ONLAR VƏ MƏMLƏKƏTİMİZ
Türkiyə Cümhuriyyəti Liberal
Partiyasının Başqanı BESİM TİBUK
Çox hörmətli baş redaktorumuz İradə
xanım Tuncayın yazı manerasında və redaktorluq fəaliyyətində
maarifçilik deyilən ab-havanın üstün bir cəhət
olduğu çap etdirdiyi yazılarda və qəzetin əsas
istiqamətində açıq-aydın görünməkdədi.
Və indiki məqamda təbii ki, maarifçilik bir az bir-təhər
səslənsə də, təbliğatın bir çox sahələrində
bunu təkrar-təkrar eşitməkdəyik. Yeni nəslin
maarifçilik həyatı bizləri son dərəcə
narahat etməkdədir. Kimsə kimsəni savadsız hesab eləmir,
amma qələm sahiblərinin bir üstünlüyü var
ki, onlar adətən elə insanlarla görüşürlər
ki, sıradan insanların o adamlarla görüşməyə
imkanı olmur və bu baxımdan mənim yeni
başladığım yazı dizisində, seriyasında bir
vaxtlar Türkiyədə yaşadığım illərdə
görüşdüyüm insanların ÖZLƏRİ və
MƏMLƏKƏTİMİZ barədə fikirləri maraq
doğurmaya bilməz. Təbii ki, bu yazılara bir ara versəm
də, yeni ildən həmin yazıların sırasını
davam etdirmək niyyətindəyəm. Onlar Kimlərdir və
bizim Məmləkətimiz haqqında nə fikirləşirlər
və nə düşünürlər. Və ya nə
düşünüblər? Tarix üçün çox
maraqlı bir məqam olan bu Tanışlıq və
Tanışlar yeni nəsil üçün daha çox maraq
doğura bilər fikrindəyik. Beləliklə, indiki qəzetçiliyimizin
dili ilə desək, yeni proyektimiz olan ONLAR VƏ MƏMLƏKƏTİMİZ
sizlərə təqdim olunur.
"Bu bölgənin ən güclü dövləti
Türkiyədir.
Amerika Türkiyəni dinləməyə məcburdur.
Türkiyə ilə işbirliyi eləmədən
Amerika heç bir şey qazana bilməz. Nə Ortadoğuda bir
şey qazanar, nə Balkanlarda bir şey eləyə bilər.
***
Məsələ
silahlarda deyil. Qorxudaraq, təsir eləyərək zorlayaraq
heç bir şey qazanılmaz. Əsas odur ki, işlər
siyasi yolla çözülsün. Bir kəz daha söyləyirəm:
Bizim XARİCİ
SİYASƏTİMİZDƏ Azərbaycan önəmli bir yer
tutur və başlıca məsələdir".
Tevfik bəy, Söhbətimizə
davam edək. Mən nəyi anlatmaq istəyirdimsə bir az
anlatdım. Siz əsasən ekonominizi düzəltməlisiniz.
Sizin ekonominizin problemləri bizim üçün də pisdir.
Bu Ermənistan məsələsində sayın Ecevitin bir təklifi
oldu. Koridor məsələsi. Bu haqda fikirləşməyə
dəyər. Biz də bu koridor məsələsində eyni
fikirdəyik. Mən bunu o zaman Mütəllibov vardı, onun
zamanında söyləmişdim. Bizim fikrimizcə ən
ağıllı yol budur. Biz də bu görüşdəyik.
Amma qərar Azərbaycan dövlətinin və Azərbaycan
hökumətinindi, təbii... Buna deyəcək bir
sözümüz yox.
Bu məsələ ətrafında
artıq bizim fikirlərimiz dəyişir. Və həqiqətən
əsəbi bir ortam yaranır. Amma söylədiyim kimi,
hörmətli Besim Tibuk çox tez münasibət yaradan və
fikirlərini çox tez anlatmağa çalışan bir
siyasətçidi. Və bir az susduqdan sonra yenidən
danışmağa başlayır. Hər ikimizi də razı
salacaq məsələlərdən danışırıq.
Besim Tibuk araya söz qatır və mən ondan bir bioqrafik
tanışlıq xahiş eləyirəm. Koridor məsələsinə
qayıdacayıq. Bunun üçün onun şəxsi fikirləri
var, onu yazımın sonuna əlavə eləyəcəyəm.
İşləməklə
oxumaq həyatı gördüyümüz kimi çox şaxəli
olub. Bu aralarda ekonomika və siyasət dünyasında da
öz fikirləri ilə diqqəti çəkib. Demokratik
yöntəmə və ortama xidmət eləmək
üçün DEM mətbuat mərkəzini qurub.
