Arxada qalan uğurlu il

Ən müxtəlif qayğılarla, ümidlərlə dolu daha bir il tarixin arxivinə verilməkdədir. Bir an kimi keçən bir il tarixi baxımdan elə də böyük zaman deyil. Ancaq hər saatı, hər günü qayğılar, sevinclər, uğur və uğursuzluqlarla müşayət edilən vaxt, zaman, nəhayət, son anda ilə çevrilən tarix elə də qısa olmur deyəsən. Və bu "bir illər" insan ömründə kifayət qədər tutumlu zamandır. Elə insan ömrünə sığınan dünyanın, həyatın inkişafı şübhəsiz insanlara da minnətdar olmalıdır.

İnsanların qurub-yaratdığı, bəzən müxtəlif səbəblərdən nəyəsə də nail ola bilmədikləri, ancaq ümumən sabaha isti bir nəfəslə apardıqları Cəlilabad rayonu daha uğurlu bir ili arxada qoymaqdadır. Torpağa bağlı əməksevər insanları olan bu rayonun çiyinlərinə məsuliyyətli bir yük də düşüb. Xeyli ərazisi İran islam Respublikası ilə həmsərhəd Cəlilabad siyasi rejimi başqa olan dövlətin təsirlərindən də qorunmalıdır. Heç şübhəsiz ki, bütün bunlara tarazlıq gətirməklə yaşamaq elə də asan deyil.

Bütün bunlarla bərabər 200 mindən çox əhalisi olan Cəlilabad rayonu xeyli müvəffəqiyyəti olan daha bir ili arxada qoymaqdadır.

Rəsmi rəqəmlər nə deyir

Ümumiyyətlə Azərbaycan Respublikası üçün uğurlu olan 2011-ci il Cəlilabad rayonu üçün də eyniyyət təşkil edir. "Azərbaycan Respublikası regionların 2009-2013-cü illər üçün sosial-iqtisadi inkişafı Dövlət Proqramı"nın həyata keçirilməsi istiqamətində Cəlilabad rayonunda da iqtisadi sahədə bir sıra uğurlar qazanılmışdır. Tikinti-abadlıq işləri davam etdirilmiş, əhalinin sosial qayğılarının həlli yolunda əsaslı tədbirlər görülmüşdür. Təkcə bu ilin 9 ayı ərzində Cəlilabad rayonunda ümumi məhsul buraxılışının həcmi 365 milyon 721 manat olmuşdur. Hər nəfərə düşən məhsul istehsalının miqdarı da böyüyərək 1850 manata yüksəlmişdir. 2010-cu ilin müvafiq dövrü ilə müqayisədə istehsalın həcmi 17,8 faiz çox olmuşdur. Ötən müddət ərzində sənaye sahələrində 4 milyon 124 min manatlıq məhsul istehsal edilmişdir.

Rayon iqtisadiyyatının əsasını təşkil edən aqrar sahədə də kifayət qədər irəliləyişlər var. Cəlilabadda bu müddət ərzində kənd əməkçiləri tərəfindən 114,2 min ton taxıl, 79,1 min ton kartof, 1,7 min ton tərəvəz, 369 ton bostan məhsulu, 1369 ton meyvə, 3200 ton üzüm, 176 ton günəbaxan, 216 ton qarğıdalı istehsal edilmişdir.

Heyvandarlığın inkişafı diqqət mərkəzində saxlanılmışdır. Nəticədə iri buynuzlu mal-qaranın sayı 98907 başa, xırda buynuzluların sayı isə 122 min başa çatdırılmışdır. Cari ilin 9 ayı ərzində 8746 ton ət, 47397 ton süd, 15 milyon 103 min ədəd yumurta, 318 ton yun əldə edilmişdir.

"Aqrolizinq" Səhmdar Cəmiyyətinin rayondakı aqroservis müəssisəsi kənd sakinlərinə yaxşı xidmət göstərməyə davam etmişdir. Sonda rayona 23 ədəd müxtəlif təyinatlı kənd təsərrüfatı maşınları gətirilmişdir. Kənd təsərrüfatı istehsalçılarına büdcə vəsaiti hesabına 2 milyon 661 min manat subsidiya verilmişdir. Torpaq sahiblərinə güzəştli şərtlər daxilində 500 ton azot, 160 ton kalium gübrələri satılmışdır.

