"Özümü nə musiqisiz, nə də ki ailəsiz təsəvvür edə bilərəm"

Milli.Az xəbər portalı "Xoş gəlmişik" adlı rubrikasının növbəti qonağını təqdim edir. Bu, şou-biznesdə yüksək intelektual səviyyəsi, musiqi savadı və məlahətli səsi ilə fərqlənən, Bakı Musiqi Akademiyasında baş müəllim vəzifəsində çalışan Lalə Məmmədovadır. Evində qonaq olduğumuz zaman qonaqpərvərlik və səmimilik nümayiş etdirən müğənninin əhval-ruhiyyəsi yüksək idi. İllər öncə İlham Qafarovun evinə gəlin köçən müğənni özü ilə cehiz gətirməyib: "İki çamadan paltarlarımı götürüb, gəlin köçdüm. İlham o zaman deyirdi ki, evimdə hər şey var, heç nə gətirmə. Valideynlərim isə mənə ayırdıqları cehizi, indi qızıma saxladıqlarını deyirlər". Müğənninin evə qarşı kompleksi olduğu nəzərimdən qaçmadı: "Yataq otağını çəkməyin. Ayıbdır, mən camaata yatağımı və ya dolabımı nümayiş etdirmək istəmirəm". Mətbəxə keçsək də, müğənni heç nə hazırlamadı. Onun sözlərinə görə, gərgin iş prosesi üzündən evdarlıqla məşğul olmur, evində işçiləri də kifayət qədərdir. Lalə xanım yuxudan oyanan zaman səhər yeməyi artıq hazır olur. Yeri gəlmişkən, müğənninin evdə 3 nəfər köməkçisi gözümüzə dəydi - ev işləri ilə məşğul olan xanım, balaca Nərgizin dayəsi və müğənninin prodüseri Leyla.

Divar boyu düzülmüş şəkillər ailənin xüsusi hobbisidir. Hər səfər etdikləri ölkədən portretlər gətirən cütlük onları bütün otaqlarda divar boyu düzüblər. Marağımızı xüsusi ilə cəlb edən Lalə xanımın Nyu-Yorkda çəkilmiş karikatura şəkli oldu: "Bunu Nyu-Yorkda 5 dollara çəkiblər, 5 dollar isə üstünün kağızına vermişik. Cəmi 10 dollar ödəməklə bu cür əsəri ərsəyə gətirmək mümkündür. Biz də isə buna görə küllü miqdarda pul istəyərlər" - Lalə xanım məlumat verdi.

Diqqətimi çəkən digər bir məqam "akvarium" oldu. Balıqlara xüsusi məhəbbət bəsləyən müğənninin ən zərif qızıl balıqdan tutmuş, vəhşi balıq növlərinədək varıdır: "Özüm də balıq bürcündənəm. Bəlkə də balıqları bu üzdən sevirəm. Ümumiyyətlə, heyvanlardan qorxmuram, amma onlara qarşı allergiyam var". Evdə maraqlı məkanlardan biri də balaca Nərgizin otağıdır. Oyuncaqlara həddindən artıq aludə olan qızcığazın otağında nə istəsən tapmaq olardı. Oyuncaq musiqi alətləri əlinə alıb, ifa edən Nərgiz anasına bənzəmək istədi. O, musiqi alətində ifa edir, Lalə xanım isə oxuyurdu.

- Lalə xanım, bu mehriban və gözəl ailənin sirri nədir?