"Biz əsasən
ekonomik məsələlərdə Azərbaycan nümayəndəliylə
görüşmək istəyirik. Azərbaycan ekonomik olaraq
necə ayağa qalxa bilər? Türkiyə ilə sərhəd
olmamalı.
Türkiyə ilə Azərbaycanı
Gömrük Birliyi kimi düşünməli. Bəzi
şeylər sərbəstcə aparılıb gətirilməli,
bəziləri hələlik olmaz. Azərbaycan zəngin
ölkədi. Bu yalnız petrol deyil. Xalqınız
çalışqandır. BUNA GÖRƏ DƏ LİBERAL
POLİTİKALAR İŞLƏRSƏ AZƏRBAYCAN
İSVEÇRƏ KİMİ BİR YER OLUR".
Davam edir: "Biz
heç bir minnət eləmədən və heç bir haqq
gözləmədən Azərbaycana bir müşavirlik eləmək
düşüncəsindəyik. Əlbəttə Azərbaycan
rəhbərliyi bunu istərsə. Dediyimiz kimi, Azərbaycan zəngin
ölkədi. İnsanları da gözəl. Sağlam.
Yaraşıqlı. Mədəni insanlardı, biradər.
Gözəl, təbii mənbələri var. Bunu aşkarlamaq,
üzə çıxarmaq lazımdır. Buna görə də
Azərbaycan bizim xarici siyasətimizdə əsas yer tutur. Azərbaycan
bizim fikrimizcə, qısa bir vaxtda zənginləşə bilər.
Ticarəti inkişaf etdirsə və başqa ölkələrlə
əlaqəni daha da saflaşdırsa və
sıxlaşdırsa zənginləşə bilər. Bizim bir
istəyimiz də var. Vaxtında gedə bilmədik Azərbaycana.
Azərbaycanda yaşlı, qoca, uşaq və xəstələr
var ki, hələ də çadırlarda yaşayırlar.
Onları Türkiyəyə gətirmək lazımdı və
gətirib burada müalicə eləmək gərəkdir.
Qış aylarında bizim isti yerlərimiz daha çoxdu.
Xüsusilə Antalyanı düşünmüşük.
Üç-dörd ay bu adamların Antalyanın tətil kəndlərində
qalmasını istəyirik. Bunu eləmək lazımdı.
Artıq gecikmişik belə. Mən bunu iki dəfə Cümhurbaşkanına,
başkanlara, müxalifət partiyaların başkanlarına
söylədim. Edəriz, yaparız, şudur-budur, deyib
durdular. Minlərcə zavallı, yaşlı və uşaq
çadırlarda yaşayır. Antalya qışda da çox
rahat. Günəşi bol. Biz bunu eləmək
üçün əlləşirik. Təəssüflər
olsun ki, hələ bir yerə varmamışıq. Bizimkilər
düşünürlər ki, başımıza bəla almayaq,
dərd almayaq. Oradakılarla da əlaqə yarada bilməmişik.
Hərhalda bu işi eləmək
gərək...
Not: Vallah Mikayıl
Müşfiqin bu sətirləri nədənsə elə bu
sözləri yazanda ağlıma gəldi:
Deyirsən yanında
qalacağam mən
Çox gözəl
fikirdir, qal sənə qurban...
Qarabağ məsələsində ayrıca olaraq Besim
Tibukun KORİDOR projesi
... Qarabağa bir koridor
verib, Dağlıq Qarabağda ermənilərin çox
sıxı yaşadığı yerləri onlara verəcəksiniz.
Daha doğrusu, koridor verəcəksiniz və onun yerinə bir
ara koridor da biz alacayıq. O zaman Naxçıvanla Azərbaycan
birləşəcək. Bunun faydası var. Yəni, biz bu
görüşdəyik. Amma belə bir vəziyyətdə qərar
yenə də Azərbaycanındır, bizim deyil.
- Amma hörmətli
Başkan, siz Bülent Ecevit bəyin dediyi o yerlərdə
heç oldunuzmu? Biz koridoru Ermənilərə hardan veririk?
İndi də elə o dediyiniz koridor ermənilərin əlindədir,
onlar o yerlərdə ağalıq eləyirlər. Ora da əski
Azərbaycan torpaqlarıdı və ora Sovetlər
dövründə də onların idi. Daha nə istəyirlər?
- Amma məsələ
ayrı cürdür. Heç bir anlaşma yoxdur. Sən bir sərhəd
qoyub deyəcəksən ki, Naxçıvanla Ermənistan
arasındakı torpaqlar bizim.
