Mübariz Əhmədoğlu: "İran Azərbaycanı özbaşına və ya ABŞ və İsrailin sözü ilə Şuşasız qoyub - bu artıq İrana aid məsələdir"

"İran İslam Respublikasının Azərbaycandakı səfiri Məhəmmədbağır Bəhraminin İranın vasitəçilik missiyası ilə Şuşanın işğal olunması arasında əlaqəni görməsi təqdirəlayiqdir. Səfirin 1992-ci ildə Şuşanın işğal olunmasını Amerika və İsrailin rolu ilə əlaqələndirməsinə də etiraz edə bilmərik. Çünki öz dövlətinin keçmiş və indiki rəsmi mövqeyi ona daha yaxşı bəllidir. Şuşa İranın vasitəçiliyi ilə işğal olunub, Azərbaycan İranın hesabında Şuşasız qalıb, İran Azərbaycanı özbaşına və ya ABŞ və İsrailin sözü ilə Şuşasız qoyub - bu, artıq İrana aid məsələdir. Başqa sözlə, Şuşanı oğurlatdıran əl "İran" əlidir. İndi İran deyir ki, mənim əlimə göstərişi ABŞ və İsrail verib".

APA-nın məlumatına görə, bu fikirləri Siyasi İnnovasiyalar və Texnologiyalar Mərkəzinin rəhbəri, politoloq Mübariz Əhmədoğlu deyib. O bildirib ki, 1992-ci ildə ABŞ və yəhudi faktoru hər ikisi ermənilərin əlində idi: "Güclü erməni diasporunun olduğunu, ABŞ-da lobbiçilik idarəetmə sisteminin mövcudluğunu Azərbaycanda çox az adam bilirdi. Amma ermənilər bunu nəinki bilirdilər, hətta istifadə edirdilər. 1989-cu ildə hələ Sovet İttifaqı mövcud ikən ABŞ Konqresi iyun və noyabr aylarında Dağlıq Qarabağ münaqişəsi ilə bağlı iki qətnamə qəbul etdi. Qətnamə erməniləri müdafiə etməklə yanaşı, həm də yəhudi elementini də gündəliyə gətirdi. Guya azərbaycanlılar Dağlıq Qarabağda ermənilərlə birlikdə yəhudiləri də qırırlar. Bu qətnamələr göstərir ki, yəhudi elementi Dağlıq Qarabağ münaqişəsinə ermənilərə fayda verən faktor kimi ermənilər tərəfindən gətirilir. 1992-ci ildə ABŞ Konqresi Azərbaycana zərbə vuran daha bir sənəd - "Azadlığa dəstək aktı"na 907-ci düzəlişi qəbul etdi. O zaman Konqresin 70 faizi yəhudi və yunan lobbisinin təsiri altında idi. Hər ikisi ermənilərin xeyrinə işlədilər".

Mübariz Əhmədoğlu qeyd edib ki, yəhudi lobbisinin vaxtilə hansı tərəfdə olduğu artıq bəllidir və İranın nəyə görə yəhudilərin sözünə qulaq asması da İranın özünə aid məsələdir: "Azərbaycan Şuşanın işğalından sonra Rusiya ilə ABŞ kimi İranın da ermənilərə dəstək verdiyini gördüyünə görə əlavə qüvvə axtarmağa başladı. Ermənilərin yəhudi siyasəti ifşa olundu, yəhudilər Dağlıq Qarabağ məsələsində obyektiv mövqeli qüvvə kimi Azərbaycanın ədalətli mövqeyinə dəstək verməyə başladı. Nəticə göz qabağındadır. Vaxtilə, Dağlıq Qarabağ ermənilərinə müstəqillik tələb edən, Azərbaycana qarşı sanksiya tətbiq edən ABŞ bu gün Dağlıq Qarabağı və onun ətrafındakı 7 rayonu ermənilər tərəfindən işğal olunmuş Azərbaycan ərazisi kimi tanıyır. Hələ İran Azərbaycanın ərazisi ilə bağlı belə açıq fikir bildirməmişdir. Bu, yəhudi lobbisinin gördüyü işdir. Ona görə, rəsmi Tehran "yəhudi" və ya "İsrail" sözünü "Rusiya" ilə əvəzləsə, daha düzgün olar. İranın vasitəçilik missiyasını pozan, İranın vasitəçilik missiyasına razılıq verdiyinə görə, Azərbaycanı cəzalandıran ABŞ və Rusiya oldu".

Politoloq deyib ki, Şuşanın işğalından sonra ABŞ və Rusiya İranı Ermənistana kömək etməyə məcbur etdilər: "İran bu günədək Ermənistana yardımla bağlı ABŞ və Rusiyanın birgə əmrini yerinə yetirir. ABŞ və Rusiyanın belə əmr verməsinə səbəb isə İranın təbirincə, masonlar səbəb ola bilərlər. Şuşanın işğalından 20 il keçməsinə baxmayaraq, bu gün də İran İslam Respublikası ABŞ və Rusiyanın əmrindən çıxa bilmir, bəlkə də, çıxmaq istəmir. Bu məsələ ermənilər üçün indi də prinsipialdır. Ermənilər İranı Rusiya və ABŞ-ın məngənəsinə İranın ən ağıllı, ən savadlı və ən hiyləgər prezidenti hesab olunan Rəfsəncaninin dövründə sala bildilər. Bu işdə mühüm rolu olan erməni Papazyan sonradan Ermənistan xarici işlər naziri vəzifəsinədək yüksəldi. Rusiya, ABŞ və Ermənistan birləşib İranın vasitəçilik missiyasını iflasa uğratdılar".

Mübariz Əhmədoğlunun fikrincə, İranın vasitəçilik missiyasına razılıq vermiş Azərbaycanı Şuşasız qoymaqla cəzalandırdılar: "İran göstərişi, hadisələrin gedişini başa düşdü, əmri yerinə yetirməyə başladı, Ermənistana dəstək verdi. Dağlıq Qarabağ münaqişəsi Azərbaycanı 20 faiz torpaqdan məhrum edib, onun ərazi bütövlüyünü qayçılayıb. İranın qonşuluğunda ağzı açıq vəziyyətdə dayanan bu qayçı nə vaxtsa İranın ərazi bütövlüyünü qayçılayacaq. İran səfirinin geniş tədqiqat aparmaq təklifini nəzərə alaraq, bu mövzunu da davam etdirəcəyik. ABŞ Konqresinin qətnamələrinin mətnini ona göndərəcəyik".

Ədalət.- 2011.- 11 fevral.- S. 4.