"AZƏRBAYCAN XALÇALARI QARABAĞ QRUPU"

Son illər Azərbaycan mədəniyyətinə, incəsənətinə diqqətin artırılması, bu sahədə yeni ədəbi nümunələrin, xüsusilə beynəlxalq aləmə təqdim etmək üçün ingilis, rus, fransız və digər dillərdə nəşr edilən kitablar, ilustrasiyalı ədəbi nümunələr xeyli artıb. Bu sahədə Heydər Əliyev Fondunun, xüsusilə ölkənin birinci xanımı, millət vəkili, YUNESKO-nun, İSESKO-nun xoşməramlı səfiri Mehriban Əliyevanın qayğısı ilə Qarabağ xanəndələrinin, xüsusilə muğam ifaçılarının disklərinin geniş təbliği, xarici ölkələrdə sərgilərimizin təşkili, bir sözlə, mədəniyyətlə, incəsənətlə bağlı atılan hər bir addım böyük hadisə kimi diqqəti çəkir.

Təbii ki, görülən bu işlər həm müstəqil Azərbaycanın və həm də bütövlükdə Azərbaycan xalqının zəngin tarixinin, onun böyük bir elmi, mədəni varislik hüququna malik olmasını dünyaya nümayiş etdirir. Əleyhdarlarımızın əks təbliğatına baxmayaraq, Azərbaycan mədəniyyəti, incəsənəti və bütövlükdə Azərbaycan varlığı öz sözünü böyük dünyaya deyir.

Ötən ilin sonlarında Azərbaycanın tanınmış xalça mütəxəssislərindən biri olan "Azər-İlmə" Məhdud Məsuliyyətli Cəmiyyətin təsisçisi, "Sehirli qalereyası" təşkilatlarından biri olan Vidadi Aydın oğlu Muradovun zəhməti sayəsində işıq üzü görmüş "Azərbaycan xalçaları Qarabağ qrupu" kitabı nəşr olunmuşdur. "Elm" nəşriyyatı tərəfindən sənətşünaslıq doktoru Kübra Əliyevanın elmi redaktorluğu ilə 272 səhifə halında çap edilmiş, paralel olaraq ingilis dilində də bütün materiallar təqdim edilməklə geniş oxucu auditoriyasına təqdim edilən kitab bir neçə fəsildən ibarətdir.

Bu kitabda xalçaçılıq sənətin Qarabağ qrupu - Cəbrayıl, Ağdam, Qubadlı, Xocalı, Füzuli, Xocavənd, Xankəndi, Bərdə və digər rayonlar üzrə təqdim edilmişdi. Özü də xalçaların da şəkili təqdim edilən kitabda bütün ilmə-naxışlar izahlı şəkildə dövrləri göstərilməklə oxuculara çatdırılmışdı. Hətta bu kitabda şəxsi evlərdən əldə edilmiş və yaxud xalqımızın tanınmış şəxsiyyətlərinə hədiyyə olunmuş xalçaların da görüntüsü və ilmə-naxışları təqdim olunmuşdu.

Düşünürük ki, Vidadi Muradovun ikinci dəfə daha da geniş və nəfis şəkildə təqdim etdiyi bu kitab təkcə Azərbaycan xalçalarının sirlərini öyrənmək, onun tarixinə baş vurmaq üçün yox, həm də Qarabağın Azərbaycana məxsusluğunu birmənalı şəkildə sübut etmək baxımından da çox dəyərli bir işdi. Buradakı Şuşanın, Ağdamın, Xocalının və digər Qarabağ şəhərlərinin, kəndlərinin, rayon mərkəzlərinin xalçaçı qız-gəlinlərinin əl işləri əsrləri keçməklə gəldiyi bu uzun yolda öz sənət keyfiyyətini, sənətkarlıq mahiyyətini itirməmiş, əksinə, kamilliyini sübut etmişdi.

Son olaraq onu da xatırladaq ki, bu cür kitabların mədəniyyətimizin digər sahələri ilə bağlı da işıq üzü görməsi, özü də onların beynəlxalq aləm üçün nəzərdə tutulması bizim həm siyasi, həm də ictimai fikir tariximizə, onun təntənəsinə töhfə ola bilər. O ki, qaldı Vidadi Muradovun işinə, bu sadəcə xalq qarşısında təşəkkürə layiq bir xidmətdir.

Əbülfət MƏDƏTOĞLU

Ədalət.- 2011.- 30 aprel.- S. 18.