- Amma, sayın Başkan
ermənilər asanlıqla, sülh yoluyla o torpaqları verməz.
- Necə yəni verməz.
Qırtlağına basıb alarsan. Əsas bu problemi çözmək
lazımdır. Türkiyə Amerika ilə anlaşırsa, Amerikanı
sıxışdırırsa və bir az da iddialı
istəsə Amerika buna razı olacaq. Ermənistanın da Türkiyəyə
böyük ehtiyacı
var. Türkiyə hə
desə, Ermənistan çox böyük ehtiyac içinə girər. Bu koridor
məsələsi həll
olunursa, onun sizə də müthiş bir yararı olacaq. Ermənistana
koridor veriləcək
və işğal altındakı torpaqlar geri qaytarılacaq.
- Hörmətli
Başkan, bu dəqiqə Ermənilər Xankəndinə azad
gəlib gedirlər və oralarda naxır otarırlar.
Yenə də dediyini
deyir Besim Tibuk bəyəfəndi.
- O koridor olursa Türkiyə
ilə Azərbaycan bir Gömrük birliyi içində olar.
Türkiyə hər iki ölkəylə bir sərhəd
qarantisi danışacaq. Qardaşım qüvvət deyilən
şey bizdə. Türkiyə deyəcək: Azərbaycanın
sərhəddi budur. Qarşılıqlı müdafiə
işbirliyi alınacaq. Nə var ki... Kim, yox deyəcək
buna? Azərbaycanla Türkiyə bir müdafiə
anlaşması eləyərsə kim nə deyəcək buna?
Yazıq deyil mi? Bax, o koridor olsa Azərbaycan müdhiş zənginləşəcək.
Və Azərbaycan Türkiyəyə gəliş
vizasını qaldıracaq. İstədiyin kimi gediş-gəliş
olacaq. Alış-veriş olacaq. O koridordan yol açdın
ki, yəni bir dəyər əldə ediləcək və
unutmamalı ki, yol hara gedərsə o yerlər dəyərli
olur, abad olur, inkişaf edir o yerlər. Bu yol
açıldımı, bu yoldan petrol boru xətti keçər...
hər şey keçər....
Son
BESİM TİBUK KİMDİR
Besim Tibuk 1945-ci ildə Fındıklı qəzası
Araklı köyündə anadan olub. Atası Yunus Heydər
oğlu, Azərbaycanın Füzuli rayonundan,
əski SSCB-nin tanınmış insanlarından olmuşdur.
İbtidai məktəbi Murgüldə bitirən Tibuk, orta təhsilini
müxtəlif səbəblər üzündən Qars, Artvin
və Rizədə başa vurmuşdur. 1962-1963 AFS bursu ilə ABD-nə getdi. Orada liseden
məzun oldu. Sonra Ankara siyasi Elmlər fakültəsində oxudu.
Oranın diplomatiya bölümünü
1968-ci ildə bitirdi.
1964-67 arası Dövlət Statistika İnstitutunda çalışdı.
1971-ci ildə İşlətmə
İqtisadi İnstitutu
ali işlətməçilik
ixtisasını qazandı.
14 yaşında çalışmaya başladı. 1964-cü
ildə Tərcüman-Rəhbər olaraq turizm sektoruna girdi.
Sonra səyahət agentlikləri müdürlüklərində
çalışdı. 1974-cü ildə Tərcüman Rəhbərləri
birləşdirərək Net Holdinqin binövrəsi olan Net
Turizmi qurdu. Net Qrupunu böyüdərək qısa zamanda
turizm sektorunun ən böyük quruluşlarından biri
halına gətirdi. Tibuk 1980-ci ildən sonra
düşdüyü maliyyə krizi üzündən əlindəki
Netbankı sataraq özünü qurtardı. Ticarət həyatına
Merit İnternasional oteller
zənciriylə və
Net Holdinqlə davam edir.
Siyasi həyata Demokrat Partidə atıldı. DP-nin İstanbul Başkanı oldu. Bu vəzifəsindən ayrılan Besim Tibuk 26 iyun 1994-cü ildə Liberal Partiyanı qurdu. Partiya bir az sonra Liberal Demokrat Partiyası adını aldı. Abdi İpekçi Barış və Dostluq ödülü sahibi olan Besim
Tibuk evli və dörd uşaq atasıdır.
Əməkli olduğunda,
təsərrüfatla məşğul
olacağını söyləyir.
Tofiq Abdin
Ədalət.- 2011.- 5 fevral.- S. 15.