NUMEROLOGİYA,

YAXUD ƏDƏDLƏR HAQQINDA ELM

(əvvəli ötən şənbə saylarımızda)

AD RƏQƏMLƏRİ

1 2 3 4 5 6 7 8 9

A B C Ç D E Ə F G

Ğ H X I İ J K Q L

M N O Ö P R S Ş T

U Ü V Y Z

6 rəqəmi

Doğum tarixi kimi, 6- misilsiz rəqəmdir. Belə adamlar vicdanlı, düz danışan etibarlıdır. Onlara inanmaq olar. Proqressiv dünyagörüşü var, hörmət qazanmağa, dost-tanışlar arasında inam və etibarı qorumağa çalışır, onlara hər şeydə kömək etmək istəyir. Belə adamlar sanki ətrafda optimizm yayır, ona tapşırılan işi, vəzifəni doğruldur, hər şeyə qanedir, mənsəb və şöhrətə can atmır. Özündən razıdır, özünü ad-sana, vəzifəyə laqeyd göstərməklə riyakar təsiri bağışlayır, amma əlbəttə, bu xasiyyəti ona qarşı rəğbət oyatmır.

Ad rəqəmi kimi, 6- biznesdə uğur əlamətidir, yaxın ətrafının etibarını qazana bilsə, müştəriləri artacaq, davamçıları çoxalacaq. Onlar siyasi xadim, yüksək dövlət adamları ola bilir. Elmi-fəlsəfi görüşləri ilə cəmiyyətdə tanınır, sevilirlər, bir şərtlə ki, sözü ilə işi bir olsun. Axı, cəmiyyət onlardan verilən vədi yerinə yetirməyi tələb edir. Onlar belə bir həqiqəti tez başa düşürlər ki, düzgünlük şöhrətpərəstlikdən faydalıdır, düzgün addım, vicdanlı əməl məqsədə çatmaq üçün yeganə yoldur, amma bu işdə sərt üsullara əl atmaq olmaz.

7 rəqəmi

Doğum tarixi kimi, 7- sirr, həmçinin bilik deməkdir. Bu ziddiyyətli xətti davam etdirmək də olar. Çalışqandır, poetik ruhu var, doğrudur, bəzi qəribəlikləri olsa da tənqidi təfəkkürə və güclü intuisiyaya, zəngin fantaziyaya malikdir. Bu rəqəmlə doğulan adamlar bəstəkar və musiqiçi, şair və nasir, filosof, mütəfəkkir və zahid olurlar. Onlar ilhama gələndə tək qalmalıdırlar. Bir az zəifləri ümidsizliyə, bədbinliyə meyllidir, güclüləri isə yüksək şəxsiyyət kimi dünyada tanınırlar.

Ad rəqəmi kimi, 7- istedadlı adamları elmə, incəsənətə, fəlsəfəyə, habelə dini fəaliyyətə həvəsləndirir. Amma onların uğuru əldə olunmuş təcrübənin dərindən təhlil edilməsindən və gələcəyini real surətdə planlaşdıra bilməkdən çox asılıdır. Adamların qəlbini ələ alaraq, onlar çox vaxt yüksək təbəqənin lideri və rəhbəri olur. Amma əgər kommersiya və maliyyə məsələləri ilə məşğul olmaq istəsələr, bu zaman onların özlərinə kömək lazım olacaq.

8 rəqəmi

Doğum tarixi kimi, 8 - biznes və təşəbbüskarlıq əlamətidir. Həyatın bütün sahələrində, xüsusən kommersiya və sənayedə uğur gətirir. Onlar bir qayda olaraq yalnız irəliyə baxır, fikirləşdiklərini həyata keçirməyə cəhd edirlər. Burada onların güclü iradəsi və xarakteri, nə özünə, nə də başqalarına yazığı gəlməməsidir. Qarşısına çıxan maneələr onun işgüzarlığını, enerjisini yalnız artırır. Belə adamlarda kollektivi arxasınca aparmaq bacarığı, nadir idarəetmə qabiliyyəti olur. Onların bu xasiyyəti, xüsusən siyasətdə, hərbi sahədə , biznes dünyasında daha çox parlayır, o sahələrdə ki, orada sərtlik və amansızlıq tələb olunur. Dostlarını da onların cəmiyyətdəki mövqeyinə görə seçirlər.

