... Sadəcə Şükürlü "Kəlamlar"

Və yaxud maraqlı kitab həcmlə ölçülmür

Bəzən ən qalın kitabda maraqlı bircə cümlə belə tapmaq olmur. Oxucunun diqqətini özünə cəlb edən, maraqla oxunan o qədər kiçik həcmli kitablar var ki...

Həmkarımız Pünhan Şükürün əl boyda, lakin maraqla oxunan kitabı haqqında yazmaq istəyirəm. Uzun müddətdi "Azərbaycan" nəşriyyatında "Ədalət"lə qonşu olan Pünhan Şükür müxtəlif qəzetlərdə köşə yazıları ilə çıxış edir. Bəzən isə fikirlərini oxucularına şair kimi çatdırır. Bu dəfə isə Pünhan "Kəlamlar" kitabını ərsəyə gətirib.

Hər şeyi öz adıyla...

"Nurlan" nəşriyyatında işıq üzü görən kitabın redaktoru tanınmış ilahiyyatçı, yazıları ilə oxucuların rəğbətini qazanan Hacı Vaqif Cəliloğludu. "Kəlamlar"a görə daha bir şəxsə təşəkkür düşür. Sözə, sənətə dəyər verən tanınmış iş adamı, xeyriyyəçi Lətif Əsədov bu kitabını ərsəyə gətirmək üçün həmkarımıza maddi dayaq olub.

"Ağıllı söz- müdriklik əlamətidir" adlı ön sözdə Giya Paçxataşvili yazır: "Əlahəzrət Söz insanlararası, millətlərarası münasibətlər yaratmış, dövlətləri idarə edə biləcək cəmiyyətləri qurmuş. Məhz Sözün möhtəşəm, cəlbedici qüvvəsi sayəsində sivilizasiyalar yaşamaq pasportu almış, qardaş qırğınlarının qarşısı alınmış, neçə-neçə xalqlar yox olmaq təhlükəsindən qurtulmuşdur. Söz, İncilə, Zəbura, Tövrata və Qurana çevrilərək İnsanı Gözəgörünməzə inanmağa, xeyirxah olub bir-birini sevməyə sövq etdi.

... Oxuculara təqdim olunan Pünhan Şükürün "Kəlamlar"ı zəncirvari ipə-sapa düzülmüş təyinlər, anlayışlar, düşüncələr və analitik nəticələrdir ki, müəllifin Söz və həyat potensialını nümayiş etdirir. İlk baxışdan subyektiv görünən "Kəlamlar" əslində hər şeyi öz adıyla çağırmağa hesablanmışdır..."

Bölüm-bölüm "Kəlamlar"

Pünhan Şükür fikirlərini müxtəlif bölümlərlə oxucusuna çatdırır. "Yaradan haqqında düşüncələr", "Din", "Valideynlər", "Nəsihətlər", "Siyasət", "Ölüm" və digər bölümlərdəki fikirlər maraqla oxunur.

Kitabda yer alan "Kəlamlar"dan bəziləri bunu bir daha sübut edə bilər- "Yaradan insanın, insan isə Yaradanın ən böyük kəşfidir", "Eyibsiz dost axtarırsınızsa, əlbəttə ki, Allahı seçin", "Rəbbimiz qüdrətinə görə tək olmaqda, qüdrətini təsdiqləyənlərlə birgə cəm olmaqda maraqlıdır", "Yaradıcı ol ki, Yaradan səni yaratdığından məmnun olsun", "Allahın ögey bəndəsi olmur, ögeyləşən bəndəsi olur", "Abırlı günahkar üçün Cəhənnəmin odundan çox rüsvayçılığı qorxuludur", "Pisliyin gizlənməyəni yaxşılığın gözə soxulanından yaxşıdır", "Sülhməramlı ordu olmur", "Ən çox paxıllıq hədəfi olan peyğəmbər Məhəmməd əleyhissəlamdır. Məhz sonuncu peyğəmbər olduğuna görə", "Qaranlıq ikiqat qorxuludur. O təkcə Şəri deyil, həm də Xeyiri görməmək təhlükəsi daşıyır" və s...

Pünhan Şükürün belə maraqlı kəlamları çoxdu. "Kəlamlar"ı oxuyanda özünüz görəcəksiz...

Etibar Cəbrayıloğlu

Ədalət.- 2011.- 15 yanvar.- S. 8.