"ZAQATALA" SƏKKİZ MİNİNCİ ZİRVƏNİ FƏTH ETDİ

Bu günlərdə qonşu və eyni zamanda həmkar kimi Zaqatalanın rayonun adını daşıyan "Zaqatala" qəzetinin səkkiz mininci nömrəsinin nəşr olunması ilə bağlı keçirilən yubiley tədbirlərinə qatılmaq üçün qəzetimizin digər iki əməkdaşı ilə bərabər bu qədim şəhərdə olduq.

Zaqatalalıları qaxlılarla bir-birinə mehriban qonşuluq əlaqələri ilə yanaşı, möhkəm dostluq münasibətləri, vahid adət-ənənələr birləşdirir. Zaqatala şəhərindəki bugünkü inkişafı seyr etdikcə adamın sinəsi iftixar hissi ilə döyünür. Doğrudur, Respublika Prezidenti İlham Əliyevin rəhbərliyi ilə ölkəmizdə başlanmış genişmiqyaslı quruculuq işləri heç bir bölgədən yan keçməyib, hər yerdə müasir infrastruktur layihələri həyata keçirilir, park və meydanlar salınır, abadlıq işləri görülür. Ölkəmizin qədim yaşayış məskəni, el arasında regionun mədəniyyət mərkəzi kimi tanınan Zaqatala isə bu gün öz tarixi kökləri üzərində sanki yenidən qurulur, müasirləşir, gözəlləşir. Bütün bunlar hər birimizi sevindirir, adamlarda daha xoş gələcəyə inam hissini artırır.

"Zaqatala" qəzeti bölgə qəzetləri arasında öz dəsti xətti, mübarizliyi ilə sayılıb-seçilən qəzetlərdəndir.

Respublikamızın ilk mətbu orqanlarından olan bu qəzet 1923-cü ildən fəaliyyətə başlayaraq öz səhifələrində nəinki Zaqatalanın, qonşu Qax və Balakən rayonlarının da gündəlik ictimai-siyasi həyatını, tarixini yaşatmış, bu günkü nəsillərə çatdırmışdır. Bu qəzet olduqca fədakar, yaradıcı, vətənpərvər insanların sayəsində çətin və şərəfli yol keçərək 1923-1962-ci illərdə "Kolxozun səsi", "Kolxoza doğru", "Bolşevik kolxozu uğrunda", 1962-1991-ci illərdə "Qırmızı bayraq", 1991-ci ildən isə "Zaqatala" adları altında fəaliyyət göstərmişdir.

Bütün bunlar barədə qonşu Qax rayonunun qəzeti olan "Şəlalə" qəzetinin nümayəndələri kimi bizim də iştirak etdiyimiz qəzetin səkkiz mininci nömrəsinin çap olunmasına həsr olunmuş yubiley tədbirində ətraflı söhbət getdi, iştirakçılar qəzetin fəaliyyəti ilə bağlı xatirələrini bölüşdülər. Rayon icra hakimiyyətinin başçısı Mübariz Əhmədzadənin, Respublika Mətbuat Şurasının sədri Əflatun Amaşovun, "İki sahil" qəzetinin baş redaktoru Yeni Azərbaycan Partiyasının Siyasi Şurasının üzvü, Azərbaycan Respublika Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının sədr müavini, əməkdar jurnalist Vüqar Rəhimzadənin, "Kür " qəzetinin baş redaktoru, əməkdar jurnalist Əminə Yusifqızının, "Mingəçevir işıqları" qəzetinin baş redaktoru Fərman Nəbiyevin və qəzetin çoxsaylı oxucularının bir qrup nümayəndələrinin, elm, mədəniyyət sahəsində çalışan bir sıra digər yaradıcı insanların, qonşu rayonlardan dəvət olunmuş qonaqların da iştirak etdiyi tədbirdə qəzetin əsrə yaxın dövr ərzindəki fəaliyyətindən geniş söz açan redaktor, respublikanın əməkdar mədəniyyət işçisi İbrahim İbrahimov 17 il "Zaqatala" qəzetinin redaktoru kimi çalışmış bölgənin tanınmış ziyalısı Əli Süleymanov başda olmaqla, bu, mətbu orqanın keçmiş əməkdaşlarının xidmətlərindən danışdı. Onlara böyük hörmət və ehtiramlarını bildirdi. Uzun illər fasiləsiz fəaliyyət göstərən "Zaqatala"nın keçdiyi çətin və şərəfli yoldan söz açdı. Qəzetə rayon rəhbərliyinin, ictimaiyyətin qayğısından danışan İbrahim müəllim çıxışını belə yekunlaşdırdı:

- Artıq 20 ildir ki, biz müstəqillik ideyasından sonsuz qürurla söhbət açırıq. Bu tarixi nailiyyətdən biz də payımızı ala bilmişik. Söz və mətbuat azadlığından bəhrələnirik, dünya qəzet texnologiyasına yiyələnirik. Həyatımızın, yazılarımızın təməlində nikbinlik, azərbaycanlı olmağın fəxarəti yaşayır. "Zaqatala"mızın 8000-ci yubiley sayı tarixi nailiyyətimiz olan müstəqilliyimizin bərpasının 20 illiyinə təsadüf etdi. Bu da biz "Zaqatala"lıların taleyinə düşən xoşbəxt bir hadisədir.