- İlham (həyat yoldaşı-red.) hər zaman deyir ki, ailənin sirri olmur. Burada bir-birinə səmimiyyət, inam və hörmət olmalıdır. Bütün bunların hamısını bir yerə cəm etsək, olur gözəl ailə. Başqa cür ola da bilməz. Əgər ailədə səmimiyyət və hörmət qarşılıqlı deyilsə, heç bir gözəl ailədən söhbət gedə bilməz. Hər hansı bir cəmiyyət üçün yalandan xoş münasibət qurursansa o zaman bu ailə saxtadır. Kiminsə, nəyinsə xətrinə ailə həyatı quran, cəmiyyət içərisində özünə yer tutmaq üçün bu addımı atan kəslər səhv edirlər. Götürək bir binanın inşasında lazım olan sütunları. Əgər hər 2 sütunlar möhkəm, qaydasında olarsa, tikilən evdə sağlam və uzun ömürlü olur. Hesab edirəm ki, ev bir qaladır. Ailədə gərək hər kəs özü öz üzərində məsuliyyət daşısın. Bu zaman ailədəki uşaq da yaxşı tərbiyə götürəcək.

- Bu qala ilə sənəti bir zirvədə saxlamaq çətin deyil?

- Əgər hər ikisi sənə yaşamağa stimul verirsə, yox. Ailə və sənət məni həyata bağlayan amillərdir. Özümü nə musiqisiz, nə də ki ailəsiz təsəvvür edə bilmərəm. Yadıma salanda əvvəllər ailəsiz necə yaşamışam, ağlıma sığışdıra bilmirəm. Qadın çiynini söykəməyə möhkəm bir dayaq hiss edirsə, nəinki sənət və ailə, bütün işləri də öz üzərinə götürə bilər. Düzdür, hər şeyin öz çətinlikləri var, lakin ailə qurandan sonra sənətimdə mənə böyük bir təkan oldu. Buna görə də hər ikisi mənim üçün əvəzolunmazdır.

- Ev işlərinizi xadimə edir. Bəs evdar xanım olmaq keçmir ürəyinizdən?

- Mən istəsəm bütün ev işlərini öz üzərimə götürərəm. Amma mənim iş qrafikim çox ağırdır, çatdıra bilmirəm. Tək yoldaşıma bir nəfər lazımdır ki, ona qulluq eləsin.

- Axı danmaq olmaz, o, sizi çox gözəl başa düşür.

- Bəli, Allah onu mənə çox görməsin. İstəmirəm kimsə elə fikirləşsin ki, mən yoldaşımı tərifləyirəm. Amma həqiqətən İlham mənə ikinci həyat verən insan oldu. Yadıma salıram ki, ondan əvvəl həyatım çox darıxdırıcı idi. Bir insan kimi özümü hələ tapmamışdım. Evdəkilər məni bir az kompleksli böyütmüşdülər. Atam hər zaman yanımda olub. Əvvəlcə oxumağa qoymurdular. Deyirdilər qonşular nə deyər. Yadımdadır, mən ilk dəfə proqrama çıxanda, anam mənə elə dəhşətli sözlər demişdi ki, özümü dünyanın əxlaqsızı kimi hesab etmişdim. Məni o qədər acılamışdı ki, elə bilirdim çox böyük bir qəbahət işləmişəm. Atam professordur, deyirdi mən iş yoldaşlarımın üzünə necə baxacağam, qızım restoranda oxuyub. Yadımdadır ki, niyə mən restoranda oxudum. Çünki maqistraturanın ödənişli fakültəsinə düşmüşdüm və bunu evdəkilərdən gizlədirdim. Çünki o zaman hər bir ailədə ola biləcək hadisə bizdə də yaşanırdı. Vəziyyət o qədər də yaxşı deyildi. Ona görə, özüm oxuyurdum və təhsil haqqımı verirdim. Çalışırdım ki, "Təhsil haqqını ödəyə bilmədiyi üçün universitetdən xaric edilir" sözü mənim ünvanıma səslənməsin. Ona görə işləyirdim.

- Söhbət neçənci illərdən gedir?

- 2000-ci ildən. Onda İlqar Xəyal ilk dəfə mənə zəng vurmuşdu və məni şou-proqramda oxumağa dəvət edirdi. Yadımdadır, onda ayda 300 dollar verirdilər. İndi fikirləşirəm ki, valideynlərim məni o zamandan belə böyütməsəydilər, mən indi bu Lalə olmazdım.

Ədalət.- 2011.- 17 fevral.- S. 8.