Xələf Xələfov: "Dövlət başçılarının son Bakı sammiti gələcək tərəqqi üçün zəmin yaradır"

"Dövlət başçılarının son Bakı sammiti gələcək tərəqqi üçün zəmin yaradır". APA-nın məlumatına görə, bu fikirləri Azərbaycan xarici işlər nazirinin müavini Xələf Xələfov Bakıda Xəzərin hüquqi statusuna dair konvensiyanın hazırlanması üzrə işçi qrupun iclasında çıxışı zamanı deyib. Onun sözlərinə görə, tərəflər Xəzərdə təhlükəsizliyin təmini, ekoloji problemlərə müştərək yanaşma, həmçinin hövzə ehtiyatlarının birgə mühafizəsi kimi məsələlərdə ortaq məxrəcə gəlirlər.

Rusiya Xarici İşlər Nazirliyinin xüsusi tapşırıqlar üzrə səfiri Aleksandr Qolovin isə xatırladıb ki, Xəzərətrafı dövlət rəhbərlərinin növbəti zirvə görüşü Moskvada baş tutacaq və bu sammitə sanballı sənədlər hazırlanmalıdır. İran prezidentinin Xəzər məsələləri üzrə xüsusi nümayəndəsi Məhəmməd Mehdi Axundzadə qeyd edib ki, "indi prezidentlər bizdən daha çox nəticə gözləyirlər". İran rəsmisinin sözlərinə görə, dövlət başçıları cari ilin sonuna kimi Xəzərin hüquqi statusuna dair konvensiyanı hazır görmək istəyirlər.

İclasda çıxış edən Qazaxıstan və Türkmənistan təmsilçilər isə son Bakı sammitinin qərarlarını yüksək qiymətləndirərək növbəti zirvə görüşünün məhsuldar olmasının işçi qrupun fəaliyyətindən asılı olduğunu deyiblər. Qazaxıstan xarici işlər nazirinin müavini Sarbay Kayrat Xəzərin hüquqi statusuna dair konvensiyanın hazırlanması üzrə işçi qrupunun növbəti iclasının yayda Qazaxıstanda keçirməyi təklif edib. Lakin Rusiya təmsilçisi Aleksandr Qolovin prezidentlərin sammitinin Moskvada keçiriləcəyini xatırladaraq işçi qrupun da iclasını məhz Moskvada keçirməyə dair təklif irəli sürüb. İclasda çıxış edən natiqlər prezidentlərin Moskvada keçiriləcək növbəti sammitinə kimi konvensiya layihəsini razılaşdırmaq üçün səy göstərəcəklərini vurğulayıblar.

Xatırladaq ki, bu gün Bakıda Xəzərin hüquqi statusuna dair konvensiyanın hazırlanması üzrə işçi qrupun iclası başlayıb. Azərbaycan, Rusiya, Qazaxıstan, İran və Türkmənistan rəsmilərinin qatıldığı iclasda konvensiya layihəsinin razılaşdırılması, həmçinin prezidentlərin Bakı sammitində qəbul etdiyi protokol qərarların icrası müzakirə olunur.

Ədalət.- 2011.- 27 aprel.- S. 2.