Cəlilabadın abadlığı da daim gündəmdədir

Bütün ölkədə olduğu kimi son illər Cəlilabad rayonunda da tikinti-abadlıq, quruculuq işlərinin miqyası kifayət qədər genişləndirilmişdir. Cəlilabad şəhərində Heydər Əliyev adına Yaradıcılıq Mərkəzi, Dövlət Bayrağı Meydanı, Qaz İstismarı idarəsi, Hərbi məhkəmənin inzibati binası inşa edilib istifadəyə verilmişdir. Hazırda bu istiqamətdə işlər davam etdirilir. Olimpiya İdman Kompleksi, Rayon baytarlıq İdarəsi, Göytəpə Yanğın Xidməti bölməsinin inzibati binaları tikilib başa çatdırılmaq üzrədir. Rayonun ən böyük küçələrindən olan Qurtuluş küçəsində yolun ətrafındakı hasarlar müasir görkəmdə yenidən qurulur.

Cəlilabadda yolların, küçələrin təmir olunaraq müasir görkəmə salınması əsas qayğılardan olmuşdur. Alar və Günəşli kəndlərində daxili yollar əsaslı təmir edilmişdir. Cəlilabaddan Yardımlıya uzanan yolun 18 kilometri asfaltlaşdırılmışdır. Şəhərin özündə də daxili yollara 39,9 min kvadrat metr asfalt vurulmuş, 6,6 min kvadrat metr sahəyə çınqıl döşənmişdir. 2011-ci ilin 3-cü rübünün sonuna kimi rayonda ekoloji tarazlığı qorumaq üçün Cəlilabadın yaşayış məntəqələrində 26 min, Ələt-Astara magistral yolunun kənarlarında isə 15 min ağac əkilmişdir. Bu proses indi də davam etdirilir.

Torpaq uğrunda şəhid olanların ailələrinə, Qarabağ müharibəsi əlillərinə daim yüksək qayğı göstərən Cəlilabad rəsmiləri son 5 il ərzində onlar üçün bir 36, iki 16 mənzilli yaşayış evləri tikmişlər. Kəndlərdə yaşayan 8 Qarabağ müharibəsi əlilinə isə fərdi mənzil inşa etmişlər.

Unudulmayan sosial qayğılar

Rayon sakinlərinin digər qayğıları kimi sosial qayğıları da daim diqqət mərkəzində saxlanılır. Bu ilin 9 ayı daxilində Regionların sosial-iqtisadi inkişafı Dövlət Proqramının, digər tədbirlərin həyata keçirilməsi nəticəsində 645 nəfər yeni iş yeri ilə təmin olunmuşdur. Bu müddət ərzində pensiyaçılara 22,8 milyon manat vəsait ödənilmişdir.

Ölkə Prezidenti İlham Əliyev cənablarının qayğı və təşəbbüsü ilə həyata keçirilən və iri layihələrdən olan ünvanlı sosial yardım proqramı da xüsusi diqqətlə həyata keçirilir. Bu proqram Cəlilabadda 3186 ailəni, ümumilikdə isə 16118 nəfəri əhatə edir. Ailələrə 3 milyon 34 min manat miqdarında yardım göstərilmişdir. Bu isə hər ailəyə orta hesabla 952 manat dövlət yardımı deməkdir. Rayonda yaşayan 103 kimsəsiz, tək, ahıl vətəndaşa isə müxtəlif növ sosial xidmətlər göstərilir. Hazırda onlardan 57 nəfəri şəhərdə, 47 nəfəri isə kənddə yaşayır.

Rayon əhalisini elektrik enerjisi ilə mütəmadi təmin etmək üçün arxada qalan ilin 9 ayı ərzində kifayət qədər işlər görülmüşdür. Cəlilabad şəhərinin elektrik təsərrüfatında yenidənqurma işləri yekunlaşdırılmışdır. Rayon mərkəzinin yeni salınmış yaşayış massivində 6 ədəd yeni transformator qoyulmuşdur. Şəbəkənin daxili imkanları hesabına Adnalı və Bədirli kəndlərində yeni yarımstansiyalar tikilmiş, istismara yararsız 33 ədəd transformator təmir edildikdən sonra sistemə qoşulmuşdur.