Ad rəqəmi kimi, 8 - əhəmiyyətli və gəlir gətirən sahələrdə fəaliyyət üçün əlverişli sayılır. Bir işi uğurla başa vuraraq, onlar dərhal başqa işə girişirlər. Unudulmuş nəzəriyyələr, atılmış müəssisələr, dəbdən düşmüş metodlar tez-tez onlara mənfəət gətirir. Amma onlar xırda şeylərdən qaçmalı, bu işləri başqasına tapşırıb özləri böyük işlər görməlidirlər.

9 rəqəmi

Doğum tarixi kimi, 9 - intellekt, yüksək inkişafı şərtləndirən bacarıq və qabiliyyətə malik güclü şəxsiyyət simvoludur. Bu rəqəmlə doğulanlar ədəbiyyat və incəsənətdə uğur qazanır, onlarda yüksək yaradıcı potensial var. Belə adamlar yaxşı olar ki, kommersiya fəaliyyətindən və hərb işdən vaxtında əl çəksinlər. Onlar üçün əsas problem istedad və qabiliyyətlərini vaxtında aşkar etmək, düzgün həyat yolu seçməkdir. Bu rəqəmlə böyük ixtiraçılar, alimlər, musiqiçilər doğulur. Hər şey onların bacarıq və istəyindən asılıdır. Bu iki amil bir yerdə olanda uğuru təmin etmiş olur.

Ad rəqəmi kimi, 9 - məqsəd və istedada sədaqət, təbiətin sənə bəxş etdiyi qabiliyyətdən bacardıqca istifadə etmək tələb edir. Belə adamlar nüfuz sahibi və lider ola bildikləri üçün həmişə ədaləti gözləməli, bəyan etdikləri yüksək ideyalardan geri çəkilməməlidirlər. Qazandıqları hörmət və nüfuzu itirməmək üçün xırdaçı olmamalı, özlərinə xas olmayan hörmətə yol verməməlidirlər. Özləri üçün lazım olduğundan artıq tələb etməməli, başqasından da bacarığından artıq heç nə tələb etməməlidir. Özlərini təmkinli aparmalı, təkəbbür və eqoizmini boğmalıdır. Başqalarının da ləyaqət və hüquqlarına hörmət etməlidir.

Numeroloji qaydaların biri belədir: doğum tarixinin rəqəmi ad rəqəmindən yuxarıdırsa, bu o deməkdir ki, həmin adam öz əsas xasiyyətlərinə sadiq qalmalıdır, amma bu onun adının xüsusiyyətlərinin, yaxud adının vibrasiya rəqəminin inkişafını çətinləşdirə bilər. Və əksinə, ad rəqəmi doğum tarixi rəqəmindən yuxarıdırsa, onda həmin adamda ad rəqəminin ifadə etdiyi şöhrətpərəstlik və məqsəd daha üstündür, ona görə də şəxsin təbii xüsusiyyətləri və həyat meylləri onun öz seçimi ilə müəyyən bir yön alır. İnsan şəraiti yaratmalı, amma ona tabe olmamalıdır.

Doğum tarixinin rəqəmi ad rəqəmi ilə eyni olan adam özündə hər hansı bir işi asanlıqla görmək bacarığı, sabit və harmonik xarakter inkişaf etdirə bilər. Amma bu o qədər də arzuolunan deyil, çünki belə harmonik rəqəmlərin ümumi nəticəsi məchulluq və xaosa aparıb çıxarır.

Rəqəmlər gündəlik həyatımızda

Adamlar inanır ki, onların həyatında həm yaxşı, həm də pis günlər olur. Şübhəsiz, onlar pis günün təsirindən qaçmaq üçün günləri necə seçmək lazım olduğunu bilmək istərdilər.

(Ardı var)

Ədalət.- 2011.- 5 fevral.- S. 10.