"Vətən mücadiləsi"

Tanınmış yazıçı-publisist, fəlsəfə doktoru Akif ƏLİ-nin növbəti kitabında əsas etibarilə müəllifin son dövrlərdə qələmə aldığı və müxtəlif kiv-lərdə işıq üzü görmüş elmi-bədii publisistik yazıları toplanmışdır. Burada ictimai-siyasi proseslərə həsr olunmuş dəyərli məqalələrlə yanaşı, müasir həyatımızın müxtəlif sahələrini əhatə edən aktual yazılar da yer almışdır.

Demokratik cəmiyyət şəraitində dövlət və mədəniyyət münasibətləri, filoloji, kulturoloji problemlər, vətəndaşların həyatında mədəniyyət faktorunun yerinin müəyyənləşdirilməsi və s. bu kimi elmi-nəzəri mülahizələrin kütləvi oxucuya anlaşıqlı olan sadə publisistik dildə, müxtəlif bədii ifadə vasitələrinin və dolğun obrazların köməyilə təqdim edilməsi, həmçinin klassik və müasir ədəbi-mədəni dəyərlərə yazıçının özəl münasibəti, polemik xarakterli fikir-düşüncələri və fərqli baxışları "Vətən mücadiləsi" kitabına marağı artıran cəhətlərdəndir.

Onu da xatırladaq ki, Akif Əli maraqlı yaradıcılıq keçmişdir. O, Azərbaycanın Şuşa şəhərində 22 fevral 1952-ci ildə doğulmuş, M.F.Axundov adına Azərbaycan Dövlət Rus dili və Ədəbiyyatı İnstitutunu (1974) bitirmişdir. Sonra "M.Ə.Sabirin satira sənətkarlığı" mövzusunda dissertasiya müdafiə edib (1988).

Filologiya elmləri üzrə fəlsəfə doktorudur.

"Qızıl qələm" mükafatı laureatı, Azərbaycan Jurnalistlər Birliyinin üzvüdür (1981).

1994-cü ildən Azərbaycan Respublikası Nazirlər Kabinetinin Mətbuat xidmətinin rəhbəri vəzifəsində çalışır.

3-cü dərəcə Dövlət müşaviridir (2009).

Akif ƏLİ yaradıcılıq həyatına 1974-cü ildə "Azərbaycanfilm" Kinostudiyasında rejissor assistenti kimi başlayıb. Sonra bir neçə bədii filmdə əsas obrazları yaradıb:

- "Uzun müharibədə qısa görüşlər" filmində Rüstəm ("Tacikfilm" və "Lenfilm" kinostudiyalarının birgə istehsalı, 1974-75);

- "Tütək səsi" filmində Tapdıq ("Azərbaycanfilm" kst., 1975);

- "Əgər biz bir yerdəyiksə" televiziya filmində Məmməd (Mərkəzi TV, 1976);

- "Arxadan vurulan zərbə" filmində Fazil müəllim ("Azərbaycanfilm" kst., 1977) və b.

1978-ci ildə Azərbaycan Dövlət Tele-Radio Verilişləri Komitəsinə daimi işə keçib və 1987-ci ilə kimi burada çalışıb:

- Radionun "Satira və yumor" şöbəsinin müdiri vəzifəsində işləyərkən (1981-1983) bir neçə populyar radio verilişinin ("Sabahınız xeyir", "Molla Nəsrəddin", "Gülüş axşamı");

- Televiziyanın Gənclər üçün proqramlar baş redaksiyasının Baş redaktoru vəzifəsində çalışarkən isə bir sıra populyar televiziya proqramlarının ("Zəriflik" İncəsənət toplusu, "Aygün" Qızlar üçün proqram, "İdrak" Elmi-kütləvi proqram, "Tələbə dünyası", "7 sual, 7 cavab" Televiktorinası, "Teleteatrda gənclər gecəsi", "Çay, çay, çay!", "Gənclik" jurnalı, "Mənəvi dünyamız") - yaradıcısı, müəllifi, yaxud redaktoru olub.

1990-cı ildə müasir dövrün ilk müstəqil demokratik mətbu orqanlardan olan "Vətən səsi" qəzetinin yaradılmasında bilavasitə iştirak edib, 1991-93-cü illərdə həmin qəzetin Baş redaktoru olub. Ölkə mətbuatında Sovet hakimiyyətinin Azərbaycana qarşı yürütdüyü məkrli siyasəti, Kremlin xəyanətkarlığı, Azərbaycanın imperiya buxovlarından azad olunması, Ermənistanın torpaqlarımıza hərbi təcavüzü, yüz minlərlə qaçqın soydaşımızın ağrı-acıları, Qarabağ probleminin mahiyyətinə dair həqiqətlər, demokratikləşmə prosesi, söz, mətbuat azadlığı və s. bu kimi aktual mövzulu məqalələrlə çıxış edib.

Eyni zamanda elmi-pedaqoji fəaliyyətlə məşğul olan Akif ƏLİ Bakı Sosial İdarəetmə və Politologiya institutunda (indiki Dövlət İdarəçilik Akademiyası) Kulturologiya kafedrasının müdiri işləyib (1992-94), "Dünya mədəniyyətinin tarixi və nəzəriyyəsi", "Azərbaycan mədəniyyətinin tarixi" kurslarından mühazirələr oxuyub.

Çoxlu sayda elmi-bədii-publisistik əsərlərin, məqalə və ssenarilərin; 12 kitabın ("Gözəlliyin qədrini bilək"-1984, "Azərbaycanın müasir kinoaktyorları"-1984, "Unudulmaz yollar" - 1985, "Buna kim inanar"-1986, "Məhəbbət təranələri"-1989, "Qaragöz oyunu"-1999, "M.Ə.Sabirin satira sənətkarlığı"-1999, "Öncə vətəndir"-2003, "Ədəbiyyat haqqında düşüncələr"-2004, "Böyük ömrün anları"-2004, "Üçüncü yazı"-2006, "İdrak"-2007); bir çox tərcümə əsərlərinin (A.Hertsen - "Olmuşlar, düşüncələr", V.Mayakovski-"Taxtabiti", M.Zoşşenko - "Nəhs günü", C.B.Molyer - "Meşşanın zadəganlığı", A.Soljenitsin - "Matroyanın ocağı", A.Çexov -"Hekayələr", Qrim qardaşları -"Bremen musiqiçiləri", Mitsuko Takaxasi - "Kəpənək mövsümü" və s.) müəllifidir.

Ailəlidir, iki övladı var.

Ədalət.- 2011.- 30 aprel.- S. 18.