"Bioetika: sənədlər, terminlər" kitabı təqdim edildi

Aytən Mustafayeva: "Vətəndaşların bioetika ilə bağlı məlumatı azdır"

Azərbaycan Milli Elmlər Akademiyasının (AMEA) İnsan Hüquqları İnstitutunda "Bioetika: sənədlər, terminlər" kitabının təqdimatı keçirilib. APA-nın məlumatına görə, UNESCO üzrə Azərbaycan Milli Komissiyası və UNESCO-nun Bioetika kafedrasının Azərbaycan bürosu ilə birlikdə keçirilən tədbirdə çıxış edən İnsan Hüquqları İnstitutunun direktoru Aytən Mustafayeva bildirib ki, hər bir dövlət elmin əldə etdiyi nailiyyətlərə hüquqi-elmi aspektdən yanaşmaqda, öz vətəndaşlarının maraqlarını, hüquqlarını qorumaqda maraqlıdır. Bu baxımdan ölkədə müvafiq qanunvericilik və normativ hüquqi aktların işlənib hazırlanmasına ehtiyac var.

A.Mustafayeva deyib ki, hazırda rəhbərlik etdiyi qurumda bioetika və tibbi hüquq üzrə tədqiqatlar aparılır. Azərbaycan qanunvericiliyində bu sahələrlə bağlı çoxlu boşluqların olduğunu söyləyən institut direktoru ölkə vətəndaşlarının bioetika ilə bağlı məlumatının da azlığına diqqət çəkib. O, bioetika və tibbi hüququn yeni bir elm növü kimi Ali Attestasiya Komissiyasında qeydiyyatdan keçdiyini nəzərə çatdırıb. Bundan sonra bu istiqamətdə aparılan elmi işlər, araşdırmalar daha da sürətlənəcək. Beynəlxalq qanunvericilikdən istifadə edilərək bioetika və tibbi hüquq sahəsində milli qanunvericilik bazası hazırlanacaq. Ölkədə fəaliyyət göstərən ali məktəblərdə bioetika kafedraları yaradılacaq. Artıq bununla bağlı institut Təhsil Nazirliyi ilə müqavilə bağlayıb.

Ədalət.- 2011.- 10 fevral.- S. 7.