APREL YAXINLAŞIR...

YAYDA QONŞULUQDA SEÇKİLƏR DƏ OLACAQ

2011-ci il başladı və artıq fevral ayı da yarılanıb. Aprel ayına o qədər də çox qalmayıb. Demək ermənilər özlərinin qondarma "soyqırım" iddiaları ilə yenidən türklərin zəhləsini tökəcək. Yenidən müxtəlif erməni məmurlar, politoloqlar okeanın o tayına üz tutaraq orada yaşayan erməni lobbisinin baş bilənləri ilə görüşəcək, onlarla birgə hərəkətə başlayacaqlar ki, Vaşinqton uydurulmuş "yubiley" günü ermənilərə rəhm edib onları dəstəkləyəcək iddiaya qol qoysun. Amma onu demək olmaz ki, türklər bu müddət ərzində sakit oturacaq. Yox. Türkiyənin də, Azərbaycanın da Amerikada yaşayan lobbisi amerikanları inandırmağa çalışacaq ki, bu yalanlara uymasınlar. Və o da məlumdur ki, NATO-da Birləşmiş Ştatların müttəfiqi olan, Ankaranı özlərinin strateji tərəfdaşı sayan Vaşinqton da özünü qoyacaq dağ başına, cürbəcür tələblər irəli sürəcək. Türkiyənin də Qərbə, erməniyə, PKK-ya işləyən KİV-i aylarla Türkiyənin əleyhinə təbliğat kampaniyasına girişəcək.

Amma Türkiyədəki bəzi qəzetlər elə indidən hərəkətə keçib. "Sabah" qəzeti iki gün əvvəl mövzu ilə bağlı məqalə dərc edib. Ermənistanın "panarmenian.net" saytı adı çəkilən qəzetə istinadən xəbər verir ki, rəsmi Ankara ilk dəfə Türkiyədəki Holokost soyqırımı abidəsini ziyarətdə bulunub və analoji addımı 24 apreldə də atacaq, "erməni soyqırımı" abidəsini ziyarət edəcək. Mənbə bildirir ki, rəsmi Ankara bu addımları ilə Ermənistanla Türkiyə arasında olan psixoloji əngəlləri aşmağa hazırlaşır. Yazılanlara görə, Holokost qurbanlarının abidəsi önünə gedən Türkiyə-Avropa Birliyi danışıqlarının əsas icraçısı, dövlət naziri Egemen Bağış olub.

Qəzet yazır: "Milli təhlükəsizlik şurasının yanvarda keçirilən iclasında ABŞ-da yaşayan erməni diasporu ilə əlaqələrin qurulması və 24 aprel tədbirlərində iştirak edilməsi qərara alınıb. Erməni xalqı ilə münasibətlərin qurulması üçün erməni diasporuyla dioloq inkişaf etdirilməlidi". Məqalədə o da qeyd olunur ki, Türkiyə hökuməti qondarma "soyqırımı" qəbul edən ölkələrə qarşı siyasi baykotu da aradan qaldırmağa hazırlaşır. Amma bu hələ hamısı deyil. Mənbə başqa bir türk qəzetinə istinadən bildirir ki, Türkiyədə iyunda parlament seçkilərində 7 erməni namizədi də seçki marafonuna qatılacaq. Maraqlıdır, erməni namizədləri olan partilyaların sırasında ana müxalifətçilərin - CHP-nin də adı çəkilir. Əlbəttə, qardaş Türkiyə müstəqil bir dövlət kimi istədiyi siyasəti yürüdə bilər. Və istənilən halda - iqtidarları bəyənməsək də - biz türk xalqını, qardaşlarımızı sevməkdən, daim onların yanında olmaqdan əsla vaz keçməyəcəyik.

Lakin erməniləri başlarının tacı yapmaq istəyən siyasətçilərə bəzi, özü də yeni məqamları xatırlatmaq istəyirəm və elə bilirəm ki, bunları düşünməyə dəyər. Türkiyədə erməniləri daha çox sevmək planları yapılarkən ermənilər bütün dünyada anti-türk siyasətini gücləndirməkdədir. Belə ki, erməni lobbisi artıq İsveçrədə uydurma "erməni soyqırımı" abidəsinin ucaldılmasını reallaşdırmaqdadır. Hanı, bəs İsveçrə həmişə bitərəf ölkə olmuş və qalmaqda idi?! Məlum olur ki, Ermənistanın İsveçrədəki səfiri Şarl Aznavur 5 fevralda, bu ölkədə "soyqırım qurbanları"nın xatirəsinə ucaldılacaq abidənin qoyulması üçün yaradılmış işçi qrupuyla görüşərək ümumi razılığa gəliblər. Həmin abidənin hazırlanması üçün beynəlxalq müsabiqə də keçirilmişdi və Məlik Oqonyanın işi bəyənilmişdi. Abidə aprel ayının 24-də paytaxt Cenevrədəki mərkəzi parkların birində açılacaq. Erməniləri başlarının tacı yapmaq istəyən siyasətçilərə məsləhət görürəm ki, onların ulu babalarını "ermənilərin qatil kimi" təsvir edən erməni əsərinə baxsınlar, əgər ürəklərində etiraz baş qaldırmasa, ermənilərin gündöyməzindən öpüb "işlərini" davam etdirsinlər. Onların deputatlarının sayını daha da artırsınlar.