8000-ci zirvə artıq bizim üçün fəth edilən bir zirvədir. Bir il 3 aydan sonra qəzetimizin 90 illik yubileyi olacaq. Bundan sonra daha bir 1000 sayı xırdalayıb 9000-ci zirvəyə çatacağıq. Yolçu yolda gərək, qələm dostlarım!

Tədbirdə özünəməxsus dəsti- xətti ilə seçilən, milli mətbuatımızın inkişafında müəyyən xidmətləri olan "Zaqatala" qəzetinin fəaliyyətini yüksək qiymətləndirən Azərbaycan Mətbuat Şurasının sədri Əflatun Amaşov genişməzmunlu çıxışında bölgə mətbuatının xarakterik xüsusiyyətlərindən, çətinliklərindən söz açdı. Dövlətimiz tərəfindən digər informasiya vasitələri ilə bərabər bu mətbuatın da inkişafına göstərilən diqqət və qayğıdan danışdı. Qəzetin redaktoru, əməkdar mədəniyyət işçisi İbrahim İbrahimova və bir qrup əməkdaşlara bu mətbu orqanın uzun illər fasiləsiz fəaliyyət göstərərək bölgənin sosial-iqtisadi inkişafının, mədəni həyatının salnaməsinin yaradılmasındakı xidmətlərinə görə və 8000-ci nömrəsinin çapdan çıxması münasibətilə Azərbaycan Mətbuat Şurasının fəxri diplomlarını təqdim etdi, qəzetin kollektivinə xoş arzularını çatdırdı.

Yubiley tədbirində çıxış edən "İki sahil" qəzetinin baş redaktoru, Yeni Azərbaycan Partiyasının Siyasi Şurasının üzvü, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının sədr müavini, əməkdar jurnalist Vüqar Rəhimzadə, "Kür " qəzetinin baş redaktoru, əməkdar jurnalist Əminə Yusifqızı və digərləri qəzetin fəaliyyəti barədə öz təəssüratlarını bölüşdülər, redaksiya kollektivini əlamətdar hadisə münasibətilə təbrik edərək xoş arzularını çatdırdılar.

Mərasimin rəsmi hissəsini yekunlaşdıran Zaqatala RİH-in başçısı M.Əhmədzadə Respublikamızda mətbuatın inkişafına göstərilən diqqət və qayğıdan, "Zaqatala" qəzetinin bölgənin sosial-iqtisadi, mədəni həyatındakı xidmətlərindən, uzun illər bu orqanın fasiləsiz fəaliyyət göstərməsində onun keçmiş əməkdaşlarının, bugünkü kollektivinin fədakar, yaradıcı əməyindən danışdı. Qəzetin yubileyinə gəldiklərinə, onun fəaliyyətinə yüksək qiymət verdiklərinə, kollektivin sevincinə şərik olduqlarına görə, Mətbuat Şurasının sədri Ə.Amaşov, "İki sahil" qəzetinin baş redaktoru V.Rəhimzadə başda olmaqla qonaqlara rayon rəhbərliyi adından minnətdarlığını bildirdi. Kollektivi qəzetin 8000-ci nömrəsinin çapdan çıxması münasibətilə təbrik edərək dedi:

- Biz əminik ki, "Zaqatala" qəzetinin kollektivi bundan sonra da qazanılan uğurları artıracaq, yeni yaradıcılıq axtarışları aparacaq, səmərəli fəaliyyətini davam etdirəcəkdir.

Mübariz Əhmədzadə sonda uzun illər rayon qəzetində səmərəli fəaliyyətlərinə, rayonun ictimai-siyasi həyatının yaradıcılıqla işıqlandırılmasındakı xidmətlərinə görə və 8000-ci nömrəsinin çapdan çıxması münasibətilə redaksiyanın üzvlərinə və bir qrup əməkdaşlarına RİH-in fəxri fərmanlarını və qiymətli hədiyyələrini təqdim etdi.

Yubiley tədbiri rayon mədəniyyət kollektivinin hazırladığı konsert proqramı ilə bir neçə saat davam etdi.

Bəli, "Zaqatala" bu gün özünün səkkiz mininci zirvəsini uğurla fəth etdi. Biz də qonşu Qax rayonunun mətbu orqanı olan "Şəlalə" qəzetinin çoxsaylı oxucuları adından qəzetin kollektivini yubiley münasibətilə səmimi qəlbdən təbrik edir, həmkarlarımıza daha böyük yaradıcılıq uğurları diləyirik.

Novruz ŞABANOV, Qax rayonunda nəşr olunan "Şəlalə" qəzetinin redaktoru

Ədalət.-2011.-6 dekabr.-S.7.