlı vətəndaşlarımızın hüquqlarının tapdanmasının müzakirəsinə həsr edilmiş dəyirmi masa keçirdi.

Dəyirmi masada millət vəkilləri, jurnalist qadınlar, ziyalılar, ictimai xadimlər iştirak etdilər. Tədbirə sədrlik edən Azərbaycan Jurnalist Qadınlar Assosiasiyasının prezidenti Sevil Yusifova bu hadisəni atəşgah dövründə ermənilər tərəfindən atılmış növbəti vandalizm kimi qiymətləndirdi. Və indiyə kimi ermənilər tərəfindən qətlə yetirilmiş uşaqların ruhunu bir dəqiqəlik sükutla yad etməyi təklif etdi. Sonra S.Yusifova bildirdi ki, Azərbaycan torpaqlarının 20 %-ni işğal altında saxlayan Ermənistan Respublikası və onun təcavüzkar silahlı qüvvələrinin hərbçiləri azyaşlı uşaqlara yönəlik bu cür amansız qətl faktları ilə insanlığa, bəşəri dəyərlərə, humanizm prinsiplərinə düşmən olduqlarını bir daha dünyaya sübut etdilər. "Ancaq bizi təəssüfləndirən odur ki, dünyanın gözü qarşısında baş verən bu qanlı olaylara, məsum uşaqlara qarşı aparılan vandalizm siyasətinə özlərinə "demokratik don" geyindirən qərb hələ də siyasi qiymət verməyib. Nüfuzlu beynəlxalq uşaq təşkilatları da doqquz yaşlı Farizin qətlə yetirilməsini indiyə kimi qınamayıblar. Bu ikili standartlar həmin dövlətlərin demokratik düşüncə tərzlərindən uzaq olmalarını ortaya qoyur".

Tanınmış publisist, filologiya elmləri namizədi Sona Vəliyeva qeyd etdi ki, 9 yaşlı Farizin atəşkəs zamanı öldürülməsinə göz yumursa, qarışmırsa, o zaman Qərb, dünya arenası Azərbaycanın heç bir daxili işinə qarışmasın. "20 ildə qaçqınlarımız oldu, körpələr, gəlin qızlar öldürüldü. Bu ağrıları ürəyimizə salıb dözdük. Bu, müharibənin qanunundur. Ancaq atəşkəs zamanı məqsədyönlü şəkildə 9 yaşlı oğlanın öldürülməsi artıq müharibə qanunu deyil". S.Vəliyeva Azərbaycan reallıqlarının dünya ictimaiyyətinə çatdırılmasının yeni metodlarının tapılmasını, təbliğat vasitələrinin yenilənməsini olduqca vacib sayıb.

Dəyirmi masaya qatılan digər qonaqlar- redaktorlar, yazarlar bu hadisəni dəhşətli fakt kimi qiymətləndirdilər və tədbirin sonunda hazırlanacaq bəyanata öz təkliflərini verdilər.

Daha sonra dəyirmi masada bəyanat oxundu.

Ədalət.- 2011.- 19 aprel.- S. 3.