Cəlilabad şəhərinin qaz təsərrüfatının işi yaxşılaşdırılmış, 936 paqonnumetr orta və aşağı təzyiqli qaz kəməri yenisi ilə əvəz edilmiş, 3100 ədəd "Elester" markalı sayğac quraşdırılmış, 308 abonentə yeni qaz xətti çəkilmişdir. Cəlilabad qaz paylayıcı stansiyasından "Broyler" ASC-yə 9600 paqonnumetr yeni qaz borusu inşa edilmişdir.

Sakinləri içməli su ilə daha intensiv təmin etmək üçün Cəlilabad şəhərində, Privolnoye, Üçtəpə kəndlərində 585 metr su xətti əsaslı təmir edilmişdir. Su quyularındakı elektrik avadanlıqlarına texniki qulluğun səviyyəsi artırılmışdır. Cəlilabad şəhərinin su-kanalizasiya təsərrüfatının yenidən tikilməsi üçün hazırlıqlar yekunlaşmışdır.

Burda təhsilə ayrıca diqqət var

Cəlilabad rayonunda son illər, daha dəqiq, 2004-cü ildən indiyə kimi "Azərbaycan Respublikası regionların sosial-iqtisadi inkişafı Dövlət Proqramı"na əsasən 2972 şagird üçün 9 məktəb, 360 şagird üçün 18 sinif otağı, Heydər Əliyev Fondunun köməyi ilə 1780 şagird üçün 5 məktəb, digər mənbələr hesabına 1000 şagird üçün 5 məktəb, 320 şagird üçün 34 sinif otağı inşa edilmişdir.

2011-ci ildə də məktəb tikintisi davam etdirilmiş, 360 şagird üçün Gülməmmədli kənd orta məktəbinin tikintisi başa çatdırılmışdır. Rayonun Sabirabad kənd 1 və Cəlilabad şəhər 2 və 6 saylı orta məktəblərinin tikintisinə başlanılmışdır. Çünzəli, Badamağac, Günəşli, Privolnoye, Közbulaq kənd məktəblərinin əsaslı təmiri başa çatdırılmışdır.

Bu il rayonun ümumtəhsil məktəblərini bitirmiş 1235 nəfər tam orta təhsil haqqında attestat, 2633 nəfər isə ümumi orta təhsil haqqında şəhadətnamə almışdır. Cəlilabadlı məzunların 232 nəfəri ali təhsil müəssisələrinə, 120 nəfəri isə orta ixtisas məktəblərinə qəbul edilmişlər. Sevindirici haldır ki, məzunlardan 16 nəfəri Cəmşid Naxçıvanski adına hərbi liseyə, 4 nəfəri isə Heydər Əliyev adına hərbi ali məktəbə daxil olmuşdur.

Daha bir sevindirici hal ondan ibarətdir ki, Azərbaycan Respublikası Prezidentinin 28 iyun 2011-ci il tarixli Sərəncamına əsasən Cəlilabad şəhər 1 və 8 saylı məktəb liseyləri 2011-ci ildə "İlin məktəbi" elan edilmişlər. Bu ilin oktyabr ayında "Müəllim günü" ərəfəsində Ölkə Prezidentinin Sərəncamı ilə Cəlilabad şəhər 7 saylı tam orta məktəbin direktoru Elminaz Nadirova "Tərəqqi" medalı ilə təltif edilmişdir. Şəhər 8 saylı məktəb-liseyin dil-ədəbiyyat müəllimi Qənimət Əhmədova "Əməkdar müəllim" fəxri adına layiq görülmüşdür. Heç şübhəsiz ki, bütün bunlar təkcə Cəlilabad rayon təhsil şöbəsinə deyil, bütünlükdə rayonun pedaqoji ictimaiyyətinə verilən böyük qiymətdir.

... Beləcə xeyli uğurları olan Cəlilabad rayonu daha bir ili arxada qoymaqdadır. Əminik ki, belə uğurların sayı gələcək illərdə daha çox olacaq.

Səxavət Məmmədli

Ədalət.- 2011.- 24 dekabr.- S.21.