FÜZULİ: NİKBİN OLMAQ SƏLAHİYYƏTİ

O günləri yaşamışıq nə vaxtsa

Mən Füzuliyə həmişə Ağdam yolu ilə gedirdim. Hələ bir dönüb Ağdamdakı dostlarla 5-10 dəqiqəlik hal-əhval da tutardım. Sonra Martunidəki (daha bu adda rayonumuz yoxdur) 9 mərtəbənin qarşısındakı dairədən keçib birbaşa Füzuliyə yollanardım. Dostlarım mərhum Alıkişi Səfərovun, Seyran Səxavətin, Faiq Qismətoğlunun, Vaqif Bəhmənlinin vətəninə. Vaqif Bayatlı ilə Cəbrayıla gedəndə də bu yolu seçərdik. Əslində dəmir yolunu çıxmaq şərtiylə Füzuliyə, Cəbrayıla Ağdam yolundan başqa rahat bir alternativ də yox idi. Mən bir yazı adamı, mən bir Azərbaycan vətəndaşı olaraq həmişə və indi də Füzuliyə o yolla, hər tərəfi, hər döngəsi doğma olan o xatirələr qovşağı ilə gedib, gedib, gedib... çatmaq istəyirəm.

... Və indi Beyləqandan dönüb Füzuli rayonuna, onun mərkəzinə - Horadiz şəhərinə gedərkən üzümü göylərə tutub Allaha yalvarıram ki, bu yerlərdə insanları gələcəyə ümidli, nikbin görüm. Allaha yalvarıram ki... Özümdən asılı deyil...

Mən də bir Füzuli sakini

Buralarda çox nadir halda DYP maşınına rast gələrsən. Orda-burda gizlədilən sürətölçən cihazdan isə söhbət gedə bilməz, yoxdur, biz rast gəlmədik.

Horadizdə bir neçə yerdə rastlaşdığım sakinlərlə hal-əhval tutub qısa söhbətlər etdim, bəzi şeylər soruşdum. Münasibət məni çox sevindirdi. Heç kim mənə nabələd bir adam zənniylə baxmadı, əksinə sanki onlardan biriymiş kimi yanaşırdılar.

Füzuli Rayon İcra Hakimiyyətində də məni elə bil on illərin dostu-tanışı kimi qarşıladılar. Dostumuz Nəbi müəllimin səmimi komandasının həm də bu dərəcədə operativ və işgüzar fəaliyyətinə heyranlığımı gizlətmədim. Məlum səbəbdən olduqca çətin vəzifələrin öhdəsindən bacarıqla gəlmək üçün rayon icra hakimiyyətinin başçısı Nəbi Muxtarov məhz bu cür səriştəli kollektiv yaratmalı idi.

Məni məmnun edən başqa bir nüans. Tanış olduqdan sonra ilk dəfə gördüyüm insanlardan bəzilərinin məni tanıması çox xoş idi. Bu ondan irəli gəlir ki, Füzuli Bakı, Gəncə və Sumqayıt şəhərlərindən sonra, lap dəqiqi rayonlar üzrə ən çox abunəçimiz və oxucumuz olan yerdir. Üstəlik başçının birinci müavini Şakir Hacıyevin tez-tez "bizim Aqil müəllim, bizim Aqil Abbas" deyə-deyə fəxrini, sevincini gizlətməməsi.

Aparatın şöbə müdiri jurnalist dostumuz Məcnun müəllimlə müəyyən xarakter yaxınlığımız çoxdandan varmış. Heç bir təmənna güdmədən, qarşılıq gözləmədən məni öyür, sanki mən Füzulidə doğulmuşam, orda yaşayıb-çalışmışam və elə həmişə də Məcnun müəllimlə bir yerdə olmuşam. Heç demə, o da mənim kimi ürəyindən ağır əməliyyat keçirib və o da mənim kimi daim təyin edilmiş preparatları qəbul etmək məcburiyyətindədir.

Yaradıcı adamların çoxunun ürəyi xəstə olurmuş...

Horadiz şəhəri. Buradaca mən bəlkə də çoxlarının fikir vermədiyi diqqətsizliyimi etiraf edib "ədaləti bərpa etmək" istəyirəm. Mən Ağdam rayonundan yazarkən bildirmişdim ki, biz Ağdamı, bütövlükdə Qarabağı işğaldan azad etdikdən sonra Ağdam 2 şəhəri olan yeganə rayonumuz olacaq. Ancaq görürsünüzmü, Horadiz şəhərinin timsalında Füzuli rayonu da eyni gözəl arzumuza işıq salır.

Füzuli rayonunun əhalisi 114 min nəfərdir. 70 min nəfər rayonun işğala məruz qalmayan ərazilərində - şəhər və qəsəbələrdə, 22 kənddə yaşayır. Qalan 44 min nəfər füzulili isə respublikanın 50 şəhər və rayonunda məskunlaşmışdır.