Bundan başqa, məlumdur ki, Ermənistan Azərbaycanın həyata keçirdiyi nəhəng beynəlxalq layihələrin hamısından kənarda qalıb. Hətta Bakı-Tiflis-Qars dəmiryolu dəhlizinin layihəsinə əngəllər yaratmaq üçün Yerevan bacardığı bütün vasitələrdən istifadə etdi. Amma Azərbaycanın prinsipiallığı nəticəsində bu böyük iqtisadi dəhliz də Ermənistandan yan keçdi. Amma indi ermənilər bu dəhşətli itginin yerini nisbətən doldurmaq üçün başqa layihə uğrunda canfəşanlıq edirlər.

Məlum olduğu kimi, Qara Dəniz İqtisadi Əməkdaşlıq Təşkilatı Avropa ilə Asiyanı birləşdirə biləcək dairəvi avtomobil yolunun çəkilişini nəzərdə tutan layihəni gündəmə gətirib. Amma Bakı Ermənistanın da iştirak edəcəyi bu layihəni qəbul etmir. Bu barədə bazar ertəsi Trend-ə Azərbaycan xarici işlər nazirinin müavini Mahmud Məmmədquliyev söyləyib.

Nazir müavini deyib: "Təkcə Qara Dəniz İqtisadi Əməkdaşlıq Təşkilatı çərçivəsində deyil, həm də digər təşkilatlar çərçivəsində biz həmişə bu barədə danışırıq və sənədlər imzalanan zaman həmişə qeydlər edirik". Layihəyə əsasən, Qara dəniz ətrafında dairəvi avtomobil yolunun uzunluğu 12 ölkədən keçməklə, 7 min kilometr təşkil edəcək. Yolun əsas marşrutu və birləşdirici yollar Azərbaycan, Albaniya, Ermənistan, Bolqarıstan, Yunanıstan, Gürcüstan, Moldova, Rusiya, Rumıniya, Serbiya, Türkiyə və Ukraynanın ərazisindən keçəcək.

Məmmədquliyevin sözlərinə görə, Azərbaycan rəhbərliyinin mövqeyi dəqiq və dəyişməzdir: Dağlıq Qarabağ problemi tamamilə tənzimlənməyənə və Ermənistanın işğal etdiyi Azərbaycan ərazilərini azad etməyənə qədər Yerevanla həm ikitərəfli, həm də çoxtərəfli səviyyədə əməkdaşlıq mümkün deyil. Ümumilikdə Bakı Qara dəniz ətrafında dairəvi avtomobil yolunun yaradılması layihəsini dəstəkləyir və bu layihə çərçivəsində işləməyə hazırdır, lakin Ermənistanla əməkdaşlıq istisna edilir.

Məmmədquluyev bildirib ki, Qara dəniz ətrafında dairəvi avtomobil yolunun layihəsi çərçivəsində mövqeyimiz TRACECA layihəsi və digər belə layihələr çərçivəsindəki kimi olacaq. Avropa-Qafqaz-Asiya (TRACECA) dəhlizinin inkişafı üzrə beynəlxalq nəqliyyat haqqında əsas çoxtərəfli sazişdə qeyd var. Qeyddə deyilir: "Azərbaycan Respublikası bəyan edir ki, Avropa-Qafqaz-Asiya dəhlizinin inkişafı üzrə beynəlxalq nəqliyyat haqqında əsas çoxtərəfli sazişdə və onun texniki əlavələrində göstərilən hüquqların, öhdəliklərin və müddəaların heç biri Azərbaycan Respublikası tərəfindən öz ərazisi vasitəsilə Ermənistan Respublikasın ərazisinin başlanğıc, tranzit və ya son ərazi olduğu daşımalar üçün tətbiq edilməyəcək".

Belə olduğu halda da həmin magistral yolun səmərəliliyi sual altına düşür. Ölkə prezidentinin bildirdiyi kimi, Azərbaycanın iştirakı olmadan regionda heç bir beynəlxalq iqtisadi layihənin reallaşması mümkün deyil.

Ermənilər Azərbaycan torpaqlarını düşməncəsinə işğal edibsə, ona elə eyni cür münasibət də göstərilməlidi. Əgər Ermənistan Türkiyəyə ərazi iddiasındadırsa, dövlət gerblərində Ağrı dağın əksini təsvir ediblərsə, Ankaradan təzminat tələbində bulunurlarsa, "erməni soyqırımı" iddiasını sürdürürlərsə... görəsən türk siyasiləri ermənilərə niyə yarınmaq istəyirlər? Onlar bilməlidirlər ki, erməni üçün qonşuluq, ikitərəfli əməkdaşlıq, dostluq... əlaqələrinin qurulması absurddur. Çünki ermənilər üçün bu məziyyətlərin heç bir dəyəri yoxdur...

BABƏK YUSİFOĞLU

Ədalət.- 2011.- 9 fevral.- S. 3.