BƏRDƏ: MƏDƏNİYYƏT SİSTEMİNDƏ ƏNƏNƏ VƏ MÜASİRLİK

Bərdə həqiqətən onu sevənlərin şəhəridir

Bu gün Bərdədə çox böyük quruculuq işləri gedir. Bütün bunlar diqqət mərkəzindədir və bərdəlilərin icra başçısı Vidadi İsayevin çağırışına elliklə qoşularaq fədakarlıqla çalışması səmimiliyin, birliyin məntiqi nəticəsidir. Rayon, xüsusilə Bərdə şəhəri artıq aydan-aya deyil, gündən-günə dəyişir, inkişaf edir. Mən 4 ay bundan əvvəl "Bərdə - onu sevənlərin şəhəridir" başlıqlı iri həcmli yazımda bu haqda geniş söhbət açmışam və həmin mövzuya təkrar qayıdacağım da istisna deyil.

Burada Qarabağın özünəməxsusluğu yaşanır

Qədim Bərdə həm də Qarabağın mədəniyyət mərkəzlərindən biridir. Tikinti-abadlıq və modern müasirləşmə tədbirləri fonunda bu mövzu da aktuallığını saxlayır. Əslində Bərdə Rayon İcra Hakimiyyətinin başçısı Vidadi İsayevin özü də bu rayona rəhbər təyin olunan ilk günlərdən sahənin fəaliyyəti ilə yaxından maraqlanmış və necə deyərlər, illərlə diqqətdən kənarda qalmış çox mühüm bir layihənin aşkara çıxarılaraq reallaşmasına nail olmuşdur. Bu ən müasir və modern bir mədəniyyət mərkəzinin proyektidir ki, artıq tikintisinə hazırlıq işləri görülür.

Geniş bir mədəniyyət şəbəkəsi

Bərdə rayon mədəniyyət və turizm şöbəsi sistemində 1 rayon mədəniyyət evi, 1000 yerlik şəhər mədəniyyət sarayı, 5 şəhər klubu, 33 kənd mədəniyyət evi, 72 kənd klubu, 1 mədəniyyət və istirahət parkı, Heydər Əliyev Mərkəzi, tarix-diyarşünaslıq muzeyi, rəsm qalereyası, rayon kino birliyi, mərkəzi rayon kitabxanası, rayon uşaq kitabxanası, 55 kitabxana filialı, 7 uşaq musiqi, incəsənət və rəssamlıq məktəbi fəaliyyət göstərir.

Mədəniyyət və turizm şöbəsi üzrə 2011-ci ilin yarım ili ərzində 7630 manat məbləğində əsaslı təmir işləri, 8850 manat məbləğində isə cari təmir işləri aparılmışdır. Rayon mədəniyyət evində, rayon uşaq kitabxanasında təmir işləri görülmüşdür.

Mədəniyyət müəssisələrinin maddi-texniki vəziyyəti xeyli yaxşılaşdırılmışdır. Rayon mədəniyyət evinin köhnə inventar və avadanlıqları yeniləri ilə əvəz edilmiş, otaqlar kondisioner, kompüter, televizor və digər avadanlıqlarla təzhiz edilmişdir. Uşaq musiqi məktəbləri, MKS, tarix-diyarşünaslıq muzeyi, Heydər Əliyev Mərkəzi, rəsm qalereyası və başqa mədəniyyət müəssisələri də inventar və avadanlıqlarla təchiz olunmuşdur.

Hər yerdə, hər zaman "Qarabağ"...

Klub tipli mədəniyyət müəssisələrində xalq yaradıcılığı, özfəaliyyət işinin vəziyyəti xeyli yaxşılaşdırılmışdır. Rayon mədəniyyət evində 2 xalq kollektivi fəaliyyət göstərir. "Qarabağ" ansamblının 15 nəfər, xalq teatrının isə 10 nəfər üzvü var. 221 mədəniyyət özfəaliyyət kollektivi, 12 maraq klubu, 1 texniki yaradıcılıq həvəskar birliyi fəaliyyətdədir. Azərbaycan Respublikası Nazirlər Kabinetinin sərəncamı ilə təsdiq edilmiş "Uşaqların təlim-tərbiyəsinin yaxşılaşdırılması və hüquqlarının qorunması haqqında" Dövlət Proqramının icrası ilə əlaqədar rayonda mədəniyyət və turizm şöbəsi xətti ilə bir sıra işlər görülmüşdür. Eləcə də istedadlı yeniyetmələrin və gənclərin sosial, iqtisadi və s. problemlərinin həllinə yönəlmiş, onların öz qabiliyyətlərinin inkişaf etdirilməsinə kömək edən dövlət proqramının həyata keçirilməsi istiqamətində mədəni-kütləvi tədbirlər hazırlanıb həyata keçirilmişdir.

Bərdə rayon MKS üzrə kitab fondu 55341 nüsxə, oxucuların sayı 35000-48000 nəfər arası dəyişmişdir. Kitabxana fondunun 127666 nüsxəsi latın qrafikalı ədəbiyyatlardır. İl ərzində kitabxanaya 1029 nüsxə kitab daxil olmuş, bunun 514 ədədi hədiyyə edilmişdir.

(ardı gələn sayımızda)

Ədalət.- 2011.- 2 avqust.- S. 3.