Düşmənə göz dağı - Horadiz!

İndi Horadiz gerçəkdən gözəl bir şəhərə çevrilib, düşmənə göz dağıdır. Son illər burada tikilib istifadəyə verilmiş sosial və digər yönümlü binalar, salınan yaraşıqlı küçələr, park və bağlar, yeni yaşayış massivləri göz oxşayır. Keçən il istifadəyə verilən Füzuli Tibb Mərkəzi, Olimpiya İdman Kompleksi, Muğam Evi, bir sıra sənaye müəssisələri əsl şəhər əzəmətini təsdiqləyir.

Dövlət Proqramının uğurlu icrası

2010-cu ilin yekunları Füzuli rayonunun sosial-iqtisadi nəticələrində qabarıq görünür. Regionların 2009-2013-cü illərdə sosial-iqtisadi inkişafı Dövlət Proqramında Füzuli rayonunda da böyük vəzifələrin yerinə yetirilməsi nəzərdə tutulmuşdur.

Respublika Prezidentinin tapşırığı əsasında tikintisinə başlanılmış Tibb Mərkəzi, Muğam Evi, Olimpiya idman kompleksi istifadəyə verilmişdir. Keçən il noyabrın 11-də Prezident İlham Əliyev cənabları Füzuli rayonunda olmuş və hər üç obyektin açılışında iştirak etmişdir.

Yuxarı Mil kanalının rayonun ərazisindən keçən hissəsində tikintisinə başlanılmış 25 meqavat gücündə olan su elektrik stansiyasının tikintisi davam etdirilir.

Füzuli aqrar rayonudur. İqtisadiyyatın əsasını kənd təsərrüfatı məhsulları təşkil edir. Aparıcı sahələrdəki nəticələr belədir: 61260 ton taxıl, 780 ton qarğıdalı, 1380 ton kartof, 10.000 ton bostan-tərəvəz məhsulları, 15300 ton şəkər çuğunduru, 165 ton pambıq, 75 ton üzüm, 80 ton günəbaxan, 1000 ton meyvə istehsal olunmuşdur. İl ərzində 1775 ton ət, 7700 ton süd, 4,6 milyon ədəd yumurta, 147 ton yun istehsal olunmuşdur.

Hazırda rayonda 30400 baş iribuynuzlu mal-qara, 108.400 baş qoyun-quzu, 230 min baş müxtəlif növ quşlar mövcuddur.

Rayonda respublika Prezidentinin fərmanlarında göstərildiyi kimi adamların həyat şəraitinin yaxşılaşdırılması üçün məqsədyönlü iş aparılır. Kiçik və orta sahibkarlıq inkişaf etdirilir. 300 nəfərdən artıq sahibkar və fiziki şəxsə iri və xırda həcmli kreditlər verilmişdir.

Horadiz şəhər statusu alandan sonrakı müddətdə görkəmini daha da dəyişmiş, xeyli gözəlləşmişdir. Şəhərin yenidən qurulması üzrə nəzərdə tutulmuş proqram həyata keçirildikdən sonra Horadiz daha əzəmətli görünəcək.

Əhaliyə göstərilən rabitə xidmətinin yaxşılaşdırılması diqqət mərkəzindədir. Poçt şöbələrində internetə çıxış yaradılmışdır. Telekommunikasiya qovşağı ərazidəki 22 kəndə, Horadiz şəhərinə, Qayıdış və Zobucuq qəsəbələrinə, bütövlükdə 65 min nəfərə xidmət göstərir.

Yollar qovuşacaq insanlar kimi...

Respublikanın 50 şəhər və rayonunda məskunlaşmış 40 min nəfərdən artıq rayon əhalisi ilə müntəzəm əlaqə saxlanılır. Vətəndaşların yemək pulları, pensiya və müavinətləri bankomatlar vasitəsiylə sahiblərinə çatdırılır.

Ötən il rayonda 243 daimi, 2000 mövsümi iş yeri açılaraq məcburi köçkünlərin işləməsinə şərait yaradılmışdır. Xüsusilə gənclərin işlə təmin olunması diqqət mərkəzində saxlanılır.

Ümummilli lider Heydər Əliyev tərəfindən yaradılmış inkişaf strategiyasının bundan sonra da davam etdirilməsinə xidmət edən Dövlət Proqramına uyğun olaraq Füzuli rayonunda yüksək inkişafa nail olmaq üçün kompleks tədbirlər davam etdirilir. İnsanlar nikbin əhval-ruhiyyədədir. Füzuli camaatı gələcəyə böyük ümidlərlə baxır, çətin şəraitdə əsl fədakarlıq nümunəsi göstərirlər.

Məzahir ƏHMƏDOĞLU

Ədalət.- 2011.- 11 fevral.- S. 7.